Հիշատակի երեկոյին պատրաստվիր ուրախ սրտով
1. Ինչո՞վ է առանձնանում Հիշատակի երեկոյի շրջանը։
1 Հիշատակի երեկոն, որը տեղի է ունենալու մարտի 26-ին, գերազանց հնարավորություն է տալիս «ցնծալու» այն բանի համար, որ Աստված մեզ փրկության միջոց է տվել (Ես. 61։10)։ Ի՞նչ կարող ենք անել, որ «ցնծանք» ոչ միայն Հիշատակի երեկոյի օրը, այլև դրանից առաջ։
2. Ի՞նչն է մղում մեզ նախապատրաստվելու Հիշատակի երեկոյին։
2 Կազմակերպում։ Տիրոջ ընթրիքը խորիմաստ, բայցև պարզ արարողություն է։ Այդուհանդերձ, որպեսզի ոչ մի կարևոր բան բաց չթողնենք, հարկավոր է նախապես ամեն ինչ ծրագրել (Առակ. 21։5)։ Անհրաժեշտ է որոշել ժամը և վայրը, հոգ տանել համապատասխան խորհրդանիշների մասին։ Անցկացման վայրը պետք է մաքրել ու պատրաստել։ Հռետորը պետք է լավ պատրաստի ելույթը, իսկ խորհրդանիշները մատուցող եղբայրներն ու սպասարկուները պետք է հստակ իմանան իրենց անելիքը։ Անկասկած, այս գործերից շատերն արդեն արվել են։ Փրկանքի հանդեպ երախտագիտությունը մղում է մեզ, որ լավ նախապատրաստվենք այս կարևոր միջոցառմանը (1 Պետ. 1։8, 9)։
3. Ինչպե՞ս կարող ենք պատրաստել մեր սիրտը Տիրոջ ընթրիքին։
3 Պատրաստիր սիրտդ։ Հիշատակի երեկոյի ողջ իմաստը հասկանալու համար շատ կարևոր է նաև պատրաստել սիրտը (Եզր. 7։10)։ Դրա համար հարկավոր է կարդալ աստվածաշնչյան այն հատվածները, որոնք վերաբերում են Հիսուսի երկրային կյանքի վերջին օրերին, և խորհրդածել ընթերցածի շուրջ։ Հիսուսի անձնազոհ ոգու մասին խորհրդածելը կմղի մեզ ընդօրինակելու նրան (Գաղ. 2։20)։
4. Փրկանքի օգուտներից հատկապես ո՞րն է քեզ մեծ ուրախություն պատճառում։
4 Քրիստոսի մահը արդարացնում է Եհովայի գերիշխանության օրինականությունը։ Այն ազատում է մեղքից ու մահից (1 Հովհ. 2։2)։ Հնարավորություն է տալիս Եհովայի հետ խաղաղ փոխհարաբերություններ ունենալու և ստանալու հավիտենական կյանք (Կող. 1։21, 22)։ Օգնում է է՛լ ավելի վճռականորեն ապրելու մեր նվիրման համաձայն և լինելու Քրիստոսի հավատարիմ աշակերտ (Մատթ. 16։24)։ Եկեք բոլորս Հիշատակի երեկոյին պատրաստվենք ուրախ սրտով։