Արդյունավետորեն օգտագործենք ամսագրերի հին համարները
Ամսագրերի հին համարները չեն կարող օգնել որևէ մեկին, եթե պահենք պահեստում կամ դեն նետենք։ Ուստի պետք է փորձենք տարածել դրանք։ Անգամ մեկ ամսագիրը կարող է շարժել մարդու հետաքրքրությունը և մղել նրան կանչելու Եհովայի անունը (Հռոմ. 10։13, 14)։ Ստորև բերվում են մի քանի առաջարկներ, որոնք կօգնեն մեզ արդյունավետորեն օգտագործելու հին համարները։
Ոչ հաճախակի մշակվող տարածքում քարոզելիս կարող ենք մեկական ամսագիր գցել փոստարկղերը կամ թողնել դռների արանքում, եթե այդ պահին տանը մարդ չկա։
Երբ ավտոբուսի կամ գնացքի կանգառներում հանդիպում ենք մարդկանց, կարող ենք հարցնել, թե արդյոք կցանկանան որևէ բան ընթերցել, ապա առաջարկել ամսագրերի մի քանի հին համարներ և թույլ տալ, որ նրանք ընտրեն։
Երբ այցելում ենք ծերանոցներ, հիվանդանոցներ կամ նմանատիպ այլ վայրեր, որոնք մեր ժողովի տարածքի մեջ են մտնում, կարող ենք հին ամսագրերից թողնել սպասասրահում։ Սովորաբար լավ կլինի, որ նախ թույլտվություն խնդրենք տնօրինությունից։ Իսկ եթե այնտեղ արդեն կան ամսագրեր, պետք չէ առաջարկել։
Վերայցելությունների նախապատրաստվելիս կարող ենք հաշվի առնել յուրաքանչյուր անհատի հետաքրքրություններն ու կարիքները։ Ունի՞ նա ընտանիք։ Սիրում է ճանապարհորդե՞լ։ Սիրում է այգեգործությա՞մբ զբաղվել։ Կարելի է հին համարներից փնտրել այնպիսի ամսագրեր, որոնք կհետաքրքրեն այդ անհատին և այցելության ժամանակ առաջարկել նրան։
Երբ կրկին հանդիպում ենք հետաքրքրություն ցույց տված անհատի, ում հետ չի հաջողվել կապ պահպանել, կարող ենք առաջարկել հին համարներից, որոնք դեռ չենք տվել նրան։