Ինչպե՞ս օգնել նրանց, ովքեր դժվարությամբ են ընթերցում

1. Ինչո՞ւ Աստվածաշունչ ուսումնասիրելը հեշտ չէ նրանց համար, ովքեր դժվարությամբ են ընթերցում։

¹ Հնարավոր է, որ նրանք, ովքեր դժվարությամբ են ընթերցում, սկսեն հետաքրքրվել հոգևոր հարցերով, սակայն վարանեն կամ վախենան կարդալ Աստվածաշունչը և այլ գրքեր։ Այսպիսի անհատներին «Աստվածաշունչը սովորեցնում է» գիրքը առաջարկելը (հատկապես սկզբում) գուցե այդքան էլ արդյունավետ չլինի։ Ինչպե՞ս կարող ենք այդպիսի մարդկանց հոգևոր օգնություն ցույց տալ։ Հարցում է անցկացվել ավելի քան 20 երկրների փորձառու քարոզիչների հետ։ Տեսնենք, թե ինչ են նրանք առաջարկում։

2. Ի՞նչ արդյունավետ գործիքներ կան դժվարությամբ ընթերցող մարդկանց համար։

² Եթե ուսումնասիրողը վատ է ընթերցում կամ ընդհանրապես չի կարողանում կարդալ, գուցե սկսես «Լսիր Աստծուն» կամ «Լսիր Աստծուն և ապրիր հավիտյան» գրքույկից։ Միացյալ Նահանգներում ապրող մի ռահվիրա եղբայր այս երկու գրքույկներն էլ ցույց է տալիս անհատին և հարցնում է, թե նա որն է նախընտրում։ Քենիայի մասնաճյուղը տեղեկացնում է, որ այս երկու գործիքներն էլ անչափ արդյունավետ են, քանի որ աֆրիկյան հասարակության մեջ մարդկանց սովորաբար սովորեցնում են որևէ բան պատմելով և ոչ թե հարց ու պատասխանով քննարկումով։ Թեև կրթված անհատի համար գուցե նորմալ լինի հարց ու պատասխանով քննարկումը, սակայն նման մեթոդը հնարավոր է՝ կրթություն չունեցող անհատին անհարմար դրության մեջ գցի։ Շատ քարոզիչներ էլ օգտագործում են «Բարի լուր Աստծուց» կամ «Դու կարող ես դառնալ Աստծու բարեկամը» գրքույկը, կամ էլ, եթե հարմար է, «Աստվածաշնչի պատմությունների իմ ժողովածուն» գիրքը։

3. Ի՞նչը կօգնի մեզ արդյունավետորեն սովորեցնելու նրանց, ովքեր չեն կարողանում կարդալ։

³ Գովիր։ Նրանք, ովքեր չեն սովորել կարդալ, գուցե շփոթության կամ թերարժեքության զգացում ունենան։ Այսպիսի մարդկանց ճշմարտությունը սովորեցնելու առաջին քայլն այն է, որ օգնենք նրանց չկաշկանդվելու։ Կարդալ չիմացող մարդկանց մեծամասնությունը խելացի է ու ընդունակ է սովորելու։ Ուստի հարգանք ցույց տուր նրանց հանդեպ ու բարձր պահիր նրանց արժանապատվությունը (1 Պետ. 3։15)։ Նրանք կշարունակեն ուսումնասիրել, եթե տեսնեն, որ իրենց ջանքերը իզուր չեն, և որ իրենք հոգևորապես առաջադիմում են։ Հետևաբար, առատաձեռնորեն գովիր նրանց։

4. Ինչպե՞ս կարող ենք հորդորել նրանց, ովքեր վատ են ընթերցում, նախապատրաստվել ուսումնասիրությանը։

⁴ Նույնիսկ եթե ուսումնասիրողը վատ է ընթերցում, հորդորիր նրան նախապատրաստվել ուսումնասիրությանը։ Հարավաֆրիկյան Հանրապետությունում որոշ քարոզիչներ քաջալերում են իրենց ուսումնասիրողներին խնդրել ընտանիքի անդամներից կամ ընկերներից մեկին, ով լավ է կարդում, որ օգնի իրենց։ Մեծ Բրիտանիայում մի քարոզիչ իր ուսումնասիրողներին խրախուսում է նախապատրաստվել՝ առաջարկելով ուսումնասիրության ընթացքում մի քանի պարբերություն կարդալ իր գրքից, որպեսզի նրանք տեսնեն, թե որքան հեշտ է գտնել հարցի պատասխանը, երբ այն արդեն ընդգծված է պարբերության մեջ։ Իսկ Հնդկաստանում մի եղբայր քաջալերում է իր ուսումնասիրողներին նախօրոք նայել հաջորդ շաբաթվա դասի նկարները և խորհրդածել դրանց շուրջ։

5. Ինչպե՞ս կարող ենք համբերատար լինել ուսումնասիրություն անցկացնելիս։

⁵ Եղիր համբերատար։ Անկախ այն բանից, թե որ հրատարակությունից ես օգտվում, կենտրոնացիր գլխավոր մտքերի վրա և օգնիր ուսումնասիրողին դրանք լավ հասկանալու։ Սկզբում գուցե նախընտրելի լինի 10-ից 15 րոպե տևողությամբ քննարկումներ անել։ Մեծ ծավալի նյութ մի՛ քննարկիր։ Թերևս որոշես ամեն դասի ժամանակ քննարկել ընդամենը մի քանի պարբերություն։ Եղիր համբերատար, եթե ուսումնասիրողը դանդաղ է կարդում։ Ամենայն հավանականությամբ, Եհովայի հանդեպ իր գնահատանքը զարգացնելուն զուգընթաց նա կբարելավի իր ընթերցանությունը։ Ուստի որպեսզի օգնես ուսումնասիրողին դա անելու, լավ կլինի, որ հենց սկզբից նրան հրավիրես ժողովի հանդիպման։

6. Ինչպե՞ս կարող ենք օգնել մարդկանց սովորելու կարդալ։

⁶ Եթե Աստվածաշունչ ուսումնասիրողը սովորի կարդալ, նա ավելի արագ կառաջադիմի (Սաղ. 1։1–3)։ Շատերը օգնել են ուսումնասիրողներին՝ ամեն ուսումնասիրության վերջում մի քանի րոպե օգտվելով «Վարժվիր գրել-կարդալու մեջ» գրքույկից։ Եթե ուսումնասիրողը վհատվում է, կարող ես վստահություն առաջացնել իր ուժերի հանդեպ՝ նշելով մի քանի բան, որ նա կարողացել է սովորել։ Հավաստիացրու նրան, որ Եհովան կօրհնի իր ջանքերը, և հորդորիր նրան աղոթել օգնություն ստանալու համար (Առակ. 16։3; 1 Հովհ. 5։14, 15)։ Մեծ Բրիտանիայում որոշ քարոզիչներ իրենց ուսումնասիրողներին հորդորում են դնել ողջամիտ, բայց հասանելի նպատակներ, օրինակ՝ սկզբում նպատակ դնել սովորել այբուբենը, հետո գտնել ու կարդալ որոշ աստվածաշնչյան համարներ կամ ընթերցել աստվածաշնչյան հրատարակություններից պարզ ոճով գրված հոդվածները։ Հաճախ կարդալ սովորեցնելը ներառում է մղել նրանց ցանկանալու դա անել, ոչ թե պարզապես սովորեցնել, թե ինչպես դա անել։

7. Ինչո՞ւ չպետք է հապաղենք ճշմարտությունը սովորեցնել նրանց, ովքեր դժվարությամբ են ընթերցում։

⁷ Եհովան անուշադրության չի մատնում նրանց, ովքեր կրթություն չեն ստացել (Հոբ 34։19)։ Նրա համար կարևոր է անհատի սրտի վիճակը, քանի որ նա քննում է սրտերը (1 Տար. 28։9)։ Ուստի մի՛ հապաղիր ճշմարտությունը սովորեցնել նրանց, ովքեր դժվարությամբ են ընթերցում։ Քո ձեռքի տակ կան հրաշալի գործիքներ։ Ի վերջո, դու կարող ես շարունակել ուսումնասիրությունը «Աստվածաշունչը սովորեցնում է» գրքով և օգնել անհատին ամբողջական հասկացողություն ձեռք բերելու աստվածաշնչյան ուսմունքների վերաբերյալ։