Քեզ մի՛ սահմանափակիր անվստահության զգացումի պատճառով
1. Ինչո՞ւ են ոմանք խուսափում ուսումնասիրություն առաջարկելուց։
1 Խուսափո՞ւմ ես Աստվածաշնչի ուսումնասիրություն առաջարկելուց՝ մտածելով, թե չես կարող այն լավ անցկացնել։ Հին ժամանակներում Աստծու հավատարիմ ծառաները, օրինակ՝ Մովսեսն ու Երեմիան, երբեմն կարծել են, որ չեն կարող իրենց հանձնարարություններն անել (Ելք 3։10, 11; 4։10; Երեմ. 1։4–6)։ Ուստի այդպիսի զգացում ունենալը նորմալ է։ Իսկ ինչպե՞ս կարող ես այն հաղթահարել։
2. ԻՆչո՞ւ չպետք է բավարարվենք միայն տնետուն ծառայելով։
2 Լավ կլինի հիշել, որ Եհովան մեզնից երբեք չի պահանջում անել այն, ինչը վեր է մեր ուժերից (Սաղ. 103։14)։ Հետևաբար, «աշակերտներ պատրաստելու» և «նրանց սովորեցնելու» պատվերը մենք կարո՛ղ ենք անել (Մատթ. 28։19, 20)։ Դա մի այնպիսի բան չէ, որը Եհովան տալիս է միայն ամենափորձառուներին կամ ամենաշնորհալիներին (1 Կորնթ. 1։26, 27)։ Ուստի մենք չպետք է սահմանափակենք մեր ծառայությունը միայն տնետուն քարոզելով՝ Աստվածաշնչի ուսումնասիրություն անցկացնելը թողնելով ուրիշներին։
3. Ինչպե՞ս է Եհովան օգնում մեզ, որ ուսումնասիրություն անցկացնենք։
3 Որակյալ լինելը Աստծուց է։ Աշակերտ պատրաստելու գործում որակյալ լինելը Եհովայից է (2 Կորնթ. 3։5)։ Իր կազմակերպության միջոցով նա սովորեցնում է մեզ աստվածաշնչյան այնպիսի ճշմարտություններ, որոնք նույնիսկ ամենակրթված մարդիկ չգիտեն (1 Կորնթ. 2։7, 8)։ Նա Աստվածաշնչում գրել է տվել Մեծ Ուսուցչի՝ Հիսուսի ուսուցողական մեթոդները, որպեսզի մենք ընդօրինակենք նրան։ Եհովան անընդհատ մեզ կրթում է ժողովի միջոցով։ Աստված նաև հոգ է տարել, որ մենք ունենանք Աստվածաշնչի ուսումնասիրություն անցկացնելու ծրագիր։ Նա տվել է համապատասխան ձեռնարկներ, օրինակ՝ «Աստվածաշունչը սովորեցնում է» գիրքը, որպեսզի ճշմարտությունը ուսուցանենք տրամաբանորեն և դյուրըմբռնելի ձևով։ Ուսումնասիրություն անցկացնելը կարող է մեր սպասածից ավելի հեշտ լինել։
4. Ինչո՞ւ կարող ենք վստահ լինել, որ Եհովան կօգնի մեզ։
4 Եհովան օգնեց Մովսեսին ու Երեմիային կատարելու իրենց հանձնարարությունները (Ելք 4։11, 12; Երեմ. 1։7, 8)։ Այսօր Աստված մեզ էլ է օգնում կատարելու մեր հանձնարարությունները, մասնավորապես Աստվածաշնչի ուսումնասիրություն անցկացնելու հարցում։ Եկեք հիշենք, որ ուսուցում անցկացնելու միջոցով մենք մարդուն սովորեցնում ենք ճշմարտությունը Եհովայի մասին, ինչը հաճելի է Նրան (1 Հովհ. 3։22)։ Ուստի նպատակ դիր Աստվածաշնչի ուսումնասիրություն անցկացնելու, մի բան, որը ծառայության ամենահաճելի ձևերից մեկն է։