Ընտանիքը յարձակումի ենթարկուած
«ԸՆՏԱՆԻՔԸ մարդկային ամենէն հին հաստատութիւնն է եւ, շատ մը կերպերով, կարեւորագոյնն է։ Անիկա ընկերութեան հիմնական բջիջն է։ Քաղաքակրթութիւններ բոլորովին վերապրած կամ կործանած են, կախեալ ըլլալով ընտանեկան կեանքին հաստատ կամ դիւրաբեկ ըլլալէն»։
Այսպէս ըսաւ համայնագիտարան մը (The World Book Encyclopedia, 1973)։ Ներկայ հեռանկարէն դիտուած, սակայն, այս խօսքերը սպառնական, նոյնիսկ չարաքուշակ կը հնչեն։ Վերջին քանի մը տարիներուն, ականատես եղած ենք այնպիսի բանի մը՝ որ ընտանեկան կեանքին վրայ ճակատային յարձակում մը կը գործէ։ Ժողովրդային խորհրդատու Ճոն Պրէտշօ կը գրէ. «Այսօր, ընտանիքին մէջ տագնապ մը կայ։ ... Ամուսնալուծման բարձր տոկոսը, պատանեկան բռնութիւնները, թմրեցուցիչի հսկայական մոլութիւնը, ազգապղծութեան համաճարակը, ուտելու խանգարումները եւ ֆիզիքական ծեծը կ’ապացուցանեն որ հիմնական սխալ մը կայ»։
Արդարեւ, համայն աշխարհի մէջ, կ’ապացուցուի «որ հիմնական սխալ մը կայ» ընտանիքին մէջ։ Պարբերաթերթ մը (The Unesco Courier) Եւրոպայի մէջ այս վիճակին մասին ըսաւ. «1965–էն ի վեր, ամբողջ ցամաքամասին մէջ ամուսնալուծումը հսկայական յաւելում մը կրած է։ ... Մէկ ծնողով ընտանիքներուն թիւը աւելցած է»։ Զարգացումի վրայ եղող երկիրներն ալ ընտանեկան տագնապի յաւելում մը կ’ունենան։ Գրագէտ Հելէն Թրամպլէ դիտել կու տայ. «Դարերէ ի վեր բնականոն, նախասահմանեալ, անփոփոխ ապրելակերպ ունեցած ընկերութիւններու մէջ ապրող միլիոնաւորներու համար, մեր ժամանակը վրդովումի ժամանակ մըն է»։
Ներկայիս, շատ մը տուներու մէջ մասնաւորաբար ահազանգային մթնոլորտ մը գոյութիւն ունի։ Միայն Միացեալ Նահանգներուն մէջ, միլիոնաւոր երախաներ կը մեծնան գինեմոլ ծնողի մը կողմէ։ Ընտանեկան բռնութեան մէջ ալ ահաւոր յաւելում մը եղած է։ Մտերիմ Բռնութիւն (Անգլ.) խորագրով իրենց գրքին մէջ, Ռիչըրտ Ճէլզ եւ Մըրրէ Շթրաուս կը տեղեկագրեն. «Շատ աւելի հաւանականութիւն կայ որ ֆիզիքական յարձակում կրէք, ծեծուիք եւ սպաննուիք ձեր տան մէջ սիրելիի կողմէ, քան որեւէ ուրիշ վայրի մը մէջ, կամ ոեւէ մէկու մը կողմէ»։
Եթէ քաղաքակրթութեան վերապրումը իրապէս կախեալ է ընտանիքին հաստատ ըլլալէն, ուրեմն քաղաքակրթութեան ապագային մասին մտահոգուելու պատճառ կայ։ Բայց քաղաքակրթութեան ճակատագիրը թերեւս ձեր մտահոգութիւններուն ամենավերջինը ըլլայ։ Շատ հաւանաբար ձեր մտահոգութիւնն է որ այս վրդովեալ վիճակը ի՛նչ կրնայ բերել ձեր ընտանիքին։ Հետեւանքը ի՞նչ պիտի ըլլայ։ Հեղինակաւոր աղբիւրէ մը եկած պատասխանը կրնայ շատ զարմացնել ձեզ։