Ժխորհային աշխարհի մը մէջ անոնք խաղաղութիւն գտան

ԱՅՍ պարբերաթերթին կողքին վրայ Պոսնիա Հերցէկովինիայէն տաք պատերազմի տեսարան մը նկարուած է։ Այսպիսի վայրի մը մէջ կրնա՞յ խաղաղութիւն գոյութիւն ունենալ։ Զարմանալիօրէն կրնանք այո՛ պատասխանել։ Մինչ այդ եղերական երկրին մէջ Հռովմէական Կաթողիկէ, Արեւելեան Ուղղափառ եւ Մահմետական համայնքները հողամասի համար կը կռուին, բազմաթիւ անհատներ խաղաղութեան կարօտը կը քաշեն եւ ոմանք զայն գտած են։

Տորէմները Սարայէվոյի մէջ կ’ապրէին եւ Եհովայի Վկաներ էին։ Այդ քաղաքին մէջ տիրող ժխորին մէջ, անոնք սովորութիւն ըրած էին իրենց դրացիները այցելել եւ անոնց հետ բաժնել Աստուծոյ Թագաւորութեան բարի լուրը։ (Մատթէոս 24։14) Ինչո՞ւ։ Քանի որ Տորէմ ընտանիքը գիտէր որ այս Թագաւորութիւնը իրական է, թէ անիկա արդէն երկնքի մէջ հաստատուած է եւ թէ մարդկութեան համար խաղաղութեան լաւագոյն ու միակ յոյսն է։ Եհովայի Վկաները ամբողջական վստահութիւն ունին Պօղոս առաքեալի կոչած ‘խաղաղութեան բարի լուր’ին վրայ։ (Եփեսացիս 2։17. ՆԱ) Պոզօ եւ Հէնա Տորէմներու նման անհատներու շնորհիւ, շատեր խաղաղութիւն կը գտնեն Պոսնիա եւ Հերցեկովինիայի մէջ։

Գալիք Իրական Խաղաղութիւնը

Տորէմ ընտանիքին մասին շատ ըսելիք ունինք։ Բայց, նախ ուրիշ զոյգի մը մասին խօսինք, որ Աստուծոյ Թագաւորութեան վրայ վստահութիւն մշակեց։ Անոնց անուններն են Արթիւր եւ Արինա։ Ասոնք իրենց որդիներով կ’ապրէին նախկին Սովետական Միութեան հողամասին մէջ գտնուող հանրապետութեան մը մէջ։ Երբ քաղաքացիական պատերազմը պայթեցաւ, Արթիւր կողմերէն մէկուն կողքին կռուեցաւ։ Սակայն շուտով ան ինքն իրեն հարց տուաւ. ‘Ինչո՞ւ այս մարդոց դէմ կը կռուիմ, որոնք իմ դրացիներս էին’։ Ան ձգեց երկիրը եւ բազմաթիւ դժուարութիւններէ ետք, իր մատղաշ ընտանիքին հետ Էստոնիա գնաց։

Սբ. Փէթէրզպուրկ այցելութեան մը ընթացքին, Արթիւր Եհովայի Վկաներու հանդիպեցաւ եւ Աստուծոյ Թագաւորութեան մասին իր սորված բաներէն տպաւորուեցաւ։ Եհովայի կամքն է որ շատ շուտով Աստուծոյ Թագաւորութիւնը մարդկութեան վրայ միակ իշխանութիւնը ըլլայ։ (Դանիէլ 2։44) Ապա, երկիրը խաղաղ վայրի մը պիտի վերածուի, ուր այլեւս քաղաքացիական պատերազմներ եւ ազգամիջեան կռիւներ պիտի չմղուին։ Այդ ժամանակուան մասին Եսայի մարգարէացաւ. «Անոնք պիտի չվնասեն ու չապականեն իմ բոլոր սուրբ լերանս վրայ. քանզի երկիրը Տէրոջը գիտութիւնովը պիտի լեցուի, ինչպէս ջուրերը ծովը կը ծածկեն»։—Եսայեայ 11։9

Աստուածաշունչի ուսումնասիրութեան օժանդակող գրքի մը մէջ, այդ ապագայ խաղաղ երկրին մասին արուեստագէտի մը նկարչութիւնը նկատելէ ետք՝ զոր Վկայ մը իրեն ցոյց տուաւ՝ Արթիւր նշեց որ ինք ճիշդ ատոր նմանող վայրի մը մէջ կ’ապրէր։ Հիմա սակայն, ատիկա քաղաքացիական պատերազմով աւերուած էր։ Էստոնիայի մէջ, Արթիւր եւ իր ընտանիքը Աստուծոյ Թագաւորութեան մասին յաւելեալ տեղեկութիւն ստացան, Եհովայի Վկաներու հետ Աստուածաշունչը ուսումնասիրելով։

Խաղաղութիւն՝ Ժխորին մէջ

Սաղմոս 37։37–ն կ’ըսէ. «Արդարը տե՛ս եւ ուղիղին նայէ՛. վասնզի խաղաղարար մարդը բարի վախճան պիտի ունենայ»։ Իրականութեան մէջ, Աստուծոյ աչքին արդար եւ ուղիղ եղող անհատին խաղաղութիւնը, միայն ապագային սահմանափակուած չէ։ Զայն հի՛մա իսկ կը վայելէ։ Ասիկա ինչպէ՞ս կարելի է։ Ահաւասիկ Փոլ անունով մարդու մը փորձառութիւնը։

Փոլ Եթովպիոյ հարաւ–արեւմուտքը ապաստանեալներու հեռաւոր ճամբարի մը մէջ կ’ապրի, թէեւ ինք դրացի երկրէ մը եկած է։ Իր հայրենիքին մէջ, ան Եհովայի Վկայի մը հանդիպած էր, որ քարիւղի ընկերութեան մը համար կ’աշխատէր։ Այս մարդը իրեն տուած էր Աստուածաշունչի ուսումնասիրութեան օժանդակող գիրք մը՝ Ճշմարտութիւնը որ Յաւիտենական Կեանքի Կ’առաջնորդէ։a Փոլ անգամ մըն ալ չտեսաւ Վկան, բայց ուշադրութեամբ սերտեց գիրքը։ Քաղաքացիական պատերազմը զինք Եթովպիոյ մէջ ապաստանեալներու ճամբար մը տարաւ եւ հոն իր սորված բաներուն մասին ան ուրիշներուն խօսեցաւ։ Պզտիկ խումբ մը ասոր ճշմարտութիւն ըլլալը ընդունեց։ Շուտով սկսան իրենց սորված բաները ճամբարին մէջ ուրիշներուն քարոզել։

Փոլ Դիտարանի Ընկերութեան կեդրոնատեղին նամակ գրեց օգնութիւն խնդրելու համար։ Ատիս Ապեպայէն քարոզիչ մը ղրկուեցաւ, որ զարմացաւ տեսնելով 35 հոգի, որոնք իրեն կը սպասէին, բոլորն ալ պատրաստ՝ Աստուծոյ Թագաւորութեան մասին աւելին սորվելու։ Կարգադրութիւններ եղան, որպէսզի անոնք կանոնաւորաբար օգնութիւն ստանան։

Ինչպէ՞ս կարելի է ըսել որ Փոլի նման անհատներ խաղաղութիւն կը վայելեն։ Թէեւ անոնք դժուար կեանք մը կը վարեն, բայց Աստուծոյ վրայ հաւատք ունին։ Երբ այս աշխարհի ժխորէն ազդուին, անոնք Աստուածաշունչի սա խրատը կը կիրարկեն. «Բանի մը համար հոգ մի՛ ընէք, հապա ամէն բանի մէջ աղօթքով ու աղաչանքով, գոհութիւնով մէկտեղ, ձեր խնդրանքը Աստուծոյ յայտնի ըլլայ»։ Հետեւաբար, անոնք գոհունակութիւն մը ունին, որ հազուագիւտ է ներկայիս։ Փիլիպպէի ժողովքին յղած Պօղոս առաքեալի խօսքերը, իրենց կը կիրարկուի. «Աստուծոյ խաղաղութիւնը, որ ամէն մտքէ վեր է, ձեր սրտերը ու մտքերը Յիսուս Քրիստոսով պիտի պահպանէ»։ Արդարեւ, անոնք սերտ յարաբերութիւն ունին Եհովայի՝ ‘խաղաղութեան Աստուծոյն’ հետ։—Փիլիպպեցիս 4։6, 7, 9

Ներկայիս Իսկ Խաղաղութիւն

Յիսուս Քրիստոս է Աստուծոյ Թագաւորութեան գահակալուած Թագաւորը, որ Աստուածաշունչին մէջ կոչուած է «Խաղաղութեան Իշխան»։ (Եսայեայ 9։6) Իր մասին վաղեմի մարգարէ մը ըսաւ. «Անիկա ազգերուն խաղաղութիւն պիտի քարոզէ, անոր իշխանութիւնը՝ ծովէ ծով, գետէն մինչեւ երկրին ծայրերը պիտի ըլլայ»։ (Զաքարեայ 9։10) Այսպիսի ներշնչեալ խօսքեր, խոր ազդեցութիւն ունեցան Խոսէ անունով մարդու մը կեանքին վրայ։

Ժամանակ մը Խոսէն բանտ դրուեցաւ։ Ան ահաբեկիչ մըն էր եւ զօրանոց մը պայթեցնելու համար պատրաստութիւններ տեսած ատեն ձերբակալուած էր։ Ան կը խորհէր որ միայն բռնութիւնը կրնար կառավարութեան ստիպել որ իր երկրին վիճակը բարելաւէ։ Մինչ ինք բանտն էր, Եհովայի Վկաները սկսան իր կնոջ հետ Աստուածաշունչը սերտել։

Խոսէն ազատ արձակուելէ ետք, ինքն ալ Աստուածաշունչը ուսումնասիրեց եւ Սաղմոս 85։8–ի խօսքերը շուտով սկսան իր վրայ կիրարկուիլ. «Պիտի լսեմ ինչ որ կը խօսի Տէր Աստուած. վասնզի խաղաղութեամբ պիտի խօսի իր ժողովուրդին ու իր սուրբերուն»։ Սակայն, այդ համարը կ’եզրափակուի ազդարարութեամբ մը. «Անոնք ինքնավստահութեան չդառնան. ՆԱ»։ Հետեւաբար, Եհովայի խաղաղութիւնը փնտռողը, պէտք չէ ինքնագլուխ վարուի կամ Իր կամքին ընդդիմանայ։

Ներկայիս, Խոսէն եւ իր կինը Քրիստոնեայ քարոզիչներ են։ Անոնք ուրիշները կ’ուղղեն Եհովայի Թագաւորութեան, որպէս լուծումը այն խնդիրներուն, զորս Խոսէ նախապէս փորձած էր լուծել տունը պատրաստուած ռումբերով։ Անոնք կ’ուզեն Աստուածաշունչին վստահիլ, որ կ’ըսէ. «Տէրը բարութիւն պիտի տայ»։ (Սաղմոս 85։12) Խոսէն վերջերս այցելեց այն զօրանոցը զոր ծրագրած էր քանդել։ Ինչո՞ւ։ Որպէսզի հոն գտնուող ընտանիքներուն խօսի Աստուծոյ Թագաւորութեան մասին։

Խաղաղասէր Ժողովուրդ մը

Սաղմոս 37։10, 11–ի մէջ, Աստուածաշունչը կ’ըսէ. «Քիչ ժամանակէ յետոյ ամբարիշտը պիտի չքանայ, անոր տեղը պիտի փնտռես ու պիտի չգտնես։ Սակայն հեզերը պիտի ժառանգեն երկիրը ու խաղաղութեան առատութիւնովը պիտի ուրախանան»։ Ի՜նչ փառաւոր հեռանկար մը։

Սակայն նշմարեցէք որ, Եհովայի խաղաղութիւնը միայն «հեզեր»ուն համար է։ Անոնք որոնք խաղաղութիւն կը փնտռեն, պէտք է սորվին խաղաղասէր ըլլալ։ Նոր Զէլանտա բնակող Գէյթի պարագան այս էր։ Գէյթ նկարագրուած էր որպէս «մարմնով եւ անձնաւորութեամբ զօրաւոր, կռուազան եւ առարկող»։ Ան հրոսախումբի մը մէկ անդամն էր եւ կ’ապրէր տան մը մէջ որ իրական ամրոց մըն էր, շրջապատուած պարտէզներով, ուր երեք պահակ–շուներ կը դեգերէին, ինքնակոչները արգիլելու համար։ Վեց զաւակներու տէր մայրը՝ իր կինը՝ ամուսնալուծուած էր իր հետ։

Երբ Գէյթ Եհովայի Վկաներուն հանդիպեցաւ, բարի լուրը խոր ազդեցութիւն ունեցաւ իր վրայ։ Շուտով ինք եւ իր զաւակները սկսան Վկաներուն հետ ժողովներու երթալ։ Ան մինչեւ մէջք–հասնող իր մազերը կտրել տուաւ եւ սկսաւ իր նախկին ընկերակիցներուն Աստուծոյ Թագաւորութեան մասին խօսիլ։ Անոնցմէ քանի մը հատն ալ սկսան Աստուածաշունչը ուսումնասիրել։

Համայն աշխարհի մէջ գտնուող միլիոնաւոր արդարամիտ անհատներու նման, Գէյթ սկսած էր Պետրոս առաքեալի սա խօսքերը կիրարկել. «Ան որ կ’ուզէ կեանքը սիրել ու բարի օրեր տեսնել, ... թող չարութենէ ետ քաշուի ու բարութիւն ընէ, թող խաղաղութիւն փնտռէ եւ անոր ետեւէն երթայ»։ (Ա. Պետրոս 3։10, 11) Գէյթի նախկին կինը համաձայնեցաւ իր հետ վերամուսնանալ եւ հիմա ան ալ կը սորվի ‘խաղաղութիւն փնտռել եւ անոր ետեւէն երթալ’։

Եհովայի խաղաղութիւնը շատերուն կեանքը փրկած է, ինչպէս փաստուեցաւ նախկին Խորհրդային Միութեան մէջ ծնած նախկին մարզիկի մը պարագայով։ Այս մարդը Ողիմպիական խաղերու մէջ շքանշաններ շահած էր, բայց յուսախաբութիւնը զինք թմրեցուցիչի ու խմիչքի մղեց։ Արկածախդրութիւններով լեցուն 19 տարիներ ետք՝ մէջը ըլլալով Սիպերիոյ ճամբարի մը մէջ երեք տարի տաժանակիր աշխատանքի դատապարտութիւնը, նաւու մը մէջ թաքցուած դէպի Գանատա ճամբորդութիւն մը եւ թմրեցուցիչի սովորութեան պատճառաւ երկու անգամ մահուան սեմին հասնիլը՝ ան Աստուծոյ աղօթեց որ կեանքի մէջ իրական նպատակ մը գտնելու համար իրեն օգնէ։ Ռուսախօս Եհովայի Վկաներու հետ Աստուածաշունչի ուսումնասիրութիւն մը օգնեց իրեն որ իր հարցումներուն պատասխանը ստանայ։ Ներկայիս այս մարդը, միլիոնաւոր ուրիշներու նման, Աստուծոյ եւ իր անձին հետ խաղաղութիւն գտած է։

Յարութեան Յոյսը

Արդ վերադառնանք Սարայեվոյի Պոզօ եւ Հէնա Տորէմներուն։ Այս զոյգը հինգ տարեկան աղջնակ մը ունէր, որուն անունը Մակտալէնա էր։ Անցեալ Յուլիսին, երբ երեքն ալ տունէն դուրս կ’ելլէին քարոզելու երթալու համար, պայթող ռումբի մը պատճառով բոլորն ալ սպաննուեցան։ Ի՞նչ կրնայ ըսուիլ այն խաղաղութեան մասին զոր անոնք ուրիշներուն քարոզած էին։ Արդեօք իրենց կեանքերը խլող ռումբը ցոյց կու տար որ անոնց ունեցածը իրական խաղաղութիւն չէ՞ր։

Բնաւ չենք կրնար այդպէս ըսել։ Իրերու այս դրութեան մէջ, ողբերգութիւններ կը պատահին։ Մարդիկ ռումբերէ կը սպաննուին։ Ուրիշներ հիւանդութիւններէ կամ արկածներէ կը մահանան։ Շատեր ծերութեան պատճառով կը մեռնին։ Աստուծոյ խաղաղութիւնը վայելողները այս բաներէն զերծ չեն, բայց այդ պատահարներուն կարելիութիւնը զիրենք անյոյս չթողուր։

Յիսուս իր բարեկամուհիին՝ Մարթայի՝ խոստացաւ. «Ես եմ յարութիւնն ու կեանքը։ Ան որ ինծի կը հաւատայ, թէեւ մեռնի՝ պիտի ապրի»։ (Յովհաննու 11։25) Տորէմները կը հաւատային ասոր, ինչպէս՝ բոլոր Եհովայի Վկաները։ Տորէմները կը հաւատային որ եթէ մեռնէին, պիտի յարուցանուէին երկրի մը վրայ, ուր այն ատեն իրական խաղաղութիւն պիտի տիրէր։ Եհովա Աստուած «անոնց աչքերէն բոլոր արցունքները պիտի սրբէ եւ ա՛լ մահ պիտի չըլլայ։ Ո՛չ սուգ եւ ո՛չ աղաղակ եւ ո՛չ ցաւ պիտի ըլլայ ասկէ յետոյ, վասնզի առաջուան բաները անցան»։—Յայտնութիւն 21։4

Մեռնելէն ճիշդ առաջ, Յիսուս իր հետեւորդներուն ըսաւ. «Ի՛մ խաղաղութիւնս կու տամ ձեզի ... Սրտերնիդ չխռովի»։ (Յովհաննու 14։27) Մենք ուրախ ենք որ Տորէմները այդ խաղաղութիւնը ունէին եւ վստահաբար զայն լիովին պիտի վայելեն յարութեան ատեն։ Մենք ուրախ ենք բոլոր անոնց համար որոնք կը պաշտեն Եհովան, խաղաղութեան Աստուածը։ Այսպիսիները մտքի խաղաղութիւն ունին։ Անոնք Աստուծոյ հետ խաղաղութիւն կը վայելեն եւ ուրիշներու հետ խաղաղութիւն կը մշակեն։ Իսկ անոնք խաղաղ ապագայի մը վրայ վստահութիւն ունին։ Այո, ժխորային աշխարհի մը մէջ ապրելով հանդերձ, անոնք խաղաղութիւն գտած են։ Արդարեւ, բոլոր անոնք որոնք Աստուած կը պաշտեն հոգիով ու ճշմարտութիւնով, խաղաղութիւն կը վայելեն։ Կը մաղթենք որ դուք ալ այսպիսի խաղաղութիւն մը գտնէք։

[Ստորանիշ]