Վերստուգուած Հանրային Դասախօսութիւններէն Օգտուինք
1 Եհովայի Վկաներու արդի պատմութիւնը ճշգրտօրէն նկարագրուած է Առակաց 4։18–ին խօսքերով. «Արդարներուն ճամբան ծագող լոյսի պէս է, որ երթալով կը լուսաւորուի, մինչեւ կատարեալ օր ըլլայ»։
2 Ասոր հետ ներդաշնակ ըլլալով, Քրիստոնէական ժողովքը կը շարունակէ ստանալ Աստուածաշունչի ուսուցումներուն մասին այժմէական յստակացում եւ տեղեկութիւններ։ (Մատթ. 24։45-47) Հաւանաբար կրնաք ասոր մասին օրինակներ յիշել զորս նկատած էք Եհովայի Վկաներուն հետ ընկերակցելէ ի վեր։ Ժողովքային հանդիպումները, հանրային դասախօսութիւնները ներառեալ, մեզի կ’օգնեն որ քայլ պահենք ճշմարտութեան աւելցող լոյսին հետ։
3 Վերստուգուած Ուրուագիծեր. Վերջերս, Ընկերութիւնը այժմէական դարձուցած է կարգ մը հանրային դասախօսութիւններու ուրուագիծերը։ Թարմ տեղեկութիւններ աւելցուած են անոնց վրայ եւ կարեւոր կէտերը յստակացուած են։ Որպէսզի ժողովքը այս այժմէական տեղեկութիւններուն լման օգուտը քաղէ, հանրային դասախօսութիւններ ներկայացնող եղբայրները պէտք է գործածեն միայն ամենավերջին ուրուագիծերը։
4 Որպէսզի հանրային դասախօսութիւններէն մեծագոյն օգուտը ձեռք ձգէք, մտածեցէք տրուելիք դասախօսութիւններուն խորագիրներուն մասին։ Հանրային Դասախօսութեան Ժողովին ներկայ ըլլալէ առաջ, փորձեցէք վերյիշել նիւթին մասին ամենավերջին տեղեկութիւնները, գործածելով աստուածպետական աղբիւրները։ Ետքը, մինչ մտիկ կ’ընէք, ակնկալեցէք այս տեղեկութիւններուն զարգացումը։ Նոթագրեցէք այս ճշմարտութիւնները ներկայացնելու որեւէ նոր կերպ, հետագային գործածելու համար։ Ասիկա կ’երաշխաւորէ որ վերստուգուած հանրային դասախօսութիւններէն մեծագոյն օգուտը պիտի քաղէք։
5 Հանրային Դասախօսութիւնները Պէտք Է Տեղեկատուական ու Յորդորիչ Ըլլան. Երբ Յիսուս խօսեցաւ, իր ունկնդիրներուն սրտերուն հասաւ։ Յիսուսի Լերան Քարոզին վերջաւորութեան, ամենահամբաւաւոր հանրային դասախօսութիւնը որ տրուած է, կը կարդանք Մատթէոս 7։28–ին մէջ. «Ժողովուրդը կը զարմանար անոր վարդապետութեանը [ուսուցանելու կերպին (ՆԱ)] վրայ»։
6 Յիսուսի օրինակը ի մտի ունենալով, երէցներու մարմինները պէտք է լաւ դատողութիւն գործածեն երբ նոր հանրային դասախօսներ պիտի ընդունին, նշանակելով միայն այն եղբայրները որոնք ընտիր ուսուցանողներ են, որոնք Ընկերութեան ուրուագիծերուն սերտօրէն պիտի կառչին եւ որոնք կրնան ունկնդիրներուն ուշադրութիւնը պահպանել։ Հանրային դասախօսութիւններ ներկայացնելու առանձնաշնորհումը ունեցող եղբայրները պէտք է յարատեւ ջանան իրենց դասախօսելու կարողութիւնը բարելաւել, ընդունելով երէցներուն տուած խրատը եւ թելադրութիւնները։
7 Ինչպէս որ գուշակուած է Եսայեայ 65։13, 14–ին մէջ, Աստուծոյ ժողովուրդին հոգեւոր բարգաւաճումը կը շարունակէ աւելի բացայայտ ըլլալ։ Հանրային դասախօսութիւններու կարգադրութիւնը շատ մը կերպերէն մէկն է որով ‘Եհովայէ կը սորվինք’։—Եսայ. 54։13