Ուրիշներու Հանդէպ Նկատառութիւն Ցոյց Տանք—Մաս Բ
1 Որքան որ տրամաբանօրէն կարելի է, կ’ուզենք լաւ յարաբերութիւն մը պահպանել մեր համայնքին մէջ եղող մարդոց հետ։ Ասիկա կը պահանջէ որ անոնց իրաւունքներուն ու զգացումներուն հանդէպ նկատառութիւն ու յարգանք ցոյց տանք։
2 Եհովայի Վկաները ճանչցուած են իրենց նրբավարութեան համար։ Մեր քաղաքավարութեան չափանիշը շրջակայքին, դպրոցին եւ գործատեղին մէջ, ինչպէս նաեւ մեր համաժողովներուն մէջ, շատ մը նպաստաւոր մեկնաբանութիւններու նիւթը եղած է։—Տես Դիտարանի 1 Օգոստոս 1989–ի թիւը, էջ 20։
3 Լաւ վարքը, անշուշտ, կը պարփակէ շատ բաներ, ինչպէս՝ պարկեշտութիւն, ժրաջանութիւն եւ քաղաքավարութիւն։ Անիկա նաեւ կը պարփակէ յարգող ըլլալ մեր Թագաւորութեան Սրահին շուրջ բնակողներուն։ Մեր բարեպաշտ վարմունքը ուրիշ մարզերու մէջ կրնայ անտեսուիլ եթէ թերանանք նկատառու ըլլալ մեր դրացիներուն հանդէպ։ Պօղոս մեզ յորդորեց որ «աւետարանին ինչպէս կը վայլէ՝ այնպէս վարու[ինք]»։—Փիլ. 1։27
4 Ժամանակ առ ժամանակ, որոշ Թագաւորութեան Սրահներու մօտ բնակողներ դժգոհութիւն արտայայտած են այն բաներուն պատճառաւ զորս սեպած են նկատառութեան պակաս ժողովներուն յաճախողներուն կողմէ։ Եղբայրները եւ քոյրերը պէտք է խուսափին Թագաւորութեան Սրահին դիմաց մայթին վրայ հաւաքուելէ եւ վառվռուն խօսակցութիւններ ընելէ որոնք կրնան լսուիլ մօտակայ տուներէն։ Երախաներուն պէտք չէ թոյլ տալ որ վազեն Թագաւորութեան Սրահէն ներս եւ դուրս։ Անհոգօրէն ինքնաշարժին դռները ուժգին կերպով գոցելը կամ փողը հնչեցնելը կրնան շրջակայքը խանգարել։ Այս տեսակ վարմունք մը աննպաստ կերպով կ’ազդէ ժողովքին։ Նաեւ, կարեւոր է որ երթեւեկի բոլոր օրէնքները պահենք երբ ինքնաշարժ կը վարենք շրջանին մէջ։—Հռովմ. 13։1, 2, 5
5 Ինքնաշարժները պէտք չէ կեցնել ուր որ սեփական ստացուածք է կամ այնպիսի տեղեր ուր երթեւեկին արգելք կը հանդիսանան կամ կառուղին կը գոցեն։ Կարելի է օգտագործել մօտակայ առեւտրական հաստատութիւններուն գործածած փարկինգը իրենց յաճախորդներուն համար միայն արտօնութիւն առնելէ ետք։ Երբ երեք կամ չորս ժողովքներ նոյն Թագաւորութեան Սրահը կը գործածեն, գրեթէ շաբթուան իւրաքանչիւր օրը ժողով կ’ըլլայ, եւ ասիկա կը պահանջէ սերտ համագործակցութիւն երէցներու մարմիններուն միջեւ։—Տես Դիտարանի 1 Հոկտեմբեր 1988–ի թիւը, էջ 17, պարբերութիւն 13։
6 Աստուածաշունչը մեզ կը յորդորէ որ «ամէն բան Աստուծոյ փառքին համար» ընենք, եւ ասիկա կը պարփակէ դրսեցիներուն հանդէպ նկատառութիւն ցոյց տանք։ (Ա. Կորն. 10։31-33) Եթէ ‘ուրիշներու շահը փնտռենք’, առանց արտօնութեան պիտի չգործածենք անոնց ստացուածքը։ (Փիլ. 2։4) Նաեւ պիտի խուսափինք տեղական վաճառականներուն առեւտրական գործունէութեան արգելք հանդիսանալէ։
7 Ուրիշներու հանդէպ նկատառութիւն ցոյց տալը՝ ժողովքէն ներս եւ դուրս՝ մեր սրտին զգացումներուն արտաքին արտայայտութիւն մըն է։ Ինչ որ կ’ընենք ու կ’ըսենք պէտք է ապացուցանէ թէ ‘մեր դրացիները կը սիրենք մեր անձին պէս’։—Մատթ. 7։12. 22։39