Եհովայի Կողմէ Քննուիլ—Ինչո՞ւ Օգտակար Է
1 Ամէն ոք կը փափաքի լաւ առողջութիւն ունենալ։ Անիկա կեանքը ա՛լ աւելի հաճոյալի կը դարձնէ։ Սակայն, լաւ առողջութիւն վայելողներէն շատեր ժամանակ առ ժամանակ կը քննուին։ Ինչո՞ւ։ Անոնք կ’ուզեն երեւան հանել որեւէ հիւանդութիւն որ զարգանալու վրայ է, որպէսզի պէտք եղած քայլերը առնեն դարմանումի համար։ Շատ աւելի կարեւոր է պահպանել մեր հոգեւոր առողջութիւնը։ Եհովայի հաճութիւնը կախեալ է մեր ‘հաւատքին մէջ առողջ’ մնալէ։—Տիտ. 1։13
2 Հիմա յարմար ժամանակ մըն է Եհովայի կողմէ քննուելու։ Ինչո՞ւ։ Որովհետեւ Եհովա իր սուրբ տաճարին մէջ է եւ բոլոր մարդոց սրտերը կը քննէ։ (Սաղմ. 11։4, 5. Առ. 17։3) Դաւիթի նման, Եհովայէ կը խնդրենք որ մեզ ամբողջական քննութեան մը ենթարկէ. «Ո՛վ Տէր, զիս փորձէ ու քննէ, փորձէ իմ երիկամունքներս ու սիրտս»։—Սաղմ. 26։2
3 Պէտք է զգուշանանք մեր հոգեւոր առողջութեան սպառնացող վտանգներէն, որոնք կրնան մեր ներսիդէն ծագիլ մեր անկատար մարմնին պատճառաւ։ Առակաց 4։23–ը կը խրատէ. «Ամէն զգուշութիւնով քու սիրտդ պահէ, քանզի կեանքի աղբիւրները անկէ են»։
4 Մեզ շրջապատող ապականած, անբարոյ աշխարհն ալ կը սպառնայ մեր հոգեւոր առողջութեան։ Եթէ մենք մեզի թոյլ տանք որ շատ մօտենանք այս ամբարիշտ դրութեան, կը սկսինք անոր պէս մտածել եւ աշխարհային կեցուածքներ զարգացնել։ Կամ, թերեւս աշխարհային ապրելակերպ մը կ’որդեգրենք եւ աշխարհի հոգին մեզի կը յաղթէ։—Եփ. 2։2, 3
5 Սատանան թերեւս կը գործածէ հալածանքը կամ ուղղակի հակառակութիւնը, ջանալով մեզ հոգեւորապէս քանդել։ Սակայն, շատ աւելի յաճախ, ան խորամանկօրէն կը գործածէ աշխարհային հրապոյրներ մեզ մոլորեցնելու համար։ Պետրոս կը յորդորէ մեզ որ ‘արթուն կենանք եւ հսկենք’, քանի որ Սատանան «մռնչող առիւծի պէս կը պտըտի ու կը փնտռէ թէ ո՛վ կլլէ»։ Մեզի յորդոր կը տրուի որ ‘անոր դէմ կենանք, հաւատքով հաստատուած’։—Ա. Պետ. 5։8, 9
6 Հարկ կայ որ մեր հոգեւոր առողջութիւնը պահպանենք, մեր հաւատքը զօրաւոր պահելով՝ ամէն օր զայն ամրացնելով։ Պօղոս առաքեալ կը յանձնարարէ որ շարունակաբար մեր հաւատքը փորձենք։ Ճիշդ ինչպէս որ իմաստութեամբ կը հետեւինք ատակ բժիշկի մը մեզի տուած գործնական խրատին, նաեւ Եհովայի մտիկ կ’ընենք երբ Իր հոգեւոր քննութիւնը յայտնէ խնդիր մը որ պէտք է սրբագրուի։ Ասիկա կարելի կը դարձնէ որ ‘վերաճշդուինք’։—Բ. Կորն. 13։5, 11, ՆԱ։
7 Եհովա իրապէս մեծագոյն Քննողն է։ Անոր ախտաճանաչումը միշտ ճիշդ է։ Ան ճշգրտօրէն գիտէ ինչ բանի կարիքը ունինք։ Իր Խօսքին եւ ‘հաւատարիմ ծառայ’ին միջոցաւ, ան կը դեղագրէ առողջարար հոգեւոր սննդականոն մը։ (Մատթ. 24։45. Ա. Տիմ. 4։6) Տան մէջ եւ ժողովքային հանդիպումներուն, սննդարար հոգեւոր կերակուրի այս սննդականոնով կանոնաւորապէս սնուցանուիլը մեզ կարող կը դարձնէ որ հոգեւորապէս առողջ մնանք։ Կանոնաւոր հոգեւոր մարզանքը ծառայութեան եւ Քրիստոնէական ուրիշ գործունէութիւններու մէջ, նաեւ օգտակար է։ Հետեւաբար, մենք կ’ընդունինք որ Եհովա կանոնաւոր կերպով մեզ քննէ, վստահ ըլլալով որ ան մեզ պիտի պահէ լաւագոյն հոգեւոր առողջութեան մէջ։