Նահանգային համաժողովը ոգեւորիչ կոչ մը կը հնչեցնէ. Ուրախութեամբ Եհովան Փառաբանեցէք Օրէ Օր
1 «Եթէ փողն ալ անորոշ ձայն հանէ, ո՞վ պիտի պատրաստուի պատերազմի», հարցուց Պօղոս առաքեալ։ (Ա. Կորն. 14։8) «Ուրախ Փառաբանողներ» Նահանգային Համաժողովին լսուած կոչը բարձր եւ յստա՞կ էր։ Այո, արդարեւ։ Անոր մղիչ պատգամն էր՝ ‘Եհովան փառաբանեցէք ուրախութեամբ եւ ամէն օր’։ Ձեր սիրտը այս կոչով ոգեւորուեցա՞ւ գործի լծուելու։ Համաժողովի յայտագիրը շատ մը զօրաւոր պատճառներ ներկայացուց որ Յաւիտենականութեան Թագաւորը՝ Եհովան՝ անդադար փառաբանենք։—Սաղմ. 35։27, 28
2 Ահարկու երկինքը «օրը օրին» Եհովայի փառքը կը պատմէ։ (Սաղմ. 19։1–3) Եթէ անձայն, անկենդան ստեղծուածները անդադար Եհովան կը փառաբանեն, պէտք չէ՞ մենք՝ մտացի արարածներս՝ մղուինք մեր ձայները բարձրացնելու զինք փառաբանելով ամէն ժամանակ իր անբաղդատելի յատկութիւններուն եւ իրագործումներուն համար։ Ո՞վ աւելի արժանի է մեր ուրախ փառաբանութեան քան մեր հոյակապ Ստեղծիչը։—Սաղմ. 145։3, 7
3 Օրէ Օր. Ներշնչուած սաղմոսերգուն գրեց. «Օրէ օր անոր փրկութիւնը քարոզեցէ՛ք։ Քանզի Տէրը մեծ է ու խիստ գովելի»։ (Սաղմ. 96։2, 4) Ասիկա միայն ռահվիրաներո՞ւն կը կիրարկուի։ Ո՛չ։ Ասիկա կը նշանակէ՞ թէ բոլորս ալ պէտք է ուրիշներու խօսինք Եհովայի մասին երբոր կրնանք եւ ուր որ կրնանք, նոյնիսկ այն օրերը երբ տունէ–տուն ծառայութեան չենք մասնակցիր։ Այո։ Ամէն օր Եհովան փառաբանելու եւ իր փրկութեան միջոցին մասին ուրիշներու պատմելու կարիքը ստիպողական է։ Մարդիկ պէտք է գիտնան թէ Եհովա է Յաւիտենական Թագաւորը եւ թէ Ան աշխարհի իշխանութիւնը Իր փառաւորուած Որդւոյն՝ Յիսուս Քրիստոսի՝ տուած է։ Եհովայի եւ մարդոց հանդէպ մեր սէրը պիտի ձգէ որ շարունակենք խօսիլ այս պատգամին մասին եւ փրկութեան համար Իր ըրած հայթայթումներուն մասին, ուր որ ալ մարդիկ գտնուին։—Սաղմ. 71։15
4 Իր երկրային ծառայութեան իւրաքանչիւր օրը, Յիսուս Քրիստոս ամենէն ընտիր օրինակը հանդիսացաւ որպէս Եհովայի համարձակ փառաբանող մը։ Ան ըսաւ. «Շնորհակալ եմ քեզմէ [հրապարակաւ քեզ կը փառաբանեմ (ՆԱ)], ո՛վ Հայր, Տէր երկնի եւ երկրի»։ (Մատթ. 11։25) Իր խօսքին հետ ներդաշնակ գործելով, Յիսուս՝ ուր որ ալ ըլլար՝ հրապարակաւ Եհովան կը փառաբանէր։ Իսկ ուր որ ալ ամբոխներ հաւաքուէին—ըլլայ ժողովարաններուն մէջ, Երուսաղէմի տաճարին մէջ, լերան մը վրայ կամ ծովեզերքը—ան Եհովան կը փառաբանէր։ Եթէ սերտօրէն Յիսուսի քայլերուն հետեւինք, հրապարակաւ Եհովան փառաւորելու՝ առօրեայ, հաստատ գործունէութիւն մը պահպանելով, պիտի վայելենք ուրախ, բերկրալի արդիւնքներ։
5 Կոչին Ընդառաջել. Ամէն օր Եհովան հրապարակաւ փառաբանելու կոչին պիտի ընդառաջէ՞ք։ Յիշեցէք որ տարիքը խոչընդոտ մը չէ։ Սաղմոս 148։12–ը կը հրաւիրէ երիտասարդները, կոյս աղջիկները, ծերերը եւ տղաքները որ Եհովան փառաբանեն։ Ո՛վ պատանիներ, Եհովան պիտի փառաբանէ՞ք դասընկերներու եւ ուսուցիչներու դիմաց, այս նոր դպրոցական տարեշրջանին ընթացքին։ Ո՛վ չափահասներ, ձեր գործատեղին մէջ ձեր գործակիցները կը լսե՞ն Եհովայի եւ իր նպատակներուն մասին, երբ խօսակցելու յարմար առիթ մը ըլլայ։ Բոլորս ալ պէտք է Եհովայի մասին խօսիլը մեր կեանքին մէկ մասը ընենք, ինչպէս որ է՝ շնչելը եւ ուտելը։ Նոյնիսկ եթէ անտարբեր մարդիկ մեր ըսածին ուշադրութիւն չընծայեն, Մէկը կայ որ ուշադրութիւն կ’ընծայէ եւ մեզ պիտի վարձատրէ։—Մաղ. 3։16
6 Մինչ դրութեան վախճանը կը մօտենայ, կոչը երկրագունդին չորս կողմը կ’երթայ. «Եահը փառաբանեցէք»։ (Սաղմ. 106։1, ՆԱ) Թող որ մեր փառաբանութեան աղաղակը երթալով աւելի բարձրանայ ամէն օր, այնպէս որ ամէնքն ալ գիտնան թէ Ան՝ որուն անունը Եհովա է՝ Բարձրեալ է բոլոր երկրի վրայ։—Սաղմ. 83։18