Ամէն Բան Աստուծոյ Փառքին Համար Ըրէք
1 Որքա՜ն թարմացուցիչ է ընկերակցիլ մեր սիրելի եղբայրներուն եւ քոյրերուն հետ։ (Ա. Կորն. 16։17, 18) Մենք ասիկա կ’ընենք ժողովներուն, շրջանային համաժողովներուն, նահանգային համաժողովներուն եւ դաշտի ծառայութեան մէջ։ Նաեւ կ’ընկերակցինք անպաշտօն առիթներով, ինչպէս՝ երբ հիւրեր կ’ունենանք մեր տան մէջ։ Այսպէս ընելով, հիւրասիրութիւն կը ցուցաբերենք եւ զիրար կը քաջալերենք։ (Հռովմ. 12։13. Ա. Պետ. 4։9) Երբ հարսանեկան խնճոյքներ կը կարգադրէք, ի մտի ունեցէք տրուած ընտիր խրատները Դիտարան Յունուար 1, 1985–ի թիւին մէջ։
2 Կազմակերպուած Ընկերային Զբաղումներ. Մենք ‘թէ՛ ուտենք, թէ՛ խմենք եւ թէ ի՛նչ գործ որ ընենք’, պէտք է ‘ամէն բան Աստուծոյ փառքին համար ընենք’։ (Ա. Կորն. 10։31–33) Ոմանք այս խրատը չեն գործադրեր, եւ խնդիրներ կը շարունակուին ծագիլ այն ընկերային հաւաքոյթներու պատճառաւ որոնք այնքան մեծ են որ պատշաճօրէն չեն վերահսկուիր։ Կարգ մը պարագաներուն, հարիւրաւոր մարդիկ հրաւիրուած են խնամքով պատրաստուած ընկերային հաւաքոյթի, ուր աշխարհային զբօսանքներ ներկայացուած են։ Երբեմն ներկայ եղողներէն խնդրուած է մուտքի սակ վճարել կամ ուրիշ վճարումներ ընել։ Այսպիսի հաւաքոյթներ սերտօրէն կը նմանին աշխարհային գործառնութիւններուն, որոնց հոգին ներդաշնակ չէ վայելչութեան եւ Աստուածաշունչի սկզբունքներուն հետ։—Հռովմ. 13։13, 14. Եփ. 5։15–20
3 Տեղեկագրուած է որ մեծ թիւով Վկաներ հաւաքուած են վարձուած սրահներու մէջ, ուր զբօսանքը ապառողջ եւ աշխարհային է եւ ուր պատշաճ վերահսկողութիւն չկայ։ Նոյնանման գործունէութիւններ, որոնք որպէս «Եհովայի Վկաներ»ու շաբաթավերջ ծանուցանուած են, տեղի ունեցած են պանդոկներու եւ զբօսարաններու մէջ։ Քանի որ դժուար է պատշաճօրէն վերահսկել այսպիսի մեծ խումբեր, խնդիրներ ծագած են։ Երբեմն արդիւնքը եղած է խռովութիւն, ոգելից ըմպելիներու չափազանց գործածութիւն եւ նոյնիսկ անբարոյութիւն։ (Եփ. 5։3, 4) Այն ընկերային հաւաքոյթները ուր այսպիսի վերաբերմունք տեղի կ’ունենայ, Եհովան չեն պատուեր։ Փոխարէն, անոնք ժողովքին բարի անուան նախատինք կը բերեն եւ ուրիշներ կը գայթակղեցնեն։—Ա. Կորն. 10։23, 24, 29
4 Քրիստոնեաներուն քաջալերութիւն տրուած է որ հիւրասիրութիւն ցուցաբերեն, բայց շեշտը պէտք է դրուի հոգեւոր փոխանակումի վրայ։ (Հռովմ. 1։11, 12) Փոքր հաւաքոյթները սովորաբար լաւագոյնն են։ Մեր Ծառայութիւնը գիրքը, էջեր 135–6–ի մէջ, կ’ըսէ. «Երբեմն մի քանի ընտանիքներ տուն մը կը հրաւիրուին Քրիստոնէական ընկերակցութեան համար։ . . . Տրամաբանօրէն, հիւրընկալները այս պարագաներուն պէտք է անձնապէս պատասխանատու զգան տեղի ունեցածին նկատմամբ։ Ասիկա ի մտի ունենալով, զատորոշող Քրիստոնեաներ այսպիսի խմբակներու չափը եւ հաւաքոյթներու տեւողութիւնը սահմանափակելու իմաստութիւնը նկատած են»։ Յիսուս ցոյց տուաւ թէ մեծ խնամքով պատրաստուած բաներու կարիքը չկայ երբ մեր նպատակակէտն է քաջալերել մեր բարեկամները հոգեւոր գետնի վրայ։—Ղուկ. 10։40–42
5 Ընտիր բան մըն է հիւրասիրութիւն ցուցաբերել Քրիստոնեայ ընկերակիցներու։ Սակայն, մեծ տարբերութիւն կայ մեր տան մէջ համեստ հաւաքոյթի մը եւ վարձուած սրահի մը մէջ աշխարհային հոգին ցոլացնող ճոխ հաւաքոյթի մը միջեւ։ Երբ ուրիշներ կը հրաւիրէք, պէտք է վստահ ըլլաք թէ կրնաք լման պատասխանատուութիւն վերցնել տեղի ունեցածին համար։—Տես Դիտարան Նոյեմբեր 1, 1992–ի թիւը, էջեր 23–26։
6 Իրապէս Եհովա մեզ օրհնած է եղբայրակցութեամբ մը, որմէ թարմացուցիչ քաջալերութիւն կը քաղենք որ մեզ կը մղէ բարի գործերուն մէջ յարատեւելու։ (Մատթ. 5։16. Ա. Պետ. 2։12) Ընկերային գործունէութիւններու մէջ համեստութիւն եւ բանաւորութիւն յայտնաբերելով, մենք միշտ մեր Աստուծոյն փառք պիտի բերենք եւ ուրիշներու կերտիչ պիտի ըլլանք։—Հռովմ. 15։2