Համայն Աշխարհի Մէջ Յիսուսի Մահուան Յիշատակատօնը
1 Եհովա մեզ ողողած է բազմաթիւ պարգեւներով։ Իր բարութիւնն ու քաղցրութիւնը վառ կերպով նկարագրուած են որպէս՝ «անոր անպատում պարգեւ»ը։ Այո, Աստուծոյ «շնորհքը» այնչափ սքանչելի է, որ մեր նկարագրելու կարողութենէն վեր է։—Բ. Կորն. 9։14, 15
2 Իր Մեծագոյն Պարգեւը. Որպէս մարդկութեան Փրկիչը, Յիսուս Քրիստոս մեծագոյն պարգեւն է։ Իր մեծ սէրը արտայայտելով մարդկային աշխարհին հանդէպ, Եհովա իր սիրելի ու միածին որդին տուաւ։ (Յովհ. 3։16) Աստուծոյ կողմէ այսպիսի օրհնութիւն մը, որու արժանի չենք, համայն աշխարհի մէջ յիշատակուելու արժանի է։ Ե՞րբ եւ ի՛նչպէս։ Հինգշաբթի՝ 1 Ապրիլ 1999–ի երեկոյեան, Քրիստոնեաները համայն աշխարհի մէջ, Տէրունական Ընթրիքը պիտի տօնակատարեն, մեծագոյն զոհը յիշատակելով։—Ա. Կորն. 11։20, 23-26
3 Քրիստոս մեզի համար մեռաւ «երբ դեռ մեղաւոր էինք»։ Անձնապէս մեր գնահատութիւնը ցոյց կու տանք, իր մահուան Յիշատակատօնը պահելով եւ այս շատ կարեւոր առիթին ուրիշներ ալ հրաւիրելով։—Հռովմ. 5։8, 9
4 Ամենակարեւոր Եղելութիւնը. Քրիստոսի մահը յիշատակելը գլխաւորաբար աչքառու կը դարձնէ այն իրողութիւնը թէ ան Աստուծոյ գերիշխանութիւնը անթերիօրէն ջատագովեց։ Անիկա նաեւ մեզի կը յիշեցնէ որ կրնանք մաքուր կեցուածք մը ունենալ Եհովայի առջեւ, հաւատք ի գործ դնելով Յիսուսի զոհագործութեան վրայ, այսպիսով մեր փրկութիւնը երաշխաւորուած կ’ըլլայ։ (Գործք 4։12) Իրապէս ասիկա տարուան կարեւորագոյն եղելութիւնն է։
5 Մեր ընկեր արարածներուն հանդէպ սէր ցուցաբերած կ’ըլլանք, զանոնք հրաւիրելով որ մեզի հետ Տիրոջ Ընթրիքին ներկայ ըլլան։ Փրկանքին օգուտները տակաւին մատչելի են այն միլիոնաւորներուն, որոնք կը սորվին անոր գերազանց արժէքին մասին։ (Փիլ. 3։8) Անոնք որոնք հաւատք ի գործ կը դնեն Քրիստոսի զոհագործութեան վրայ, կրնան ձեռք ձգել յաւիտենական կեանքի հաստատ յոյսը։—Յովհ. 17։3
6 Յիշատակատօնի ժամանակաշրջանը, Աստուծոյ շնորհքին հանդէպ մեր գնահատութիւնը ցոյց տալու մասնաւոր պատեհութիւն մը կու տայ մեզի։ Ասիկա սքանչելի առիթ մըն է, որ նախանձախնդրաբար Աստուծոյ Թագաւորութեան բարի լուրի քարոզչութեան մասնակցինք։ Մեծ օգուտներ կը սպասեն անոնց, որոնք աղօթքով կը խորհրդածեն Եհովայի աննկարագրելի ձրի պարգեւին մասին եւ կարգադրութիւններ կ’ընեն որ ներկայ ըլլան այս տարուան Տիրոջ Ընթրիքի տօնակատարութեան։