Մասնաճիւղին Նամակը

Թագաւորութեան սիրելի հրատարակիչներ,

«Տէրոջը կամքը թող ըլլայ»։ (Գործք 21։14) Երկուշաբթի 26 Դեկտեմբեր 2005–ին, Կառավարիչ Մարմինի եւ Մասնաճիւղի Յանձնախումբի անդամներուն կողմէ այս բնաբանով ելոյթաշար մը ներկայացուեցաւ Միացեալ Նահանգներու Պէթէլի ընտանիքին։ Դասախօսութիւնները նշեցին թէ մասնաճիւղի կարգ մը գործունէութիւնները աւելի պարզ դառնալով, Պէթէլականներէն ոմանք Միացեալ Նահանգներու դաշտին մէջ զանազան նշանակումներ պիտի ստանան, ուր պիտի կարենան իրենց ստացած ընտիր մարզումը մեծապէս օգտագործել։

Բարելաւուած արուեստագիտութիւնը աւելի արդիւնաբեր դարձուցած է մեր առաքման ու տպագրութեան դիւրութիւնները, նուազեցնելով կամաւորներու կարիքը Պէթէլի մէջ։ Միւս կողմէ, «հունձքին» համար յաւելեալ «մշակներ»ու մեծ կարիք կայ։ (Ղուկ. 10։2) Կառավարիչ Մարմինի մէկ անդամը նշեց. «Կրնանք մեր հրատարակութիւններուն համար տպագրամեքենաներ գնել, բայց մեքենաները բարի լուրը չեն կրնար քարոզել»։ Հետեւաբար, Պէթէլի մարզումէն օգտուած փորձառու եղբայրներ ու քոյրեր սկսած են նշանակուիլ դաշտին մէջ, ուր մեծապէս պիտի նպաստեն քարոզչութեան ու աշակերտելու գործին։ Միացեալ Նահանգներու մասնաճիւղի թաղամասին մէջ գտնուող կարգ մը ժողովքներ, անոնց մատուցած օգնութենէն պիտի օգտուին։

Վստահ ենք որ Եհովա առատապէս պիտի օրհնէ այս ճշդումները, որոնց նպատակն է հաւասարակշռութիւն պահել հաւատարիմ Պէթէլականներու կարիքին եւ դաշտին կարիքներուն միջեւ։

Ձեր եղբայրները՝

Մ.Ն. Մասնաճիւղ