Ցարդ աշխարհի տեսած մեծագոյն քարոզչական արշաւը
Աւելի քան 100 տարիէ ի վեր, Եհովայի Վկաները կազմակերպուած են բարի լուրը տարածելու համար։ (Ա. Կորն. 9։23) Ասիկա ցարդ աշխարհի տեսած մեծագոյն քարոզչական արշաւն է, քանի որ պատգամը հարիւրաւոր լեզուներով կը քարոզենք՝ աւելի քան 230 երկիրներու մէջ։ (Մատթ. 24։14) Սակայն այս գործը ինչո՞ւ անհրաժեշտ է։ Անիկա ի՞նչպէս կը կատարուի համայն աշխարհի մէջ։
Եհովայի Վկաները կազմակերպուած են՝ բարի լուրը քարոզելու պատկերիզը վերոնշեալ հարցումներուն կը պատասխանէ, մեր համաշխարհային գործին բազմաթիւ երեսակներուն մասին մանրամասնութիւններ հայթայթելով։ Մինչ զայն կը դիտես, նկատի առ հետեւեալ հարցումները. (1) Մեր գործունէութիւնը ի՞նչպէս կազմակերպուած եւ առաջնորդուած է։ (2) Գրական Բաժանմունքը, Թարգմանութեան Սպասարկութեանց Բաժանմունքը, Գեղարուեստական Բաժանմունքը եւ Լսատեսողական Սպասարկութեանց Բաժանմունքը ի՞նչպէս կը նպաստեն բարի լուրը ուրիշներուն հաղորդելու։ (3) Տպագրութեան ու առաքման ընդարձակ գործողութիւններուն նպատակը ի՞նչ է։ (Յովհ. 17։3) (4) Մէկ տարուան մէջ տպուած հրատարակութիւններուն քանակը ի՞նչ է։ (5) Աստուածաշունչի վրայ հիմնուած մեր հրատարակութիւնները ի՞նչ իրագործած են։ (Եբր. 4։12) (6) Տեսողութեան ու լսողութեան տկարութիւն ունեցողներուն հոգեւոր օգնութիւն տալու համար ի՞նչ քայլեր կ’առնուին։ (7) Մեր գործը ի՞նչպէս կը ֆինանսաւորուի։ (8) Հիւանդանոցներու Տեղեկատու Սպասարկութեան, Ծառայութեան Բաժանմունքի եւ Նահանգային Համաժողովի Բաժանմունքի աշխատանքներէն ի՞նչպէս կ’օգտուինք։ (9) Որպէս Եհովայի Վկայ, պատկերիզը դիտելէ յետոյ ի՞նչպէս այժմ աւելի կը գնահատես (ա) բարի լուրը քարոզելու համար Եհովայի կազմակերպութեան թափած ջանքերը։ (բ) աշխարհի չորս կողմը գտնուող աւելի քան 100 Պէթէլի ընտանիքները։ (գ) տեսուչներուն եւ միսիոնարներուն տրուած կրթական մարզումը։ (դ) ամէն օր համար մը նկատի առնելու եւ ամէն շաբաթ ժողովները պատրաստելու կարեւորութիւնը։ (ե) մեր քրիստոնէական ժողովներուն ներկայ գտնուելու օգուտները։ (զ) մօտալուտ երկրային Դրախտը։ (Եսա. 11։9) (է) ներկայ հունձքի գործին մասնակցիլը։—Յովհ. 4։35
Ի՞նչ ընդառաջում նկատեցիր, երբ պատկերիզը ցոյց տուիր ազգականներուդ, ծանօթներուդ, վերայցելութիւններուդ եւ Աստուածաշունչի աշակերտներուդ։ Կրնա՞ս պատկերիզն ու բարի լուրը շուտով բաժնել ուրիշ մէկու մը հետ։—Մատթ. 28։19, 20