Նոր տեսաերիզ՝ Աստուածաշունչի ուսումնասիրութիւններ սկսելու համար
Ինչո՞ւ Աստուածաշունչը ուսումնասիրել խորագրով կարճ տեսաերիզ մը մեր կայքին միջոցաւ (jw.org) հսկայ թիւով մարդոց կը հասնի։ Անիկա ծրագրուած է հետաքրքրուած անհատները մղելու որ Աստուածաշունչի ձրի ուսումնասիրութիւն մը ընդունին։ Զայն կրնաս դիտել՝ ընտրելով «Աստուածաշունչի ուսումնասիրութիւն մը խնդրել» նիւթը, որ կը գտնուի մեր կայքին գլխաւորին էջին վարը կամ տեսածրելով ծածկագիրը՝ որ իւրաքանչիւր նոր թերթիկի վերջաւորութեան կը գտնուի։ Այս տեսաերիզը լաւագոյնս գործածելու համար, նկատի առնենք կարգ մը կերպեր։
• Երբ վերայցելութիւն կ’ընես, տանտիրոջ ըսէ. «Կրնա՞մ ձեզի ցոյց տալ կարճ տեսաերիզ մը, որ կը բացատրէ թէ ինչպէ՛ս կրնաք ձեր սուրբ գրային հարցումներուն պատասխանները առնել»։ Եթէ համաձայնի, հեռախօսիկիդ կամ իր համակարգիչին մէջէն տեսաերիզը դիտել տուր։
• Անպաշտօն կամ հանրային ծառայութեան ընթացքին, երբ նոր թերթիկներէն մէկը կը տեղաւորես, անհատին ցոյց տուր ծածկագիրը եւ զինք քաջալերէ, որ իր հեռախօսիկին միջոցաւ զայն տեսածրէ։ Քանի որ բազմաթիւ լեզուներու մէջ ծածկագիրը ուղղակի անհատին կը ցուցնէ մեր կայքին մէջ դրուած տեսաերիզը, կրնաս տեղւոյն վրայ հեռախօսիկէդ զայն դիտել տալ։
• Գործակիցներուդ, դպրոցակիցներուդ, ազգականներուդ եւ ուրիշ ծանօթներու պատմէ տեսաերիզին մասին, եւ առաջարկէ որ զայն իրենց ցոյց տաս։ Կամ, տեսաերիզը ել–մակով իրենց ուղարկէ եւ քաջալերէ որ զայն առանձին դիտեն։
Այս նոր կարգադրութեան միջոցաւ, կրնանք ա՛լ աւելի Աստուածաշունչի ուսումնասիրութիւններ սկսիլ, հոգեւորապէս աջակցելով անոնց՝ որոնք «յաւիտենական կեանքի սահմանուած» են (Գործք 13։48)։