Յառաջդիմական քարոզիչ մը եղիր
1 Մեր երկնաւոր Հայրը կը հաճի երբ իր ծառաները հոգեւորապէս յառաջդիմեն։ Ասիկա կը պարփակէ յառաջդիմել որպէս բարի լուրի հասուն ու ազդու քարոզիչ մը։ Պօղոս, տեսուչ Տիմոթէոսը քաջալերեց որ շարունակէ ջանք թափել, որպէսզի իր յառաջդիմութիւնը ամենուն յայտնի ըլլայ։ (Ա. Տիմ. 4։13-15) Բոլորս ալ պէտք է ջանանք մեր ծառայութեան որակը բարելաւել, նոյնիսկ եթէ փորձառու հրատարակիչներ ենք։
2 Անձնական նպատակակէտեր դիր. Յառաջդիմելը կը պահանջէ անձնական նպատակակէտեր դնել։ Ի՞նչ կարգ մը նպատակակէտեր կրնանք դնել։ Կրնանք փորձել աւելի հմտանալ մեր հոգեւոր սուրը՝ Աստուածաշունչը գործածելու մէջ։ (Եփ. 6։17) Թերեւս ծառայութեան երեսակ մը կայ որ պէտք է բարելաւենք, ինչպէս՝ փողոցի վկայութիւնը, հեռախօսով կամ առեւտրական թաղամասի մէջ վկայելը։ Թերեւս կրնանք ջանալ աւելի ազդու վերայցելութիւններ ընել։ Ուրիշ հոյակապ նպատակակէտ մը կրնայ ըլլալ՝ Աստուածաշունչի ուսումնասիրութիւններ սկսելու եւ վարելու մեր կարողութիւնը բարելաւել։
3 Հայթայթումներ. Ժողովքային հանդիպումները, յատկապէս Աստուածպետական Ծառայութեան Դպրոցը եւ Ծառայութեան Ժողովը, ծրագրուած են մեզի օգնելու, որ իբրեւ քարոզիչներ յառաջդիմենք։ Այս ժողովները պատրաստելու եւ անոնց ներկայ գտնուելու, նաեւ հոն տրուած թելադրութիւնները կիրարկելու համար ո՛րքան աւելի ջանք թափենք, ա՛յնքան աւելի շատ օգուտներ պիտի քաղենք։—Բ. Կոր. 9։6
4 Յառաջդիմելու համար նաեւ իրարու պէտք է օգնենք։ (Առ. 27։17) Ծառայութեան մէջ մեզի ընկերակցող անհատին ներկայացումը ուշադրութեամբ մտիկ ընելը, մեր բարելաւման պիտի նպաստէ։ Ասկէ զատ, մեր գիրքի ուսումնասիրութեան տեսուչը կրնայ կարգադրութիւն ընել որ մէկը անհատապէս մեզի օգնէ։ Ի՜նչ օրհնութիւն է երբ փորձառու ռահվիրայ մը կամ այլ հրատարակիչ մը մեզի կ’օգնէ ծառայութեան մէջ աւելի արդիւնաբեր եւ աւելի ուրախ ըլլալու։ Ձեր գրքի ուսումնասիրութեան մէջ նորեկ հրատարակիչ մը կա՞յ։ Թերեւս կրնանք նախաձեռնութիւնը առնել զինք հրաւիրելու որ մեզի հետ ծառայէ։
5 Ներկայիս տեղի ունեցող ամենակարեւոր գործունէութիւնը քրիստոնէական ծառայութիւնն է։ Երբ Եհովայի «օրհնութեան պատարագ» կը մատուցանենք, կ’ուզենք մեր լաւագոյնը տալ իրեն։ (Եբր. 13։15) Եթէ ճիգ թափենք ծառայութեան մէջ յառաջդիմական ըլլալու, պիտի ըլլանք ‘այնպիսի բանուոր մը, որ պիտի չամչնայ ճշմարտութեան խօսքը շիտակ բացատրելու’։—Բ. Տիմ. 2։15