Նորեկները ինչպէ՛ս մարզել որ քարոզեն
1. Ի՞նչ զգացիր, երբ առաջին անգամ ծառայութեան մասնակցեցար։
1 Կը յիշե՞ս առաջին անգամը, որ տունէ տուն ծառայութեան մասնակցեցար։ Հաւանաբար շատ ջղագրգիռ էիր։ Եթէ Աստուածաշունչի ուսումնասիրութիւնդ վարողին կամ այլ հրատարակիչի մը հետ կը քարոզէիր, անկասկած անոր մատուցած աջակցութեան համար ուրախ էիր։ Հիմա որ փորձառու քարոզիչ մըն ես, ի վիճակի ես նորեկները մարզելու, որ քարոզեն։
2. Նոր հրատարակիչները ի՞նչ պէտք է սորվին։
2 Նոր հրատարակիչները պէտք է սորվին, թէ ինչպէ՛ս տանտիրոջ հետ խօսակցութիւն մը սկսին, դրան առջեւ Աստուածաշունչը գործածեն, վերայցելութիւններ ընեն, եւ Աստուածաշունչի ուսումնասիրութիւններ սկսին ու վարեն։ Անոնք նաեւ պէտք է սորվին, թէ ինչպէ՛ս քարոզչութեան զանազան մարզերուն մասնակցին, ինչպէս՝ փողոցի վկայութիւնը եւ առեւտրական թաղամասերու մէջ մարդոց վկայելը։ Անոնց կրնաս օգնել բարելաւուելու, թէ՛ օրինակովդ եւ թէ թելադրութիւններովդ։
3. Ինչպէ՞ս կրնանք մեր օրինակով ուրիշներուն օգնել։
3 Օրինակով սորվեցուր։ Յիսուս իր աշակերտներուն ցոյց տուաւ ինչպէ՛ս քարոզել (Ղուկ. 8։1. Ա. Պետ. 2։21)։ Երբ կը ծրագրես նորեկ հրատարակիչի մը հետ քարոզել, պատրաստէ պարզ ներկայացում մը, զոր հրատարակիչը կրնայ ընդօրինակել, թերեւս գործածելով մեր հրատարակութիւններուն մէջ տրուած նմոյշ մը։ Ապա առաջարկէ որ սկիզբը դուն խօսիս դրան առջեւ, որպէսզի հրատարակիչը կարենայ լսել խօսքերդ։ Դռներուն միջեւ, կրնաս հրատարակիչէն խնդրել, որ ներկայացումիդ ազդուութեան մասին իր դիտողութիւնները տայ։ Ասիկա իրեն պիտի օգնէ, որ ծառայութեան մէջ ուրիշներու հետ աշխատելուն արժէքը տեսնէ, եւ պիտի դիւրացնէ, որ իր բացումը տալէն ետք՝ թելադրութիւնդ ընդունի։
4. Ինչպէ՞ս կրնանք նոր հրատարակիչի մը օգնել, անոր ներկայացումը մտիկ ընելէ ետք։
4 Թելադրութիւններ ներկայացուր։ Յիսուս նաեւ քարոզելու կերպին շուրջ հրահանգներ տուաւ իր աշակերտներուն (Մատ. 10։5-14)։ Նոյն մեթոտով կրնաս նոր հրատարակիչի մը օգնել։ Երբ իր խօսելու կարգը գայ, ուշադրութեամբ մտիկ ըրէ։ Դրան առջեւէն հեռանալէ ետք, մասնայատուկ եւ անկեղծ գովասանք տուր, նոյնիսկ եթէ նկատեցիր թէ իր ներկայացման որոշ մէկ երեսակը բարելաւման կարիք ունի։ Թելադրութիւն մը ներկայացնելէ առաջ, թերեւս որոշես սպասել ու տեսնել թէ յաջորդ դրան առջեւ ան ինչպէ՛ս պիտի ըլլայ այդ կէտին մէջ։ Թերեւս ան առաջին դրան առջեւ պարզապէս ջղագրգիռ էր։ Նաեւ ի մտի ունեցիր, թէ բոլոր հրատարակիչները նոյն կարողութիւնները չունին, եւ բան մը ընելու համար՝ յաճախ մէկէ աւելի կերպեր կան (Ա. Կոր. 12։4-7)։
5. Երբ նախաձեռնութիւն կ’առնենք թելադրութիւններ տալու, ի՞նչ կրնանք ըսել։
5 Երբեմն նոր հրատարակիչը ինք թելադրութիւններ կը խնդրէ։ Բայց եթէ չխնդրէ, նախաձեռնութիւնը առ իրեն օգնելու։ Ասիկա փափկանկատօրէն ինչպէ՞ս կրնաս ընել։ Կարգ մը փորձառու հրատարակիչներ պարզապէս կը հարցնեն. «Կրնա՞մ քեզի թելադրութիւն մը տալ», կամ՝ «Ըրած բացումիդ մասին ի՞նչ կը խորհիս»։ Ուրիշ ընտրանք մըն է՝ ըսել. «Երբ նոր հրատարակիչ մըն էի, ինծի համար մարտահրաւէր էր [ . . . ], բայց հետեւեալը օգտակար գտայ [ . . . ]»։ Երբեմն օգտակար է միասնաբար Պատճառաբանել գրքին դիմել։ Զինք չծանրաբեռնելու համար, իր ներկայացման միայն մէկ երեսակին մասին թելադրութիւն տուր։
6. Ծառայութեան առնչութեամբ, ինչպէ՞ս «երկաթը երկաթով կը սրուի»։
6 Երկաթը երկաթով կը սրուի։ Պօղոս քաջալերեց փորձառու աւետարանիչ Տիմոթէոսը, որ միտք դնէ սորվեցնելու եւ շարունակէ յառաջդիմել (Ա. Տիմ. 4։13, 15)։ Թէեւ կրնայ ըլլալ որ տարիներ անցած են այն օրէն, որ առաջին անգամ ծառայութեան մասնակցեցար, բայց երբեք պէտք չէ դադրիս հմտութիւններդ բարելաւելէ։ Քեզի հետ քարոզող հրատարակիչներէն սորվէ՛, նոյնիսկ եթէ ծառայութեան մէջ նուազ փորձառու են, եւ արթո՛ւն եղիր ուրիշներուն ազնուօրէն օգնելու համար, մանաւանդ նորեկներուն, որպէսզի բարի լուրի հմուտ քարոզիչներ ըլլան (Առ. 27։17)։