Ծառայութեան մէջ հմտութիւնդ բարելաւէ. Նորեկները մարզել
Ինչո՛ւ կարեւոր է։ Յիսուսի նորեկ աշակերտները պէտք է սորվին իր սորվեցուցած «բոլոր բաները» կատարել, որ կը պարփակէ ճշմարտութիւնը ուրիշներուն սորվեցնել (Մատ. 28։19, 20)։ Շատ մը նորեկներ արդէն իսկ որակեալ դարձած են Աստուածպետական ծառայութեան դպրոց արձանագրուելու, եւ թերեւս անպաշտօն կերպով վկայած են իրենց ընտանիքի անդամներուն կամ բարեկամներուն։ Սակայն, մինչ իրենց սորված բաներուն հանդէպ իրենց գնահատութիւնը կ’աւելնայ եւ կը գիտակցին թէ Եհովան կ’ուզէ որ բոլոր մարդիկ բարի լուրը լսեն, անոնք թերեւս փափաքին դաշտի ծառայութեան մասնակցիլ (Հռով. 10։13, 14)։ Երբ նորեկներուն հաւանութիւն կը տրուի որ չմկրտուած հրատարակիչներ ըլլան, լաւ մարզումը իրենց պիտի օգնէ որ իրենց հոգեւոր յառաջդիմութեան նպաստող այս կարեւոր քայլը առնելու մէջ աւելի ինքնավստահ ըլլան (Ղուկ. 6։40)։
Ինչպէ՛ս ընել։
• Նոր հրատարակիչին օգնէ որ ձեռք ձգէ քարոզելու եւ ուսուցանելու համար պէտք եղած հրատարակութիւնները։ Իրեն ցոյց տուր թէ վկայութեան պայուսակդ ինչպէ՛ս կը պատրաստես, եւ բացատրէ թէ քեզի հետ առած իւրաքանչիւր հրատարակութեան նպատակը ի՛նչ է։
• Միասնաբար ներկայացումի նմոյշ մը ընտրեցէք Մեր Թագաւորութեան ծառայութիւնը թերթիկէն եւ փորձ ըրէք։ Նորեկը քաջալերէ որ ներկայացումը իր բառերով ըսէ։ Նկատի առ Ծառայութեան դպրոց գրքէն էջ 82–ի վրայ գտնուող մատուցման կերպեր, որոնք թաղամասիդ կը յարմարին։ Շեշտէ համեստ հագուելակերպի եւ յարդարանքի կարեւորութիւնը (Բ. Կոր. 6։3, 4)։
• Յառաջդիմական մարզում տուր։ Նոր հրատարակիչին ցոյց տուր թաղամասի քարտ մը, եւ անոր սորվեցուր ինչպէ՛ս տունէ տուն վկայելու ատեն նոթագրել։ Ցուցադրէ թէ ինչպէ՛ս կարելի է հետաքրքրուած անհատներու մասին նոթեր առնել։ Անոր սորվեցուր ծառայութեան մէջ ինչպէ՛ս գործածել jw.org կայքը եւ Բարի լուր՝ բոլոր ազգերուն գրքոյկը։ Անոր օգնէ որ հետաքրքրուած անհատներուն հետաքրքրութիւնը մշակէ (Ա. Կոր. 3։6)։
• Համբերող եղիր եւ գովէ (Առ. 25։11)։ Լաւ օրինակ հանդիսացիր։ Նախանձախնդրութիւնդ եւ անձնական հետաքրքրութիւնդ դրական ազդեցութիւն պիտի ձգեն անոր վրայ յետագային։
Այս ամսուան ընթացքին, հետեւեալը փորձէ.
• Աշակերտիդ հետ տունէ տուն ծառայէ, եւ անոր տար վերայցելութեան մը կամ Աստուածաշունչի ուսումնասիրութեան մը։ Եթէ աշակերտ չունիս, նուազ փորձառու հրատարակիչի մը հետ ծառայէ։