Ծառայութեան մէջ հմտութիւնդ բարելաւէ. օգտակար ծառայակից մը ըլլալ
Ինչո՛ւ կարեւոր է։ Յիսուս ծառայակիցի մը հետ քարոզելուն արժէքին գիտակից էր։ Անոր համար է որ երբ 70 աշակերտներ իր առջեւէն ղրկեց քարոզելու, զանոնք երկու–երկու ուղարկեց (Ղուկ. 10։1, ԱԾ)։ Եթէ հրատարակիչը դժուար պարագայի առջեւ գտնուի կամ վստահ չըլլայ տանտիրոջ ինչպէ՛ս պատասխանել, ծառայակիցը կրնայ իրեն հարկ եղած աջակցութիւնը տալ (Ժող. 4։9, 10)։ Ան կրնայ թոյլ տալ որ հրատարակիչը իր փորձառութենէն օգտուի եւ ատեն–ատեն ներկայացնել առաջարկ մը, որ կրնայ անոր օգնել՝ աւելի ազդու քարոզիչ մը դառնալու (Առ. 27։17)։ Ան նաեւ կրնայ իր շինիչ խօսակցութեամբ հրատարակիչը քաջալերել, մինչ դռնէ դուռ կը քարոզեն (Փլպ. 4։8)։
Ինչպէ՛ս օգտակար ծառայակից ըլլալ.
• Ուշադրութեամբ մտիկ ըրէ մինչ ծառայակիցդ կը վկայէ (Յակ. 1։19)։ Երբ համար մը կարդացուի, Աստուածաշունչէդ հետեւէ։ Այսպիսով, աւելի ի վիճակի պիտի ըլլաս անոր օգնելու, եթէ հարկ ըլլայ։
• Լաւ դատողութիւն գործածէ, որոշելու թէ ե՛րբ խօսակցութեան մէջ բաժին պէտք է բերես եւ եթէ հարկ կա՛յ որ զրոյցին մասնակցիս (Առ. 25։11)։ Մինչ հրատարակիչի մը կ’ընկերակցիս Աստուածաշունչի ուսումնասիրութիւն մը վարելու, ատենէ ատեն ըրած մեկնաբանութիւններդ պիտի գնահատուին։ Բայց երբ դռնէ դուռ կը քարոզէք, ծառայակիցդ թերեւս նախընտրէ որ մինչ ան կը վկայէ՝ իր խօսակցութիւնը չընդհատես։ Անշուշտ, եթէ ան նոր հրատարակիչ է կամ վստահ չէ ինչպէ՛ս հարցումի մը կամ առարկութեան մը պատասխանել, հաւանաբար օգնութիւնդ արժեւորէ։ Այսուհանդերձ, եթէ հրատարակիչի մը հետ դռնէ դուռ կը ծառայես, միասնաբար անոր վերայցելութիւններուն կամ Աստուածաշունչի ուսումնասիրութիւններուն կ’երթաք, խօսակցութիւնը մի՛ ընդհատեր, զայն յանձն մի՛ առներ, ոչ ալ տարբեր նիւթ մը ներկայացուր։
• Փորձառութիւնդ բաժնէ։ Մի՛ վարանիր ատենը մէյ մը ծառայակիցիդ առաջարկելու բան մը, որ իրեն պիտի օգնէ ծառայութեան մէջ աւելի ազդու ըլլալու (Առ. 3։27)։ Յարմար ժամանակին կրնաս թերեւս ըսել. «Ի՛նչ կ’ըսես, բացումը լա՞ւ էր» կամ «Կրնա՞մ բան մը առաջարկել» կամ «Ես հետեւեալը կը փորձեմ ընել»։ Ի մտի ունեցիր որ թէեւ ուրիշներ կը գնահատեն որ մէկը իրենց երբեմն առաջարկներ ներկայացնէ, սակայն անոնք կը վհատին՝ երբ իւրաքանչիւր սխալ իրենց ուշադրութեան յանձնուի։
Այս ամսուան ընթացքին, հետեւեալը փորձէ.
• Հրատարակիչի մը հետ ծառայութեան մասնակցելէ ետք, իրեն ըսէ թէ ո՛ր խօսքը կամ արարքը զինք օգտակար ծառայակից մը դարձուց։