Ծառայութեան մէջ հմտութիւնդ բարելաւէ. մեր բացումը պատրաստել

Ինչո՛ւ կարեւոր է։ Եթէ մեր բացումը տանտիրոջ հետաքրքրութիւնը չարթնցնէ, կրնայ ըլլալ որ ան խօսակցութեան վերջ դնէ՝ առաջ որ իրեն վկայութիւն տանք։ Անոր համար, բազմաթիւ հրատարակիչներ իրենց բացումը իրենց ներկայացումին ամէնէն կարեւոր մասը կը նկատեն։ Թէեւ Մեր Թագաւորութեան ծառայութիւնը թերթիկին եւ Պատճառաբանել գրքին մէջ ներկայացումի նմոյշներ կան, բայց անոնք միշտ լման դրուած չեն ըլլար, որպէսզի դիւրաթեք ըլլանք։ Նոյնիսկ եթէ ներկայացումի ամբողջ նմոյշը կայ, թերեւս հրատարակիչները որոշեն զայն իրենց բառերով ըսել կամ իրենց անձնական բացումը պատրաստել։ Այսպիսով, աւելի՛ ազդու պիտի ըլլանք, երբ ուշադրութեամբ պատրաստենք մեր բացումը, քան թէ խօսինք այն ինչ որ մեր միտքը կու գայ, երբ տանտէրը դուռը բանայ (Առ. 15։28)։

Ինչպէ՛ս պատրաստել։

• Նիւթ մը ընտրէ։ Անիկա պէտք է հիմնուած ըլլայ ներկայացուելիք հրատարակութեան վրայ եւ թաղամասի մարդիկը հետաքրքրէ։

• Ուշադրութեամբ պատրաստէ առաջին մէկ կամ երկու նախադասութիւնները, որոնք պիտի ըսես՝ բարեւ տալէ ետք։ Թերեւս հետեւեալ կերպով սկսիս. «Եկած եմ քանի որ. . . », «Շատեր հետաքրքրուած են. . . մասին», «Կը փափաքիմ ձեր կարծիքը առնել. . . շուրջ», կամ ա՛յլ կերպով։ Կարճ ու պարզ նախադասութիւնները յաճախ լաւագոյնն են։ Կարգ մը հրատարակիչներ իրենց բացումը գոց կը սորվին։

• Ուղղէ միտք գրգռող հարցում մը, որ տանտէրը պիտի մղէ խօսակցութեան մասնակցելու (Մատ. 17։23բ, 24)։ Ի մտի ունեցիր թէ գալէդ առաջ ան հաւանաբար ուրիշ բաներու մասին կը մտածէր, ուստի հարցումդ պէտք չէ շատ դժուար ըլլայ կամ տանտէրը վախցնէ։

Այս ամսուան ընթացքին, հետեւեալը փորձէ.

• Ընտանեկան պաշտամունքիդ ընթացքին, ժամանակ տրամադրէ բացումդ պատրաստելու եւ անոր վրայ փորձեր ընելու։

• Ծառայութեան ընթացքին, ծառայակիցիդ ըսէ թէ ի՛նչ բացում մտադրած ես գործածել (Առ. 27։17)։ Եթէ բացումդ ազդու չէ, զայն փոխէ։