Աշակերտներուդ օգնէ որ որոշեն Եհովային ծառայել

1-2. ա) Կարգ մը աշակերտներու համար ինչո՞ւ դժուար է որոշել Եհովային ծառայել։ բ) Այս յօդուածին մէջ ի՞նչ նկատի պիտի առնենք։

ԱՏԵՆ մը երկու մտքի վրա՞յ էիր, թէ Եհովայի վկայ ըլլա՛ս կամ ոչ։ Կը վախնայի՞ր որ գործընկերներդ, ընկերներդ կամ ընտանիքդ քու դէմդ ելլեն։ Կամ կը զգայի՞ր որ բնա՛ւ չես կրնար Եհովային սկզբունքներով ապրիլ։ Եթէ ա՛յո, ուրեմն կրնաս հասկնալ որ ինչո՛ւ Աստուածաշունչի կարգ մը աշակերտներու համար դժուար է որոշել Եհովային ծառայել։

² Յիսուս գիտէր որ այսպիսի վախեր կրնային դիւրութեամբ արգելք ըլլալ, որ մէկը հոգեւորապէս յառաջդիմէ (Մատ. 13։20-22)։ Բայց ան իր յոյսը չկտրեց անոնցմէ, որոնք կը դժուարանային իրեն հետեւելու։ Ընդհակառակը, ան իր աշակերտներուն ցուցուց, որ ինչպէ՛ս կրնան այսպիսիներու օգնել, որ 1) տեսնեն թէ ի՛նչ բան արգելք կ’ըլլայ որ յառաջդիմեն, 2) Եհովային հանդէպ իրենց սէրը զօրացնեն, 3) Եհովան առաջին տեղը դնեն եւ 4) գիտնան ինչպէ՛ս վարուիլ, երբ ուրիշներ հակառակին։ Մենք ինչպէ՞ս կրնանք Յիսուսին ըսածները գործադրել, մինչ Կեանքը վայելէ յաւիտեա՛ն գիրքը կը գործածենք, որ մեր աշակերտին օգնենք Եհովային ծառայելու որոշումը առնելու։

ԱՇԱԿԵՐՏԻԴ ՕԳՆԷ ՈՐ ՏԵՍՆԷ ԹԷ Ի՛ՆՉ ԲԱՆ ԱՐԳԵԼՔ Կ’ԸԼԼԱՅ ՈՐ ՅԱՌԱՋԴԻՄԷ

3. Թերեւս ի՞նչ բան արգելք էր Նիկոդէմոսին, որ Յիսուսին աշակերտը դառնայ։

³ Նիկոդէմոսը՝ որ ճանչցուած հրեայ առաջնորդ մըն էր, դժուարացաւ Յիսուսին հետեւորդը ըլլալու։ Յիսուս իր ծառայութիւնը սկսելուն հազիւ վեց ամիս անցած էր, երբ Նիկոդէմոսը հասկցաւ որ Յիսուս Աստուծոյ կողմէ ղրկուած էր (Յովհ. 3։1, 2)։ Բայց երբ ան Յիսուսին հետ պիտի տեսնուէր՝ մթննալէն ետք գնաց անոր քով, որովհետեւ կը վախնար հրեաներէն (Յովհ. 7։13. 12։42)։ Թերեւս ան մտածեց, որ եթէ Յիսուսին աշակերտը դառնայ, շատ բաներ պիտի կորսնցնէa։

4. Յիսուս ինչպէ՞ս օգնեց Նիկոդէմոսին, որ հասկնայ թէ Աստուած ի՛նչ կ’ուզէ իրմէ։

⁴ Նիկոդէմոսը շատ լաւ գիտէր Օրէնքը, բայց պէտք ունէր որ մէկը իրեն օգնէր հասկնալու, թէ Եհովան ի՛նչ կ’ուզէ իրմէ։ Յիսուս ինչպէ՞ս օգնեց իրեն։ Յիսուս իրեն ժամանակ տրամադրեց եւ նոյնիսկ պատրաստ էր իրիկունով իրեն հետ տեսնուելու։ Ասկէ զատ, Յիսուս յստակօրէն անոր ըսաւ որ ի՛նչ պէտք էր ընէր, որ իր աշակերտը դառնար։ Ան պէտք էր իր մեղքերէն զղջար, ջուրին մէջ մկրտուէր եւ Աստուծոյ Որդիին հաւատար (Յովհ. 3։5, 14-21)։

5. Աշակերտին ինչպէ՞ս կրնանք օգնել տեսնելու համար, թէ ի՛նչ բան արգելք կ’ըլլայ որ յառաջդիմէ։

⁵ Նոյնիսկ երբ աշակերտ մը Սուրբ Գիրքը լաւ հասկցած է, թերեւս ան օգնութեան պէտք ունի՝ տեսնելու համար թէ ի՛նչ բան արգելք կ’ըլլայ որ յառաջդիմէ։ Գործը կամ ընտանիքին կողմէ հալածանքը կրնայ արգելք ըլլալ, որ ան Եհովայի վկայ ըլլայ։ Ասոր համար, աշակերտիդ հետ ժամանակ անցուր։ Թերեւս հետը գաւաթ մը սուրճ խմես կամ քիչ մը քալելու երթաս։ Ասանկ ատեններ, թերեւս ան իր սիրտը բանայ եւ իր դժուարութիւններուն մասին խօսի։ Զինք քաջալերէ որ պէտք եղած փոփոխութիւնները ընէ՝ ոչ թէ քե՛զ ուրախացնելու համար, հապա՝ Եհովան։

6. Ինչպէ՞ս կրնաս աշակերտիդ օգնել որ իր սորվածները գործադրելու քաջութիւնը ունենայ (Ա. Կորնթացիս 16։13)։

⁶ Երբ աշակերտ մը վստահ ըլլայ, թէ Եհովան իրեն պիտի օգնէ Սուրբ Գիրքին սկզբունքներուն համաձայն ապրելու, ան քաջութիւնը պիտի ունենայ, որ իր սորվածները գործադրէ (կարդա՛ Ա. Կորնթացիս 16։13)։ Քու դերդ ի՞նչ է ասոր մէջ։ Քու դերդ կը նմանի դպրոցի ուսուցիչի մը դերին։ Երբ դպրոց կ’երթայիր՝ ո՞ր տեսակի ուսուցիչը ամէնէն շատ կը սիրէիր։ Հաւանաբար այն ուսուցիչը որ համբերութեամբ քեզի կ’օգնէր քու կարողութիւններուդ վստահելու։ Նմանապէս, Աստուածաշունչի լաւ ուսուցիչ մը ոչ միայն աշակերտին կը սորվեցնէ որ Աստուած մեզմէ ի՛նչ կ’ուզէ, հապա նաեւ զինք կը վստահեցնէ, որ Եհովային օգնութեամբ կրնա՛յ պէտք եղած փոփոխութիւնները ընել։ Լաւ, ինչպէ՞ս կրնաս ասիկա ընել։

ԱՇԱԿԵՐՏԻԴ ՕԳՆԷ ՈՐ ԵՀՈՎԱՅԻՆ ՀԱՆԴԷՊ ԻՐ ՍԷՐԸ ԶՕՐԱՑՆԷ

7. Յիսուս ինչպէ՞ս իրեն մտիկ ընողներուն օգնեց, որ Եհովան աւելի սիրեն։

⁷ Յիսուս գիտէր թէ երբ մէկը Աստուած սիրէ, պիտի ուզէ իր սորվածները գործադրել։ Ասոր համար, ան շատ անգամ սորվեցուց բաներ, որոնք իր աշակերտներուն պիտի օգնէին, որ իրենց երկնաւոր Հայրը աւելի սիրեն։ Օրինակ, ան Եհովան նմանցուց մարդու մը, որ իր զաւակներուն բարի բաներ կու տայ (Մատ. 7։9-11)։ Իրեն մտիկ ընողներէն ոմանք թերեւս ասանկ կարեկից հայր մը չէին ունեցած։ Երեւակայէ թէ անոնք ի՛նչ զգացած ըլլալու էին, երբ Յիսուս պատմեց կարեկից հօր մը առակը, որ իր անառակ որդին ետ ընդունեց։ Յիսուս մարդոց օգնեց տեսնելու, թէ Եհովան զիրենք շատ կը սիրէ եւ կ’ուզէ իրենց օգնել (Ղուկ. 15։20-24)։

8. Ինչպէ՞ս կրնաս աշակերտիդ օգնել, որ աւելի սիրէ Եհովան։

⁸ Դուն ալ կրնաս Եհովային գեղեցիկ յատկութիւններուն մասին խօսելով աշակերտիդ օգնել, որ աւելի սիրէ Եհովան։ Ամէն անգամ որ անոր հետ կը սերտես, անոր օգնէ որ ըմբռնէ թէ իր սորվածները ինչպէ՛ս կը ցուցնեն, որ Եհովան մեզ կը սիրէ։ Երբ փրկանքին մասին կը խօսիս, անոր բացատրէ թէ Եհովան փրկանքը տուաւ ոչ միայն ընդհանուր մարդկութեան համար, այլեւ անձամբ իրեն համար (Հռով. 5։8. Ա. Յովհ. 4։10)։ Երբ աշակերտդ հասկնայ որ Եհովան անձամբ զինք որքա՛ն կը սիրէ, աւելի պիտի սիրէ Եհովան (Գաղ. 2։20)։

9. Ի՞նչ բան Մայքլին օգնեց որ իր կեանքին մէջ փոփոխութիւններ մտցնէ։

⁹ Նկատի առ Ինտոնեզիայէն Մայքլ անունով մարդու մը պարագան։ Թէեւ ան ճշմարտութեան մէջ մեծցած էր, բայց չէր մկրտուած։ 18 տարեկանին ան ուրիշ երկիր մը գնաց եւ բեռնակառքի վարիչ եղաւ։ Ետքը ան ամուսնացաւ, բայց շարունակեց օտարութեան մէջ աշխատիլ՝ իր ընտանիքէն հեռու։ Մինչ այդ, իր կինն ու աղջիկը սկսան Սուրբ Գիրքը սերտել եւ յառաջդիմել։ Երբ Մայքլին մայրը մեռաւ, ան որոշեց Ինտոնեզիա վերադառնալ եւ իր հօրը հոգ տանիլ։ Ան նաեւ ընդունեց Սուրբ Գիրքը սերտել։ Երբ Կեանքը վայելէ յաւիտեա՛ն գրքին 27–րդ դասին «Աւելի՛ պրպտէ» մասը կը սերտէր, Մայքլը շատ ազդուեցաւ։ Երբ երեւակայեց թէ Եհովան որքա՛ն նեղուած ըլլալու էր, երբ իր որդիին չարչարանքը կը տեսնէր, Մայքլը սկսաւ լալ։ Երբ անդրադարձաւ որ Եհովան ու Յիսուսը զինք որքա՛ն կը սիրեն, ան գնահատութեամբ լեցուեցաւ, փոփոխութիւններ ըրաւ եւ մկրտուեցաւ։

ԱՇԱԿԵՐՏԻԴ ՕԳՆԷ ՈՐ ԵՀՈՎԱՆ ԱՌԱՋԻՆ ՏԵՂԸ ԴՆԷ

10. Յիսուս իր առաջին աշակերտներուն ինչպէ՞ս օգնեց, որ ծառայութիւնը առաջին տեղը դնեն (Ղուկաս 5։5-11) (տե՛ս նաեւ նկարը)։

¹⁰ Յիսուսին առաջին աշակերտները շուտով անդրադարձան,, որ Յիսուս խոստացուած Մեսիան է, բայց անոնք օգնութեան պէտք ունէին որ ծառայութիւնը առաջին տեղի դնեն իրենց կեանքին մէջ։ Պետրոսը եւ Անդրէասը ձկնորսութիւն կ’ընէին Յակոբոսին ու Յովհաննէսին հետ, եւ անոնց գործը շատ յաջող էր (Մար. 1։16-20)։ Պետրոսը եւ Անդրէասը արդէն ատենէ մը ի վեր Յիսուսին աշակերտներն էին, երբ Յիսուս զիրենք հրաւիրեց որ լիաժամ հետեւին իրեն (Մատ. 4։18, 19)։ Երբ անոնք «իրենց ուռկանները թողուցին», շատ հաւանաբար ծրագրեցին որ ինչպէ՛ս կրնան իրենց ընտանիքներուն պէտքերուն հոգ տանիլ, մինչ իրենք Յիսուսին կը հետեւին։ Լաւ, ի՞նչը ձգեց որ անոնք քարոզչութիւնը աւելի կարեւոր նկատեն, քան՝ դրամ շահիլը։ Յիսուս հրաշք մը ըրաւ, որ անոնց վստահութիւնը զօրացուց, թէ Եհովան կարողութիւնը ունի՛ իրենց հոգ տանելու (կարդա՛ Ղուկաս 5։5-11)։

11. Ինչպէ՞ս կրնանք մեր փորձառութիւնները պատմելով մեր աշակերտին հաւատքը զօրացնել։

¹¹ Մենք չենք կրնար հրաշքներ ընել, բայց կրնանք փորձառութիւններ պատմել մեր աշակերտներուն, թէ Եհովան ինչպէ՛ս կ’օգնէ անոնց, որոնք Զինք առաջին տեղը կը դնեն։ Օրինակ, կը յիշե՞ս Եհովան քեզի ինչպէ՛ս օգնեց որ սկսիս ժողովներու երթալ։ Թերեւս պէտք ունեցար վարպետիդ հետ խօսելու եւ բացատրելու, թէ ինչո՛ւ այլեւս չես կրնար աւելորդ ժամեր աշխատիլ, եթէ ատիկա պիտի ազդէ ժողովներուն ներկայ ըլլալուդ։ Աշակերտիդ բացատրէ թէ հաւատքդ ինչպէ՛ս զօրացաւ, երբ տեսար Եհովան քեզի ինչպէ՛ս կ’օգնէ որ Զինք առաջին տեղը դնես։

12. ա) Ինչո՞ւ պէտք է տարբեր–տարբեր հրատարակիչներ հրաւիրես աշակերտիդ դասին։ բ) Ինչպէ՞ս կրնաս վիտէօները գործածել աշակերտիդ օգնելու, որ Եհովան առաջին տեղը դնէ. օրինակ մը տուր։

¹² Աշակերտդ նաեւ կ’օգտուի, երբ լսէ թէ ուրիշ եղբայրներ ու քոյրեր ինչպէ՛ս Եհովան առաջին տեղը դրած են։ Ասոր համար, տարբեր–տարբեր եղբայրներ ու քոյրեր հրաւիրէ անոր դասին։ Անոնցմէ խնդրէ որ պատմեն, թէ ինչպէ՛ս ճշմարտութեան եկան եւ թէ ինչպէ՛ս ծառայութիւնը առաջին տեղը դրին։ Ասկէ զատ, աշակերտիդ հետ դիտէ Կեանքը վայելէ յաւիտեա՛ն գիրքին «Աւելի՛ պրպտէ» կամ «Աւելի՛ն գիտցիր» բաժիններուն վիտէօները։ Օրինակ, մինչ 37–րդ դասը կը սերտես անոր հետ, կրնաս Եհովան մեր պէտքերը պիտի հոգայ վիտէոյին սկզբունքներուն մասին խօսիլ։

ԱՇԱԿԵՐՏԻԴ ՕԳՆԷ ՈՐ ԳԻՏՆԱՅ ԻՆՉՊԷ՛Ս ՎԱՐՈՒԻ ԵՐԲ ՄԱՐԴԻԿ ՀԱԿԱՌԱԿԻՆ

13. Յիսուս իր աշակերտները ինչպէ՞ս պատրաստեց հակառակութեան։

¹³ Յիսուս շատ անգամներ իր հետեւորդներուն ըսաւ, որ ուրիշներ իրենց պիտի հակառակին, նոյնիսկ՝ ընտանիքի անդամներ (Մատ. 5։11. 10։22, 36)։ Յիսուս իր մահանալէն քիչ առաջ, իր աշակերտներուն ըսաւ որ թերեւս սպաննուին Եհովան պաշտելնուն համար (Մատ. 24։9. Յովհ. 15։20. 16։2)։ Ասոր համար, ան խրատեց որ ծառայութեան մէջ զգոյշ ըլլան, հակառակողներուն հետ չվիճաբանին, եւ իրենց խօսածներն ու ըրածները հաշիւ ընեն, որպէսզի քարոզչութիւնը շարունակուի։

14. Ինչպէ՞ս կրնանք մեր աշակերտը պատրաստել հակառակութեան (Բ. Տիմոթէոս 3։12)։

¹⁴ Կրնա՛նք մեր աշակերտը պատրաստել հակառակութեան։ Կրնանք անոր բացատրել որ իր գործընկերները, ընկերները եւ ազգականները ի՛նչ կարելի է ըսեն իրեն, քանի որ Սուրբ Գիրքը կը սերտէ (կարդա՛ Բ. Տիմոթէոս 3։12)։ Կարգ մը գործընկերներ թերեւս իր վրայ խնդան, քանի որ Սուրբ Գիրքին համաձայն կ’ապրի։ Ուրիշներ, նոյնիսկ ընտանիքի անդամներ, թերեւս քննադատեն իր հաւատալիքները։ Որքա՛ն կանուխ զինք պատրաստենք հակառակութեան, այնքա՛ն աւելի ինք պիտի գիտնայ ի՛նչ ըսել ու ընել՝ երբ հակառակութիւն ըլլայ։

15. Ի՞նչ բան աշակերտիդ կրնայ օգնել երբ ընտանիքէն հալածուի։

¹⁵ Եթէ աշակերտդ ընտանիքէն կը հալածուի, զինք քաջալերէ որ մտածէ թէ անոնք ինչո՛ւ իրմէ նեղուած են։ Թերեւս կը կարծեն որ Վկաները սուտեր կը սորվեցնեն կամ գէշ մարդիկ են։ Նոյնիսկ Յիսուսի ընտանիքէն ոմանք իրմէ գոհ չէին (Մար. 3։21. Յովհ. 7։5)։ Աշակերտիդ սորվեցուր որ համբերէ եւ իր ընտանիքին եւ ուրիշներուն հետ ազնուութեամբ խօսի։

16. Ինչպէ՞ս կրնանք մեր աշակերտին օգնել, որ ազնուութեամբ խօսի ճշմարտութեան մասին։

¹⁶ Նոյնիսկ երբ մեր ազգականները հետաքրքրուին ճշմարտութիւնով, լաւ կ’ըլլայ որ աշակերտը մէկէ՛ն ամէն բան չբացատրէ անոնց. թէ ոչ թերեւս անոնց գլուխը ցաւցնէ եւ անոնք չուզեն նորէն խօսիլ ճշմարտութեան մասին։ Ասոր համար, աշակերտդ քաջալերէ որ այնպէս մը խօսի ճշմարտութեան մասին, որ առիթ կը բանայ որ ապագային նորէն խօսի ատոր մասին (Կող. 4։6)։ Ան կրնայ իր ազգականներուն ըսել որ jw.org կայքը այցելեն։ Ասիկա անոնց առիթ կու տայ, որ իրենց ուզած ատենը եւ իրենց ուզած չափով տեղեկութիւններ առնեն Վկաներուն մասին։

17. Ինչպէ՞ս կրնաս աշակերտդ մարզել, որ Վկաներուն մասին հարցումներու պատասխանէ (տե՛ս նաեւ նկարը)։

¹⁷ Կրնաս jw.org կայքին վրայ «Յաճախ ուղղուած հարցումներ» բաժինը գործածել, որպէսզի աշակերտիդ օգնես պատրաստուելու, թէ ինչպէ՛ս կրնայ պարզ կերպով պատասխանել երբ իրեն հարցում հարցուի (Բ. Տիմ. 2։24, 25)։ Ամէն մէկ դասէն ետք, աշակերտիդ հետ նկատի առ՝ Կեանքը վայելէ յաւիտեա՛ն գիրքին «Կարգ մը մարդիկ կ’ըսեն» կամ «Թերեւս մէկը հարցնէ» բաժինը։ Զինք քաջալերէ որ փորձ ընէ, թէ ինչպէ՛ս կրնայ իր բառերով պատասխանել։ Եթէ պէտք ըլլայ, իրեն օգնէ որ աւելի լաւ կերպով պատասխանէ։ Այսպիսի փորձի պահեր իրեն պիտի օգնեն, որ ինքնավստահութեամբ պաշտպանէ իր հաւատքը։

18. Ինչպէ՞ս կրնաս աշակերտդ քաջալերել որ հրատարակիչ ըլլայ (Մատթէոս 10։27)։

¹⁸ Յիսուս իր աշակերտներուն պատուիրեց, որ բարի լուրը քարոզեն մարդոց (կարդա՛ Մատթէոս 10։27)։ Աշակերտը որքա՛ն շուտ սկսի իր հաւատքին մասին ուրիշին խօսելու, այնքա՛ն շուտ պիտի սորվի Եհովային վստահիլ։ Ինչպէ՞ս կրնաս աշակերտիդ օգնել որ այս նպատակին հասնի։ Երբ ժողովքին մէջ յայտարարուի, թէ որոշ ամիս մը քարոզարշաւ կայ, աշակերտդ քաջալերէ որ մտածէ թէ ի՛նչ պէտք է ընէ հրատարակիչ ըլլալու համար։ Իրեն բացատրէ, թէ սովորաբար քարոզարշաւներուն ատեն աւելի դիւրին կ’ըլլայ քարոզելը։ Ուրիշ նպատակ մը կրնայ ըլլալ՝ միջշաբաթային ժողովներուն սկսի բաժին տալ։ Մինչ ան ջանք կը թափէ որ այս նպատակին հասնի, պիտի սորվի իր հաւատալիքները համոզումով բացատրել։

ԱՇԱԿԵՐՏԻԴ ՑՈՒՑՈՒՐ ԹԷ ՎՍՏԱՀ ԵՍ ՈՐ ԻՆՔ Կ’ՈՒԶԷ ԵՀՈՎԱՆ ՈՒՐԱԽԱՑՆԵԼ

19. Յիսուս ինչպէ՞ս ցուցուց, որ իր աշակերտներուն կը վստահէր, եւ ինչպէ՞ս կրնանք իրեն նմանիլ։

¹⁹ Յիսուս երկինք ելլելէ առաջ, իր աշակերտներուն ըսաւ որ օր մը իրեն պիտի միանան։ Անոնք չհասկցան որ ան կը խօսէր իրենց երկինք ելլելուն մասին։ Բայց Յիսուս կեդրոնացաւ անոնց հաւատարմութեան եւ ոչ թէ կասկածներուն վրայ (Յովհ. 14։1-5, 8)։ Ան գիտէր որ անոնք ժամանակ կ’ուզէին, որ կարգ մը բաներ հասկնային, ինչպէս՝ երկնային յոյսը (Յովհ. 16։12)։ Մենք ալ կրնանք մեր աշակերտին ցուցնել, թէ վստահ ենք որ ինք կ’ուզէ Եհովան ուրախացնել։

20. Մալաուիի մէջ քոյր մը ինչպէ՞ս ցուցուց որ իր աշակերտուհիին կը վստահէր։

²⁰ Մենք միշտ յոյսով ենք որ մեր աշակերտը կ’ուզէ ճիշդը ընել։ Նկատի առնենք Մալաուիէն Չիֆունտօ անունով քրոջ մը օրինակը։ Ան սկսաւ Կեանքը վայելէ յաւիտեա՛ն գրքով սերտել Ալինաֆէ անունով կաթողիկէ երիտասարդուհիի մը հետ։ Երբ 14–րդ դասը վերջացուցին, Չիֆունտոն հարցուց, թէ պաշտամունքի մէջ արձաններ գործածելու նկատմամբ ի՛նչ էր իր կարծիքը։ Ալինաֆէն նեղացաւ եւ ըսաւ. «Ասիկա անձնակա՛ն որոշում է»։ Չիֆունտոն կարծեց որ ասոր վրայ Ալինաֆէն դասը պիտի կեցնէ։ Բայց ան համբերութեամբ շարունակեց Ալինաֆէին հետ սերտել, յուսալով որ ան օր մը պիտի հասկնայ թէ արձաններ գործածելը սխալ է։ Քանի մը ամիս ետք, Չիֆունտոն անոր հարցուց 34–րդ դասին մէջի հարցումը. «Մինչեւ հիմա ինչպէ՞ս օգտուած ես Սուրբ Գիրքը սերտելով եւ ճշմարիտ Աստուծոյն՝ Եհովային մասին գիտնալով»։ Չիֆունտոն կը պատմէ թէ Ալինաֆէն ի՛նչ ըսաւ. «Ան շատ մը աղուոր բաներ յիշեց. օրինակ՝ թէ Վկաները բան մը չեն ըներ՝ որ Սուրբ Գիրքը կ’ըսէ թէ սխալ է»։ Ժամանակ մը ետք, Ալինաֆէն դադրեցաւ արձաններ գործածելէ եւ մկրտուեցաւ։

21. Ինչպէ՞ս կրնանք մեր աշակերտին փափաքը զօրացնել, որ որոշէ Եհովային ծառայել։

²¹ Ճիշդ է որ Եհովան է ‘աճեցնողը’, բայց մենք դեր ունինք աշակերտին յառաջդիմութեան մէջ (Ա. Կոր. 3։7)։ Մենք միայն չենք սորվեցներ որ Աստուած ի՛նչ կ’ուզէ իրմէ, հապա՝ իրեն կ’օգնենք որ Եհովային հանդէպ իր սէրը զօրացնէ, զինք կը քաջալերենք որ Եհովան առաջին տեղը դնէ եւ իրեն կը սորվեցնենք որ ինչպէ՛ս կրնայ Եհովային վստահիլ՝ երբ ուրիշներ հակառակին իրեն։ Ասկէ զատ, երբ իրեն ցոյց տանք թէ մենք վստահ ենք, որ ինք կ’ուզէ Եհովան ուրախացնել, ան աւելի պիտի համոզուի որ կրնա՛յ Եհովային սկզբունքներուն համաձայն ապրիլ եւ իրեն ծառայել։