Համաշխարհային զինուորական ծախսերը 2 եռիլիոն տոլարը կ’անցնին. Աստուածաշունչը ի՞նչ կ’ըսէ

2022–ին, ամբողջ աշխարհի մէջ, կառավարութիւններուն զինուորական ծախսերը 2,24 եռիլիոն տոլարը անցան։ Գլխաւորաբար Ռուսիոյ յարձակումը Ուքրանիայի վրայ պատճառ դարձաւ, որ մարդկային պատմութեան մէջ, այս ամէնէն բարձր թիւը արձանագրուի։ Վարը ներկայացուած են տուեալներ՝ ապրիլ 2023–ին Սթոքհոլմի խաղաղութեան խնդիրներու հետազօտութեան միջազգային հիմնարկին (SIPRI) կողմէ տրուած տեղեկագրութեան հիման վրայ.

• Եւրոպայի զինուորական ծախսերը «տարուան ընթացքին աւելցան 13 առ հարիւր։ Ասիկա եւրոպական ծախսերուն մէջ տարեկան ամենաշատ բարձրացումն է՝ Պաղ պատերազմէն ի վեր»։

• «Ռուսիան... իր ծախսերը աւելցուց մօտ 9,2 առ հարիւրով, եւ ասանկով մեծ գումարներով զինուորական ծախսեր ունեցող երկիրներու ցանկին մէջ հինգերորդ դիրքէն բարձրացաւ երրորդի»։

• Միացեալ Նահանգները կը շարունակէ մնալ առաջին դիրքին վրայ, որպէս ամէնէն շատ զինուորական ծախսեր ունեցող երկիրը։ «Համաշխարհային զինուորական ծախսերուն 39 առ հարիւրը» իրեն կ’երթայ։

«Վերջին տարիներուն, համաշխարհային զինուորական ծախսերուն շարունակական բարձրացումը փաստ է, որ մենք կ’ապրինք երթալով աւելի անապահով դարձող աշխարհի մը մէջ», կ’ըսէ Դոկտ. Նան Թիան, որ մասնակցեցաւ SIPRI–ին գրած տեղեկագրութեան։

Աստուածաշունչը մարգարէացաւ որ ամէնէն զօրաւոր կառավարութիւնները երթալով աւելի խնդիրներ եւ կռիւներ պիտի ունենային իրարու միջեւ, եւ կ’ըսէ որ ճիշդ ի՛նչը կրնայ իսկական խաղաղութիւն բերել։

Աստուածաշունչը մարգարէացած էր որ երթալով պատերազմները պիտի շատնային

• Աստուածաշունչը կ’ըսէ որ «վերջի ժամանակ» կոչուող օրերու մէջ կ’ապրինք (Դանիէլ 8։19)։

• Դանիէլ գիրքը մարգարէացած էր, որ այդ ժամանակին պիտի ըլլային իրարու դէմ մրցակցող համաշխարհային ուժեր։ Այս համաշխարհային ուժերը իրարու վրայ պիտի ‘յարձակէին’, կամ ուրիշ խօսքով իրարու դէմ պիտի կռուէին, որ ամէնէն զօրաւոր ուժը դառնան։ Այդ զինուորական գործողութիւններուն համար, «գանձեր» կամ հսկայ գումարներ պիտի ծախսուէին (Դանիէլ 11։40, 42, 43)։

Այս կարեւոր մարգարէութեան մասին աւելի՛ն գիտնալու համար, դիտէ Մարգարէութիւն մը կ’իրականանայ. Դանիէլ 11–րդ գլուխ վիտէոն (արաբ.)։

Ո՞վ իսկական խաղաղութիւն պիտի բերէ

• Աստուածաշունչը կ’ըսէ որ Աստուած մարդկային կառավարութիւններուն տեղ «ուրիշ թագաւորութիւն մը պիտի հանէ, որ յաւիտեան պիտի չաւերուի։ Այս թագաւորութիւնը ուրիշ ժողովուրդի պիտի չթողուի։ Անիկա այս բոլոր թագաւորութիւնները պիտի փշրէ ու պիտի հատցնէ ու ինք յաւիտեան պիտի մնայ» (Դանիէլ 2։44)։

• Եհովաa Աստուած շուտով իսկական եւ մնայուն խաղաղութիւն պիտի բերէ. բան մը, որ մարդ արարածը կարող չէ ընել։ Ան ասիկա ինչպէ՞ս պիտի ընէ։ Իր երկնային Թագաւորութեան միջոցաւ, ամէն տեսակ վայրագութեան վերջ պիտի դնէ՝ մէջտեղէն վերցնելով բոլո՛ր զէնքերը (Սաղմոս 46։8, 9)։

Եթէ կ’ուզես աւելի գիտնալ որ Աստուծոյ Թագաւորութիւնը ինչեր պիտի ընէ, կարդա՛ «Աստուծոյ Թագաւորութեան ներքեւ ‘շատ խաղաղութիւն պիտի ըլլայ’» յօդուածը։