Ողջունենք Աստուծոյ նոր աշխարհը ուր ազատութիւն պիտի տիրէ
«[Աստուած] անոնց աչքերէն բոլոր արցունքները պիտի սրբէ եւ ա՛լ մահ պիտի չըլլայ։ Ո՛չ սուգ եւ ո՛չ աղաղակ եւ ո՛չ ցաւ պիտի ըլլայ ասկէ յետոյ»։—ՅԱՅՏՆՈՒԹԻՒՆ 21։4
1, 2. Միայն ո՞վ կրնայ իրական ազատութիւն բերել, եւ Աստուածաշունչէն ի՞նչ կրնանք սորվիլ Իր մասին։
ՊԱՏՄՈՒԹԻՒՆԸ փաստած է Երեմիայի խօսքերուն ճշմարտութիւնը. «Մարդուն ճամբան իր ձեռքը չէ, քալող մարդը իր քալուածքը շտկելու կարող չէ»։ Միայն ո՞վ կրնայ պատշաճօրէն մարդուն քալուածքը շտկել։ Երեմիան կը շարունակէր. «Ո՛վ Տէր, զիս խրատէ»։ (Երեմեայ 10։23, 24) Այո, միայն Եհովան կրնայ իրական ազատութիւն բերել մարդկային ընտանիքը հարուածող խնդիրներէն։
2 Աստուածաշունչը բազմաթիւ օրինակներ կը բովանդակէ, որոնք ցոյց կու տան թէ Եհովա կարող է իրեն ծառայողներուն ազատութիւն բերել։ «Ինչ որ առաջուընէ գրուեցաւ, գրուեցաւ որ սորվիք, որպէսզի համբերութիւնով ու գրքերուն մխիթարութիւնով մենք յոյս ունենանք»։ (Հռովմայեցիս 15։4) Սուտ պաշտամունքին դէմ Եհովայի դատաստաններն ալ արձանագրուած են եւ ասոնք «մեզի՝ քանի որ դարերուն վերջը հասաւ՝ խրատ ըլլալու» կը ծառայեն։—Ա. Կորնթացիս 10։11
Իր Ժողովուրդը Ազատագրել
3. Եհովա ինչպէ՞ս ցոյց տուաւ իր ժողովուրդը Եգիպտոսէն ազատագրելու իր կարողութիւնը։
3 Սուտ պաշտամունքին դէմ դատաստան գործադրելու եւ իր կամքը կատարողները ազատագրելու Եհովայի կարողութեան մէկ օրինակը տրուած է երբ հին ժամանակներու իր ժողովուրդը Եգիպտոսի մէջ գերի էր։ Ելից 2։23–25–ը կ’ըսէ. «Ծառայութեան [գերութեան (ՆԱ)] համար անոնք աղաղակեցին Աստուծոյ։ Աստուած անոնց հեծեծանքը լսեց»։ Եգիպտոսի սուտ աստուածներուն վրայ իր գերակայութիւնը ահաւոր կերպով մը ցոյց տալով, Ամենակալ Աստուած տասը պատուհասներ բերաւ այդ ազգին վրայ։ Իւրաքանչիւր պատուհասին նպատակն էր Եգիպտոսի չաստուած մը նուաստացնել, ապացուցանելով որ անոնք սուտ էին եւ չէին կրնար Եգիպտացիներուն օգնել, որոնք զանոնք կը պաշտէին։ Ուստի, Աստուած ազատագրեց իր ժողովուրդը, իսկ կործանեց Փարաւոնը եւ անոր զօրքը Կարմիր Ծովուն մէջ։—Ելից 7–էն 14–րդ գլուխները։
4. Ինչո՞ւ անարդարութիւն չէր որ Աստուած Քանանացիներուն դէմ իր դատաստանները գործադրէր։
4 Երբ Աստուած Իսրայէլը Քանանու երկիրը բերաւ, անոր դիւապաշտ բնակչութիւնը կործանեցաւ ու երկիրը Աստուծոյ ժողովուրդին տրուեցաւ։ Որպէս Տիեզերական Գերիշխանը, Եհովա իրաւունք ունի նուաստացուցիչ կրօնքներու վրայ իր դատաստանները գործադրելու։ (Ծննդոց 15։16) Իսկ Քանանացիներու կրօնքին առնչութեամբ, Հէլիի Աստուածաշունչի Ձեռագիրը (Անգլ.) կ’ըսէ. «Քանանացիներու չաստուածներուն ... պաշտամունքը շատ այլանդակ շուայտանքներէ կը բաղկանար. անոնց տաճարները անառակութեան կեդրոններ էին։ ... Քանանացիները իրենց չաստուածներուն պաշտամունք կը մատուցանէին՝ անոնց առջեւ անբարոյ արարքներով որպէս կրօնական ծիսակատարութիւն մը. ապա իրենց անդրանիկ զաւակները սպաննելով, զորոնք այդ նոյն չաստուածներուն որպէս զոհ կը մատուցանէին։ Այնպէս կը թուի որ Քանանու երկիրը, ամբողջութեամբ, տեսակ մը Սոդոմ ու Գոմոր դարձած էր, ազգային տարողութեամբ»։ Անիկա կ’աւելցնէ. «Միթէ այսքան զզուելի եւ գազանային քաղաքակրթութիւն մը իրաւունք ունէ՞ր աւելի երկար գոյատեւելու։ ... Քանանու քաղաքներու աւերակները պեղող հնաբանները կը զարմանան թէ Աստուած ինչո՞ւ աւելի շուտ չէ կործանած զանոնք»։
5. Աստուծոյ վաղեմի ժողովուրդը ազատագրելը ինչպէ՞ս օրինակ կը ծառայէ մեր օրերուն։
5 Սուտ պաշտամունքին դէմ Աստուծոյ գործելուն, իր ուխտեալ ժողովուրդը ազատագրելուն եւ անոնց խոստացեալ երկիր մը հայթայթելուն այս պատմութիւնը գալիք բաներու օրինակ մըն է։ Անիկա կը մատնանշէ շատ մօտ ապագային երբ Աստուած համաշխարհային սուտ կրօնքներն ու անոնց ծուխերը պիտի ջախջախէ եւ իր այժմու ծառաները պիտի առաջնորդէ նոր աշխարհի մը՝ ուր արդարութիւն պիտի տիրէ։—Յայտնութիւն 7։9, 10, 13, 14. Բ. Պետրոս 3։10–13
Իրական Ազատութիւն՝ Աստուծոյ Նոր Աշխարհին մէջ
6. Նոր աշխարհին մէջ Աստուծոյ հայթայթելիք կարգ մը սքանչելի ազատութիւնները ի՞նչ են։
6 Նոր աշխարհին մէջ, Աստուած պիտի օրհնէ իր ժողովուրդը ազատութեան բոլոր սքանչելի երեսակներով զորս նախատեսած էր մարդկային ընտանիքին համար։ Մարդիկ պիտի ազատագրուին քաղաղական, տնտեսական եւ սուտ կրօնքի տարրերու բռնակալութենէն։ Անոնք մեղքէ եւ մահէ պիտի ազատագրուին եւ երկրի վրայ յաւիտեան ապրելու ակնկալութիւնը պիտի ունենան։ «Արդարները պիտի ժառանգեն երկիրը ու յաւիտեան անոր մէջ պիտի բնակին»։—Սաղմոս 37։29. Մատթէոս 5։5
7, 8. Նոր աշխարհին մէջ կատարեալ առողջութիւն վերագտնելով, ի՞նչ փորձառութիւններ պիտի ըլլան։
7 Այդ նոր աշխարհը հաստատուելէն շուտով ետք, անոր բնակիչները հրաշալիօրէն կատարեալ առողջութիւն պիտի վերագտնեն։ Յոբայ 33։25–ը կ’ըսէ. «Անոր մարմինը տղու մարմինէն աւելի փափուկ պիտի ըլլայ ու անիկա իր մանկութեան օրերուն պիտի դառնայ»։ Իսկ Եսայեայ 35։5, 6–ը կը խոստանայ. «Այն ատեն կոյրերուն աչքերը պիտի բացուին ու խուլերուն ականջները պիտի բացուին։ Այն ատեն կաղը եղջերուի պէս պիտի ցատկռտէ ու համրին լեզուն օրհնութիւններ պիտի երգէ»։
8 Դուք որ յառաջացած տարիքի կամ տկար առողջութեան պատճառաւ ֆիզիքական ցաւեր ունիք, դուք ձեզ երեւակայեցէք նոր աշխարհին մէջ, ուր ամէն առաւօտ առողջ եւ կայտար կը զարթնիք։ Ձեր կնճիրներուն տեղը առած է սահուն, առողջ մորթ մը—այլեւս մորթի սնուցիչներու կարիքը չկայ։ Ձեր մթագնած կամ կուրցած աչքերը կատարեալ տեսողութեան վերահաստատուած են—այլեւս ակնոցներու կարիքը չկայ։ Լսողութիւնը լիովին վերագտած էք—նետեցէք ձեր լսողութեան սարքերը։ Այլեւս ձեր մարմնին խեղանդամները զօրաւոր եւ լման են—ձերբազատուեցէք բոլոր ցուպերէ, անթացուպերէ եւ անիւաւոր աթոռներէ։ Այլեւս հիւանդութիւն չկայ—նետեցէք ձեր բոլոր դեղերը։ Եսայեայ 33։24–ը կը նախագուշակէ. «Հոն բնակողը պիտի չըսէ. ‘Հիւանդ եմ’»։ Անիկա նաեւ կը նշէ. «Անոնք ցնծութիւն եւ ուրախութիւն պիտի ստանան եւ տրտմութիւնն ու հեծութիւնը անոնցմէ պիտի հեռանան»։—Եսայեայ 35։10
9. Պատերազմը ինչպէ՞ս յաւիտեան վերջ պիտի գտնէ։
9 Այլեւս ոեւէ մէկը պատերազմի զոհ պիտի չդառնայ։ «[Աստուած] պատերազմները կը դադրեցնէ մինչեւ երկրի ծայրը. աղեղը կը կոտրտէ ու նիզակը կը ջարդէ, կառքերը կրակով կ’այրէ»։ (Սաղմոս 46։9) Պատերազմի զէնքերը երբեք պիտի չթոյլատրուին Աստուծոյ Թագաւորութեան Իշխանին՝ Յիսուս Քրիստոսի կողմէ, որու Եսայեայ 9։6–ը կը կոչէ «Խաղաղութեան Իշխան»։ Իսկ 7–րդ համարը կ’աւելցնէ. «Անոր իշխանութեանը մեծնալուն ու խաղաղութեանը սահման չկայ»։
10, 11. Ամբողջական խաղաղութիւնը ի՞նչ պիտի նշանակէ երկրին համար։
10 Ի՜նչ օրհնութիւն մը պիտի ըլլայ մարդկութեան եւ այս երկրին համար պատերազմի զէնքերէ ձերբազատուիլը։ Ներկայիս, նախկին պատերազմներու մէջ գործածուած զէնքերը տակաւին մարդոց կեանքերը կը խլեն։ Միմիայն երկրի մը՝ Ֆրանսայի մէջ, 1945–էն ի վեր, աւելի քան 600 ռումբ–չէզոքացնող մասնագէտներ մահացած են, մինչ կը ջանային նախկին պատերազմներէ մնացած պայթուցիկները չէզոքացնել։ Այդ երկրին ռումբ–չէզոքացնող գործակալութեան պատասխանատուն ըսաւ. «Տակաւին 1870–ի Ֆրանքօ–Փրուսական Պատերազմէն թնդանօթի չչէզոքացուած գնդակներ կը գտնենք։ Լիճեր կան, որոնք լեցուն են Ա. Աշխարհամարտէն թունաւոր նռնակներով։ Ատենը անգամ մը, երկրագործ մը քարշակով Բ. Աշխարհամարտէն հակա–հրասայլի ականի մը վրայէն կ’անցնի եւ փո՜ւֆ, կը վերջանայ։ Այսպիսի բաներ ամենուրէք կը պատահին»։ Երկու տարի առաջ, Նիւ Եորք Թայմզը (Անգլ.) կը բացատրէ. «Բ. Աշխարհամարտի վախճանէն ի վեր, 45 տարիներու ընթացքին, [ռումբ–չէզոքացնող միաւորները], [Ֆրանսայի] հողը ձերբազատած են 16 միլիոն հրետանիի պզտիկ ռումբերէ, 490,000 ռումբերէ եւ 600,000 ընդծովեայ ականներէ։ ... Հարիւր հազարաւոր հեկտարներ տակաւին մինչեւ ծունկ զէնքերով լեցուն ցանկապատուած կը մնան եւ որմնազարդերով շրջապատուած են, որոնք կ’ազդարարեն. ‘Մի՛ դպչիք։ Վտանգ’»։
11 Նոր աշխարհը որքա՜ն տարբեր պիտի ըլլայ։ Ամէն մարդ լաւ բնակարան, առատ ուտելիք եւ համայն երկիրը դրախտի մը վերածելու վարձահատոյց, խաղաղ գործ մը պիտի ունենայ։ (Սաղմոս 72։16. Եսայեայ 25։6. 65։17–25) Անգամ մը եւս մարդիկ եւ երկիրը պիտի չռըմբակոծուին միլիոնաւոր պայթուցիկ սարքերով։ Յիսուս այսպիսի նոր աշխարհ մը ի մտի ունէր, երբ անհատի մը ըսաւ՝ որ իրեն հաւատք կ’ընծայէր. «Դուն ... ինծի հետ դրախտին մէջ պիտի ըլլաս»։—Ղուկաս 23։43
Համերկրային Դաստիարակչութիւն մը՝ Կեանքի Համար
12, 13. Մեր ժամանակին համար Յիսուս եւ Եսայի դաստիարակչութեան ի՞նչ համերկրային գործ նախագուշակեցին։
12 Երբ անհատ մը Աստուծոյ նոր աշխարհին մասին կը տեղեկանայ, ան նաեւ կը սորվի թէ մեր օրերուն, Եհովա ճշմարիտ պաշտամունքին համար կազմակերպուած համաշխարհային ժողովք մը յառաջ բերած է։ Անիկա նոր աշխարհին կորիզը պիտի կազմէ եւ Աստուած հիմա զայն կը գործածէ իր նպատակներուն մասին ուրիշներուն ուսուցանելու համար։ Այս Քրիստոնէական կազմակերպութիւնը դաստիարակչութեան համերկրային գործ մը կը կատարէ, աննախընթաց տարողութեամբ։ Յիսուս նախագուշակեց ասիկա։ Ան ըսաւ. «Արքայութեան այս աւետարանը բովանդակ աշխարհի մէջ պիտի քարոզուի՝ բոլոր ազգերուն վկայութիւն ըլլալու։ Անկէ յետոյ վերջը պիտի գայ»։—Մատթէոս 24։14
13 Եսային ալ դաստիարակչութեան այս համերկրային գործին մասին խօսեցաւ. «Վերջին օրերը [մեր ժամանակին] Տէրոջը տանը լեռը [իր բարձրացուած ճշմարիտ պաշտամունքը] լեռներուն գլխուն վրայ պիտի հաստատուի, ... բոլոր հեթանոսները հեղեղի պէս պիտի դիմեն անոր։ Շատ ժողովուրդներ պիտի երթան ու ըսեն. ‘Եկէ՛ք Եհովային լեռը ... ելլենք, որպէսզի մեզի իր ճամբաները սորվեցնէ ու անոր շաւիղներուն մէջ քալենք’»։—Եսայեայ 2։2, 3
14. Այսօր ինչպէ՞ս կրնանք բնորոշել Աստուծոյ ծառաները։
14 Հետեւաբար, Աստուծոյ Թագաւորութեան մասին վկայութեան այս համերկրային գործը զօրաւոր ապացոյց մըն է թէ այս ամբարիշտ դրութեան վախճանը, ինչպէս նաեւ իրական ազատութիւնը մօտ են։ Աստուծոյ նոր աշխարհի յուսալից պատգամով մարդոց այցելողները Գործք Առաքելոց 15։14–ի մէջ նկարագրուած են որպէս ‘ժողովուրդ մը ... Աստուծոյ անուանը համար’։ Որո՞նք Եհովայի անունը կը կրեն եւ Եհովայի ու Իր Թագաւորութեան մասին վկայութիւն կու տան համայն աշխարհի մէջ։ Ի. դարուն պատմական արձանագրութիւնը կը պատասխանէ. միայն Եհովայի Վկաները։ Այսօր անոնք չորս միլիոնէ աւելի են, ամբողջ երկրին վրայ աւելի քան 66,000 ժողովքներու մէջ։—Եսայեայ 43։10–12. Գործք 2։21
15. Քաղաքական հարցերու առնչութեամբ, Աստուծոյ ճշմարիտ ծառաները ինչպէ՞ս կրնանք բնորոշել։
15 Ուրիշ ապացոյց մը թէ Թագաւորութիւնը քարոզելու մասին մարգարէութիւնները Եհովայի Վկաները կը կատարեն, նշուած է Եսայեայ 2։4–ին մէջ. «Անոնք իրենց սուրերէն խոփեր եւ իրենց նիզակներէն յօտոցներ պիտի շինեն։ Ազգ ազգի վրայ սուր պիտի չվերցնէ եւ ա՛լ պատերազմ պիտի չսորվին»։ Ուստի, Աստուծոյ Թագաւորութեան իշխանութեան մասին վկայութեան համերկրային գործը ընողները ‘ա՛լ պատերազմ պէտք չէ սորվին’։ Յիսուս ըսաւ որ անոնք «աշխարհէն չեն»։ (Յովհաննու 17։16) Ասիկա կը նշանակէ թէ անոնք քաղաքական հարցերու մէջ չէզոք պէտք է ըլլան, ազգերուն հակամարտութիւններուն եւ պատերազմներուն մէջ կողմ չբռնելով։ Որո՞նք աշխարհէն չեն եւ ա՛լ պատերազմ չեն սորվիր։ Դարձեալ, Ի. դարուն պատմական արձանագրութիւնը կը վկայէ. միայն Եհովայի Վկաները։
16. Աստուծոյ դաստիարակչութեան համերկրային գործը որքա՞ն ամբողջական պիտի ըլլայ։
16 Եհովայի Վկաներու դաստիարակչութեան այս համերկրային գործը պիտի շարունակուի նոյնիսկ Աստուած ներկայ ամբարիշտ աշխարհը իր վախճանին բերելէ ետք։ Եսայեայ 54։13–ը կ’ըսէ. «Քու բոլոր որդիներդ Աստուծմէ պիտի սորվին»։ Այս ուսուցումը այնքան ամբողջական պիտի ըլլայ որ Եսայեայ 11։9–ն կը նախագուշակէ. «Երկիրը Տէրոջը գիտութիւնով պիտի լեցուի, ինչպէս ջուրերը ծովը կը ծածկեն»։ Շարունակական դաստիարակչութեան կարիքը պիտի ունենան ո՛չ միայն անոնք որոնք պիտի վերապրին այս հին աշխարհէն եւ այն երախաները որոնք պիտի ծնին նոր աշխարհին մէջ, այլ նաեւ՝ այն միլիառաւորները որոնք յարութեամբ ետ կեանքի պիտի բերուին։ Վերջապէս, երկրի վրայ ապրող իւրաքանչիւր անձ պիտի սորվի իր ազատ կամքը պատշաճօրէն գործածել Աստուծոյ օրէնքներուն սահմաններուն մէջ։ Արդիւնքը ի՞նչ պիտի ըլլայ։ «Հեզերը պիտի ժառանգեն երկիրը ու խաղաղութեան առատութիւնովը պիտի ուրախանան»։—Սաղմոս 37։11
Մեծ Ազատութիւններ Նոյնիսկ Հիմա
17. Մովսէս ի՞նչ ըսաւ Աստուծոյ վաղեմի ժողովուրդին որ ընէ։
17 Երբ վաղեմի Իսրայելացիները Խոստացեալ Երկրին սեմին կը գտնուէին, Մովսէս անոնց խօսեցաւ, ու ըսաւ. «Ահա ձեզի կանոններ ու դատաստաններ սորվեցուցի, ինչպէս իմ Տէր Աստուածս ինծի պատուիրեց, որպէսզի անոնք գործադրէք այն երկրին մէջ, ուր պիտի մտնէք ժառանգելու համար։ Ուստի դուք անոնք պահեցէք ու ըրէք. վասնզի ձեր իմաստութիւնն ու հանճարը այս պիտի ըլլայ ազգերուն առջեւ, որոնք այս բոլոր կանոնները լսելով պիտի ըսեն. ‘Իրաւցընէ այս մեծ ազգը իմաստուն ու հանճարեղ ժողովուրդ մըն է’։ Քանզի ո՞ր ազգը այնչափ մեծ է, որուն աստուածները իրեն այնքան մօտ ըլլան, որքան մեր Եհովա Աստուածը մեզի մօտ է՝ ամէն ատեն երբ իրմէ կը խնդրենք»։—Բ. Օրինաց 4։5–7
18. Աստուծոյ ծառայողները ի՞նչ ազատութիւններ կը վայելեն նոյնիսկ հիմա։
18 Ներկայիս, Եհովան պաշտող միլիոնաւորներ ալ կը գտնուին խոստացեալ երկրի մը՝ նոր աշխարհին՝ սեմին։ Քանի որ անոնք Աստուծոյ օրէնքներուն կը հնազանդին, Ան անոնց մօտ է, իսկ անոնք բոլոր մարդոցմէ տարբեր են։ Արդէն Աստուած զիրենք ազատագրած է սուտ կրօնական գաղափարներէ, ցեղապաշտութենէ, թմրեցուցիչի անօրէն գործածութենէ, ազգայնականութենէ, պատերազմէ եւ սեռայինօրէն փոխանցուած ախտերու համաճարակէն։ Ասկէ զատ, ան զանոնք միացուցած է անբեկանելի սիրոյ միջազգային եղբայրութեան մը մէջ։ (Յովհաննու 13։35) Անոնք ապագայի մասին չեն խռովիր, այլ՝ ‘սրտի ուրախութեամբ կը ցնծան’։ (Եսայեայ 65։14) Որպէս Իշխան՝ Աստուծոյ ծառայելով, անոնք ի՜նչ հոյակապ ազատութիւններ կը վայելեն նոյնիսկ հիմա։—Գործք 5։29 ՆԱ, 32. Բ. Կորնթացիս 4։7. Ա. Յովհաննու 5։3
Ուրիշները Ազատագրել Սուտ Հաւատալիքներէ
19, 20. Մարդիկ ինչպէ՞ս ազատագրուած են մեռելներուն վիճակին մասին Աստուածաշունչի ուսուցումով։
19 Բազմաթիւ անհատներ ալ որոնց Եհովայի Վկաները կը քարոզեն, իրենց կարգին, այս ազատութիւնները կը գտնեն։ Օրինակի համար, այն երկիրներուն մէջ ուր նախնիքներու պաշտամունք կը մատուցուի, Եհովայի Վկաները մարդոց կը գիտցնեն թէ մեռելները ոչ մէկ տեղ կենդանի են եւ չեն կրնար ողջ եղողներուն վնասել։ Վկաները կը մատնանշեն Ժողովողի 9։5–ին, որ կ’ըսէ. «Անոնք որ կ’ապրին, գիտեն թէ պիտի մեռնին. բայց մեռելները բան մը չեն գիտեր»։ Անոնք նաեւ կ’ակնարկեն Սաղմոս 146։4–ին, որ կ’ըսէ թէ երբ անհատ մը մեռնի, «անիկա իր հողը կը դառնայ։ Նոյն օրը անոր խորհուրդները կը կորսուին»։ Ուստի Աստուածաշունչը ցոյց կու տայ թէ բուժումներ ընող, կամ ողջ եղողները սարսափեցնող, ստուերային ոգի կամ անմահ հոգի մը չկայ։ Ուստի, հարկ չկայ դժուար շահուած դրամը վատնել բուժակ–կախարդներու կամ քահանաներու սպասարկութիւններուն համար։
20 Աստուածաշունչի այս ճշգրիտ գիտութիւնը անհատ մը կ’ազատագրէ դժոխքի եւ քաւարանի սուտ ուսուցումներէն։ Երբ մարդիկ կը սորվին Աստուածաշունչի ճշմարտութիւնը թէ մեռելները անգիտակից են որպէս թէ խոր քունի մէջ, այլեւս չեն մտատանջուիր իրենց ննջած սիրելիներուն համար։ Ընդհակառակը, անոնք կը սպասեն այն հոյակապ ժամանակին, որու մասին Պօղոս առաքեալ խօսեցաւ, երբ ըսաւ. «Մեռելներուն յարութիւն պիտի ըլլայ, թէ՛ արդարներուն եւ թէ՛ մեղաւորներուն»։—Գործք 24։15
21. Անկասկած որո՞նք ալ պիտի ըլլան յարուցեալներուն մէջ, եւ հաւանաբար ի՞նչ պիտի ըլլայ անոնց հակազդեցութիւնը։
21 Մեռելները յարութեամբ ետ կեանքի պիտի բերուին ժառանգուած ադամական մահէն յաւիտեան ազատագրուած երկրի վրայ։ Անկասկած յարուցուողներուն մէջ պիտի ըլլան Քանանացիներու չաստուածներուն, ինչպէս Մողոքին, զոհ մատուցուած մանուկները, Ազթէքներու չաստուածներուն համար զոհ մատուցուած երիտասարդները եւ պատերազմի աստուծոյն զոհ գացած անհամար միլիոնաւորները։ Այս սուտ հաւատալիքներուն նախկին զոհ եղած անհատները որքա՜ն պիտի հիանան եւ ուրախ պիտի ըլլան։ Այս յարուցեալները այն ատեն պիտի կարենան ուրախութեամբ աղաղակել. «Ո՛վ մահ, ո՞ւր է քու տանջանքդ։ ... Ո՛վ գերեզման, ո՞ւր է աւերումդ»։—Ովսեայ 13։14
Եհովան Փնտռեցէք
22. Եթէ կ’ուզենք Աստուծոյ նոր աշխարհին մէջ ապրիլ, ի՞նչ բան ի մտի պէտք է պահենք։
22 Կ’ուզէ՞ք ապրիլ Աստուծոյ արդար նոր աշխարհին մէջ, ուր իրական ազատութիւն պիտի տիրէ։ Եթէ այո, սրտանց ուշադրութիւն ընծայեցէք Բ. Մնացորդաց 15։2–ի խօսքերուն. «Տէրը ձեզի հետ է, քանի որ դուք անոր հետն էք ու եթէ զանիկա փնտռէք, զանիկա պիտի գտնէք. բայց եթէ զանիկա թողուք, անիկա ալ ձեզ պիտի թողու»։ Իսկ ի մտի պահեցէք որ Աստուծոյ մասին սորվելու եւ զինք հաճեցնելու ձեր անկեղծ ջանքերը աննկատ պիտի չմնան։ Եբրայեցիս 11։6–ը կ’ըսէ որ Աստուած «վարձահատոյց կ’ըլլայ անոնց, որ զինք կը փնտռեն»։ Իսկ Հռովմայեցիս 10։11–ը կ’ըսէ. «Ամէն ո՛վ որ անոր հաւատայ, պիտի չամչնայ»։
23. Ինչո՞ւ պէտք է ողջունենք Աստուծոյ նոր աշխարհը ուր ազատութիւն պիտի տիրէ։
23 Աստուծոյ նոր աշխարհը ուր իրական ազատութիւն պիտի տիրէ հորիզոնին վրայ է։ Հոն «ստեղծուածները իրենք ալ ապականութեան ծառայութենէն ազատուելով, Աստուծոյ որդիներուն փառաւոր ազատութեանը պիտի հասնին»։ Իսկ «[Աստուած] անոնց աչքերէն բոլոր արցունքները պիտի սրբէ եւ ա՛լ մահ պիտի չըլլայ։ Ո՛չ սուգ եւ ո՛չ աղաղակ եւ ո՛չ ցաւ պիտի ըլլայ ասկէ յետոյ»։ (Հռովմայեցիս 8։21. Յայտնութիւն 21։4) Այն ատեն, Եհովայի բոլոր ծառաները իրենց գլուխները պիտի բարձրացնեն եւ ցնծութեամբ պիտի ողջունեն Աստուծոյ նոր աշխարհը ուր ազատութիւն պիտի տիրէ, բացագանչելով. ‘Շնորհակալ ենք, Եհովա, վերջապէս այս իրական ազատութեան համար’։
Ինչպէ՞ս Պիտի Պատասխանէիք
◻ Եհովա իր ծառաները ազատագրելու իր կարողութիւնը ինչպէ՞ս ապացուցանեց։
◻ Աստուծոյ նոր աշխարհին մէջ ի՞նչ սքանչելի ազատութիւններ պիտի ըլլան։
◻ Եհովա ինչպէ՞ս անհատները կեանքի համար կը դաստիարակէ։
◻ Ի՞նչ են կարգ մը ազատութիւնները զորս Աստուծոյ ժողովուրդը իրեն ծառայելով կը վայելէ նոյնիսկ հիմա։
[Նկար՝ էջ 10]
Եհովա Եգիպտոսի սուտ աստուածներուն վրայ իր գերակայութիւնը ցոյց տուաւ իր երկրպագուները ազատագրելով
[Նկարներ՝ էջ 12,13]
Աստուծոյ այժմու ճշմարիտ ծառաները կը բնորոշուին իր դաստիարակչութեան համերկրային գործը կատարելով եւ իր անունը կրելով