Կերպեր՝ Մեր Թագաւորութեան Քարոզչութիւնը Բարելաւելու
1 Մեր քարոզչական գործը հիմա որեւէ ժամանակէ աւելի ստիպողական է։ Մարդոց ողջ մնալը կամ մեռնիլը կախեալ պիտի ըլլայ իրենց հակազդեցութենէն բարի լուրին։ (Ա. Պետ. 4։5, 6, 17. Յայտ. 14։6, 7) Այս պատճառով պէտք է միշտ կերպեր փնտռենք մեր Թագաւորութեան քարոզչութիւնը բարելաւելու։
2 Լաւ Նախապատրաստուեցէք. Գործածելով Մեր Թագաւորութեան Ծառայութիւն թերթիկին ընթացիկ թիւը, ընտրեցէք ներկայացում մը որ կը զգաք թէ կոչ պիտի ընէ ձեր թաղամասին մէջ եղող մարդոց մեծամասնութեան։ Կարեւոր է որ ձեր նշմարները յարմարցնէք տեղական պարագաներուն։ Կամ կրնաք նախընտրել որ անձնական ներկայացում մը պատրաստէք, գործածելով այն գաղափարները եւ սուրբ գրային համարները որոնց ազդեցիկ ըլլալը անձամբ նկատած էք։ Կարիքը պիտի ունենաք հետաքրքրաշարժ բացումի մը։ (Տես Պատճառաբանել գիրքը, էջ 9-15։) Թերեւս կը ծրագրէք միտք գրգռող հարցում մը հարցնել կամ տանտիրոջ մեկնաբանութիւնը խնդրել տեղականօրէն ուշադրութիւն գրաւող լուրի մը մասին։ Երբ ձեր ներկայացումը կ’որոշէք, զայն փորձ ըրէք ձեր ընտանիքի անդամի մը հետ կամ ուրիշ հրատարակիչի մը հետ, որ կրնայ թելադրութիւններ առաջարկել ձեր բարելաւման համար։
3 Խօսակցեցէք Մարդոց Հետ. Մեր նպատակն է կարեւոր պատգամ մը հաղորդել։ Ասիկա կարելի է ընել մեր ունկնդիրը միջամուխ ընելով նշանակալից խօսակցութեան մը։ Եթէ տանտէրը առարկութիւն մը յարուցանէ կամ կարծիք մը ներկայացնէ, անոր ըսածին ուշադրութեամբ մտիկ ըրէք։ Անոր մեկնաբանութիւնները ձեզի պիտի օգնեն որ ձեր յոյսին համար Սուրբ Գրային պատասխան մը տաք։ (Ա. Պետ. 3։15) Եթէ անոր տեսակէտը չի համաձայնիր Աստուածաշունչին հետ, կրնաք փափկանկատութեամբ ըսել. «Շատեր ձեզի պէս կը խորհին։ Այսուհանդերձ, ահաւասիկ ուրիշ կերպ մը հարցը դիտելու»։ Ապա կարդացէք յարմար համար մը եւ տանտիրոջ մեկնաբանութիւնը խնդրեցէք։
4 Դիւրաթեք Յայտագիր մը Ունեցէք. Լաւ պատրաստուած ըլլալը չնչին արժէք պիտի ունենայ եթէ չկարենաք խօսիլ մարդոց հետ։ Այսօր սովորաբար միայն մի քանի տանտէրներ իրենց տունը կ’ըլլան երբ կ’այցելենք։ Եթէ այդ է պարագան ձեր թաղամասին մէջ, փորձեցէք ձեր յայտագիրը վերաճշդել այնպէս որ կարենաք աշխատիլ տունէ տուն երբ աւելի անհատներ իրենց տունը կը գտնուին։ Թերեւս նկատէք որ այցելելու լաւագոյն ժամանակը շաբաթավերջերն են. ուրիշներ կրնան աւելի դիւրամատչելի ըլլալ շաբթուան ընթացքին, բայց երեկոյեան կանուխ ժամերուն։ Կարգ մը շրջաններուն մէջ հրատարակիչներ նպաստաւոր գտած են վկայելը աշխարհային տօներուն ատեն, քանի որ աւելի անհատներ կը գտնուին իրենց տունը։ Այսպիսի ժամանակներուն մէջ մարդիկ ընդհանրապէս լաւ տրամադրութիւն կ’ունենան եւ թերեւս աւելի յօժար կ’ըլլան խօսակցելու։ Լաւ պիտի ըլլայ որ ձեր բացումը յարմարցնէք առիթին եւ ապա կապէք ձեր նշմարները Սուրբ Գրային բնաբանի մը հետ։
5 Ձեր Ներկայացումին Ազդուութիւնը Վերլուծեցէք. Իւրաքանչիւր դուռ ձգելէ ետք, դուք ձեզի հարցուցէք. ‘Տանտիրոջ սրտին հասա՞յ։ Զինք մղեցի՞ որ իր գաղափարները արտայայտէ եւ ուշադրութիւն ընծայեցի՞ իր ըսածին։ Փափկանկատութեամբ պատասխանեցի՞։ Պարագաներուն ի տես, լաւագոյն մեթոտը գործածեցի՞’։ Կրնայ օգտակար ըլլալ փորձառու հրատարակիչի մը կամ ռահվիրայի մը հետ աշխատիլը ժամանակ առ ժամանակ եւ ուշադրութեամբ մտիկ ընել անոր ներկայացումներուն, այն նպատակով որ բարելաւէք ձեր ազդուութիւնը ծառայութեան մէջ։
6 Եթէ հմուտ ես քու գործիդ մէջ, պիտի կարենաս Թագաւորութեան ճշմարտութիւնները բաժնել, որոնք «քեզ ալ պիտի ապրեցնե[ն] ու զանոնք ալ, որոնք քեզի մտիկ կ’ընեն»։—Ա. Տիմ. 4։16. Առ. 22։29