Ռահվիրայական Ծառայութեան Մէջ Յաւելեալ Եղբայրներու Կարիքը Կայ

¹ Պօղոս յորդորեց մեզ որ ‘ամէն ատեն աւելնանք Տէրոջը գործին մէջ’։ (Ա. Կորն. 15։58) Շատերուն համար ասիկա կը նշանակէ ռահվիրայական ծառայութիւնը ձեռնարկել։ Անցեալ Սեպտեմբերին, աւելի քան 5,000 անհատներ ռահվիրաներուն շարքին միացան։

² Ներկայիս Միացեալ Նահանգներուն մէջ ռահվիրաներուն մեծամասնութիւնը քոյրեր է։ (Սաղմ. 68։11, ՆԱ) Ժողովքին համար ի՜նչ ուրախութիւն պիտի ըլլայ եթէ յաւելեալ եղբայրներ կարենան լիաժամ ծառաներու շարքին միանալ։ (Սաղմ. 110։3) Հասկնալի է որ շատ մը եղբայրներ աշխարհային ու ընտանեկան ծանր պարտաւորութիւններու պէտք է հոգ տանին։ Ուրիշներ նաեւ ծանր կ’աշխատին ժողովքին հոգեւոր կարիքներուն հոգ տանելու համար։ Մենք կը գնահատենք այս այրերը, որոնք Թագաւորութեան ի նպաստ կը ճգնին։—Ա. Տիմ. 4։10

³ Այսուհանդերձ, ո՛վ եղբայրներ, ձեզմէ յաւելեալ անհատներ կրնա՞ն ռահվիրայական ծառայութիւնը ձեռնարկել։ Եթէ կինդ ռահվիրայ մըն է, կրնա՞ս անոր միանալ։ Եթէ գործէ քաշուած ես, չե՞ս համաձայնիր որ լիաժամ ծառայութիւնը ժամանակդ գործածելու ամենէն գոհացուցիչ կերպն է։ Եթէ դպրոցը աւարտելու վրայ ես, լրջօրէն ու աղօթքով նկատի առա՞ծ ես ռահվիրայական ծառայութեան մասնակցիլը որպէս ոտնաքար մը ծառայութեան յաւելեալ առանձնաշնորհումներու։—Եփ. 5։15–17

⁴ Եղբայր մը իր բարգաւաճ ասպարէզը ծախեց ու մասնակի ժամանակով աշխատանքի սկսաւ, որպէսզի կարենայ ռահվիրայութեան մասնակցիլ։ Անոր ընտիր առաջնորդութեան շնորհիւ, իր չորս զաւակներէն երեքը ռահվիրաներ եղան, երբ դպրոցը աւարտեցին։ Չորրորդը անհամբեր էր անոնց միանալու։ Այս եղբայրը ու անոր ընտանիքը մեծապէս օրհնուեցան։

⁵ Մեծ Դուռ մը Բացուած Է. Ռահվիրայական ծառայութիւնը կրնայ «մեծ ու արդիւնաւոր դուռ մը» բանալ։ (Ա. Կորն. 16։9) Ռահվիրայ եղբայրները կրնան ընդլայն կերպով գործածուիլ ժողովքին մէջ։ Դաշտի նախանձախնդիր ծառայութիւնը կ’ամրացնէ անոնց հոգեւոր վիճակը ու կը նպաստէ անոնց աստուածպետական յառաջդիմութեան։ Ռահվիրայութիւնը կրնայ ճամբան հարթել ծառայութեան յաւելեալ առանձնաշնորհումներու։ Ռահվիրայութեան առաջին տարին ամբողջացնելէ ետք, Ռահվիրաներու Ծառայութեան Դպրոցը յաճախելու օրհնութիւնը մատչելի է։ Ամուրի օգնական ծառաներ ու երէցներ կրնան ցանկալ Ծառայութեան Մարզումի Դպրոցը յաճախել։ Որակելի զոյգեր կրնան Գաղաադու Դպրոցին համար դիմումնագիր ներկայացնել։ Եղբայրներ վերջապէս կրնան որակելի ըլլալ որպէս շրջանային տեսուչներ։ Այո, ռահվիրայական ծառայութիւնը մատչելի կը դարձնէ ծառայութեան այս աւելի մեծ առանձնաշնորհումները Եհովայի կազմակերպութեան մէջ։

⁶ Այն եղբայրները որոնք իրենց գործունէութիւնները կարգի կը դնեն, որպէսզի կանոնաւոր ռահվիրայութեան մասնակցին, կրնան շատ տալէն յառաջ եկած աւելի մեծ ուրախութիւնը վայելել։—Գործք 20։35