Բարի Լուրը Առանց Դանդաղելու Յայտարարենք

¹ Նախկին Քրիստոնեաները իրենց ծառայութիւնը շատ լուրջի առած էին։ Ղուկաս տեղեկագրեց. «Ամէն օր տաճարը ու տուներուն մէջ չէին դադարիր սորվեցնելէ ու Յիսուս Քրիստոսը քարոզելէ»։ (Գործք 5։42) Ոչինչ, նոյնիսկ հալածանքը, կրնար զանոնք կասեցնել։ (Գործք 8։4) Անոնք ամէն օր ճշմարտութեան մասին ուրիշներուն կը խօսէին։

² Ի՞նչ կրնանք ըսել մեր մասին։ Դուք ձեզի հարց տուէք. ‘Ժամանակներուն ստիպողականութիւնը կը զգա՞մ։ Հակում ունի՞մ որ բարի լուրը առանց դանդաղելու յայտարարեմ’։

³ Առանց Դանդաղելու Քարոզելու Արդի Օրինակներ. Քոյր մը, որ մանկական անդամալուծութեան զոհ գացած էր, դատապարտուած էր անկողինը մնալ ու արուեստական շնչառութեամբ ապրիլ։ Ան չէր կրնար Թագաւորութեան Սրահը երթալ կամ համաժողովի մը ներկայ գտնուիլ։ Սակայն, ան բարի լուրը յայտարարելով շատ զբաղած էր։ Իր արգելափակուած վիճակին 37 տարիներուն ընթացքին, ան կրցաւ 17 անհատներու օգնել որ ճշմարտութիւնը սորվին։ Ան ասիկա ինչպէ՞ս ըրաւ։ Թէեւ անկարող էր դռնէ դուռ երթալու, սակայն ան ամէն օր կերպ մը կը գտնէր անպաշտօն կերպով վկայելու անոնց, որոնք իրեն կը հանդիպէին։

⁴ Պոզնիոյ մէջ, մեր եղբայրները ստիպուած էին պատերազմի ու զրկանքի հետ գլուխ ելլել։ Այսուհանդերձ, անոնք կը շարունակեն կանոնաւորաբար ուրիշներուն քարոզել։ Սարայեվոյի մէջ հրատարակիչները ամէն ամիս որպէս միջին 20 ժամ տրամադրած են բարի լուրին մասին ուրիշներուն խօսելու, եւ իւրաքանչիւր հրատարակիչ որպէս միջին երկու ուսումնասիրութիւններ կը վարէ։ Հակառակ անոնց դժուար պարագաներուն, անոնք առանց դանդաղելու կը քարոզեն ու կը սորվեցնեն։

⁵ Պատանիներն ալ ծառայութեան հանդէպ նախանձախնդրութիւն կը ցուցաբերեն։ Րվանտայի մէջ Վկայ ընտանիք մը սենեակի մը մէջ դրուեցաւ, ուր զինուորները պատրաստուեցան զանոնք սպաննելու։ Ընտանիքը արտօնութիւն խնդրեց որ նախ աղօթէ։ Երբ ասիկա շնորհուեցաւ, ընտանիքին պզտիկ աղջիկը՝ Դեբօրան՝ բարձրաձայն աղօթեց. «Եհովա, այս շաբաթ ես եւ հայրիկը հինգ պարբերաթերթեր տեղաւորեցինք։ Ի՞նչպէս պիտի կարենանք այդ մարդոց վերադառնալ, անոնց ճշմարտութիւնը սորվեցնելու եւ օգնելու որ կեանք ձեռք ձգեն»։ Անոր զօրաւոր հաւատքին ու ծառայութեան հանդէպ անոր ունեցած սիրոյն շնորհիւ, ամբողջ ընտանիքը ողջ մնաց։

⁶ Ներկայիս, կարիք կայ ուրիշներուն վկայելու պատեհութիւնները չփախցնելու եւ «յաւիտենական կեանքի սահմանուած» անհատները փնտռելու։ (Գործք 13։48) Տեղական պարագաներուն համաձայն, ժողովքի երէցները խմբական վկայութեան համար յարմար կարգադրութիւններ կ’ընեն, ըլլան առաւօտները, կէսօրէ ետքերը կամ երեկոները։ Մեր Թագաւորութեան Ծառայութիւնը թերթիկին կարգ մը յօդուածները եւ Ծառայութեան Ժողովին, շրջանային ու նահանգային համաժողովներուն կարգ մը բաժինները այժմէական թելադրութիւններ ու քաջալերութիւն կը մատուցանեն Թագաւորութեան վկայութեան զանազան երեսակներուն մասնակցելու համար։ Ասկէ զատ, շրջանային ու նահանգային տեսուչները հրատարակիչները կը մարզեն փողոցի վկայութեան մէջ, ցոյց կու տան ինչպէ՛ս առեւտրական թաղամասերը աշխատցնել ու տարբեր կերպերու կը մատնանշեն վկայութիւն մը տալու համար ուր որ ալ մարդիկ գտնուին։ Այս բոլորը կը շեշտեն որ բարի լուրը առանց դանդաղելու յայտարարենք։

⁷ Յիսուսի առաքեալները համարձակութեամբ յայտարարեցին. «Մենք զայն որ տեսանք ու լսեցինք՝ չենք կրնար չխօսիլ»։ Անոնք ինչպէ՞ս յարատեւեցին հակառակ բոլոր խոչընդոտներուն։ Անոնք Եհովայէ խնդրեցին որ իրենց օգնէ, իսկ ինք ասիկա ըրաւ ու «ամէնքը սուրբ հոգիով լեցուեցան ու Աստուծոյ խօսքը համարձակ կը խօսէին»։ (Գործք 4։20, 29, 31) Թերեւս ամէն անհատ ծառայութեան մէջ ուշագրաւ փորձառութիւններով չօրհնուի, սակայն եթէ իրապէս կը փափաքինք բարի լուրը առանց դանդաղելու յայտարարել ու եթէ ջանք կը թափենք նոյնիսկ ամէն օր այդպէս ընելու, Եհովա պիտի օգնէ մեզի։