Աստուծոյ տուած գիտութիւնը կը պատասխանէ շատ հարցումներու

¹ Ճշմարտութեան մասին ճշգրիտ գիտութիւն ստանալէ առաջ, կեանքի մասին հաւանաբար բազմաթիւ հարցումներ ունէիք, որոնց անկարող էիք պատասխանել։ Որքա՜ն ուրախացաք, երբ անոնց մասին Աստուածաշունչի վրայ հիմնուած պատասխաններ ստացաք։ Ներկայիս, կրնաք ուրիշներուն օգնել միեւնոյն պատասխանները գտնելու։ (Բաղդատել՝ Բ. Տիմոթէոս 2։2։) Անոնց հետ կրնաք բաժնել յաւիտենական կեանքի առաջնորդող՝ Աստուծոյ գիտութիւնը։ (Յովհ. 17։3) Սակայն, ի՞նչպէս կրնաք անհատի մը օգնել, որ գնահատէ այս գիտութեան արժէքը։ Խորհեցէք ձեր ունեցած հարցումներուն մասին, որոնց պատասխանեց ճշմարտութիւնը։ Ճշմարտութիւն փնտռողները ի՞նչ կը ցանկան գիտնալ։ Այս գաղափարները ի մտի ունենալը կրնայ օգնել ձեզի ներկայացնելու՝ Գիտութիւնը որ Յաւիտենական Կեանքի կ’Առաջնորդէ գիրքը։ Հետեւեալ թելադրութիւնները կրնան օգնել, երբ Յունիս ամսուան ընթացքին վկայելու կը պատրաստուիք։

² Քանի որ շատ անհատներ հարց կու տան թէ ինչո՛ւ աշխարհի մէջ այսքան շատ տառապանք կայ, հետեւեալ մօտեցումը կրնայ դրական ընդառաջում գտնել.

◼ «Երբ աղէտներ հարուածեն, կամ երբ ոճրարարքներն ու բռնարարքները աւելնան, յաճախ մարդիկ հարց կու տան թէ այսպիսի ահռելի բաներ ինչո՛ւ կը պատահին։ Ձեր պատասխանը ի՞նչ պիտի ըլլայ»։ Թոյլ տուէք որ պատասխանէ, եւ տրուած պատասխանը նկատի առէք։ Ապա բացէք Գիտութիւն գրքին 8–րդ գլուխը եւ ուշադրութիւն հրաւիրեցէք 2–րդ պարբերութեան բովանդակութեան։ Բացատրեցէք թէ այս գիրքը կը ներկայացնէ Աստուածաշունչի տուած բացատրութիւնը, թէ ինչո՛ւ գէշ բաներ կը պատահին, եւ ըսէք. «Կը փափաքիմ այս օրինակը ձեր քով ձգել, եթէ կը խոստանաք զայն կարդալ»։ Եթէ գիրքը ընդունի, նուիրատուութեան կարգադրութիւնը բացատրեցէք։

³ Երբ վերադառնաք հոն ուր «Գիտութիւն» գիրքը տեղաւորած էիք, կրնաք ըսել.

◼ «Հետաքրքիր եմ գիտնալու թէ աշխարհի մէջ այսքան շատ տառապանք ըլլալուն մասին ի՛նչ եզրակացութեան յանգեցաք։ Գրքին մէջ ուրուագծուած Աստուածաշունչի պատասխանին հետ համաձա՞յն էք»։ Թոյլ տուէք որ պատասխանէ։ Կարդացէք Գիտութիւն գրքին էջ 77, պարբերութիւն 17–ն, եւ առաջարկեցէք իր Աստուածաշունչէն Հռովմայեցիս 9։14–ը կարդալ։ Ապա ըսէք. «Բարի լուրը այն է, որ Աստուած անիրաւօրէն ցաւ ու տառապանք չի պատճառեր մեզի։ Ան խաղաղութեամբ եւ ուրախութեամբ լեցուն յաւիտենական կեանք խոստացած է։ Այս գրքին առաջին գլուխին խորագիրն է՝ ‘Ուրախ Ապագայ մը Կրնաք Ունենալ’։ Կը փափաքիմ բացատրել թէ ասիկա ձեզի ու ձեր սիրելիներուն համար ի՛նչպէս կարելի է»։ Բացէք առաջին գլուխը, եւ ցուցադրեցէք մեր ուսումնասիրութեան մեթոտը։ Պարագաներուն ներած չափով, այս գլուխէն մաս մը նկատի առէք։

⁴ Թերեւս ընտրէք գործածել «Պատճառաբանել» գրքին 14–րդ էջին մէջ յիշուած բացումը, «Ծերութիւն/Մահ» ենթագլուխին տակ.

◼ «Երբեք հարց տուա՞ծ էք. ‘Արդեօք մահը ամէն բանի վե՞րջն է։ Թէ ոչ կեանքէն ետք ուրիշ բան մը կայ’։ [Թոյլ տուէք որ պատասխանէ։] Աստուածաշունչը մահուան մասին մեր ունեցած բոլոր հարցումներուն բացատրութիւն կու տայ։ [Կարդացէք Ժողովողի 9։5, 10։] Անիկա ցոյց կու տայ նաեւ թէ հաւատք ունեցողներուն իսկական յոյս մը կայ։ [Բացէք Գիտութիւն գրքին, էջ 84, պարբերութիւն 13–ը. կարդացէք ու բացատրեցէք Յովհաննու 11։25–ի մէջ գտնուող Յիսուսի խօսքերը։] Այս ամբողջ գլուխը յատկացուած է պատասխանելու հետեւեալ հարցումին. Ի՛նչ կը պատահի մեր սիրելի ննջեցեալներուն։ Եթէ կը փափաքիք զայն կարդալ, կրնամ այս օրինակը ձեր քով ձգել»։ Տանտիրոջ պատեհութիւնը շնորհեցէք նուիրատուութիւն մը ընելու։

⁵ Երբ վերայցելութիւն կ’ընէք, կրնաք ձեր ծանօթութիւնը նորոգել, ապա ըսել.

◼ «Նախապէս խօսեցանք թէ ի՛նչ կը պատահի երբ անհատ մը մեռնի։ Շատեր կը հաւատան որ մահէն ետք որեւէ տեսակի կեանք, կա՛մ երկինքը եւ կամ դժոխքի մէջ պիտի ըլլայ։ Սակայն, երբեք մտածա՞ծ էք մեռելները դարձեալ հո՛ս երկրի վրայ ապրելու կարելիութեան մասին։ [Թոյլ տուէք որ պատասխանէ։] Ըստ Աստուածաշունչին, յարութիւն առնողները երկիրը ժառանգող հեզերուն մաս պիտի կազմեն։ [Կարդացէք Սաղմոս 37։11, 29, ապա նկատի առէք Գիտութիւն գրքին, էջ 88, պարբերութիւն 20–ը։] Այս յոյսը, մահուան վախով ապրող միլիոնաւոր անհատներու մխիթարութիւն տուած է։ Այս գիրքը պիտի օգնէ ձեզի որ նիւթը աւելի լաւ կերպով հասկնաք։ Կրնա՞մ ցուցադրել թէ ի՛նչպէս»։

⁶ Եթէ պարզ ներկայացում մը կը նախընտրէք, կրնաք ասիկա փորձել.

◼ «Կը փափաքիմ Գիտութիւնը որ Յաւիտենական Կեանքի կ’Առաջնորդէ գրքէն պատկեր մը ցոյց տալ ձեզի։ Ասիկա գեղեցիկ պատկեր մը չէ՞»։ Բացէք գիրքը որպէսզի տանտէրը 4-5–րդ էջերը կարենայ տեսնել։ Թոյլ տուէք որ պատասխանէ։ Ապա կարդացէք 5–րդ էջին մէջ յիշուած խօսքերը։ Եզրափակեցէք ըսելով. «Կրնաք այս գիրքը ունենալ ու անձամբ կարդալ։ Թէեւ ձրի է, սակայն մեր երկրածաւալ գործին համար փոքր նուիրատուութիւններ կ’ընդունինք»։ Ցուցաբերուած որեւէ հետաքրքրութիւն հետապնդելու համար, տեղեկացէք թէ վերադառնալու յարմարագոյն ժամանակը ե՛րբ է։

⁷ Մենք Աստուծոյ տուած այն գիտութիւնը ունինք, որ կեանքի կարեւոր հարցումներուն կը պատասխանէ։ Ժրաջանօրէն պատրաստուեցէք ու Եհովա պիտի օրհնէ՝ ճշմարտութիւնը փնտռողներուն հետ այս կենսատու տեղեկութիւնները բաժնելու ձեր ջանքերը։