Օգոստոսը Մասնայատուկ Ամիս մը Պիտի Ըլլա՞յ
1 1963–ը Եհովայի ժողովուրդին համար մասնայատուկ տարի մըն էր։ Գիտէ՞ք պատճառը։ Այդ տարի համայն աշխարհի մէջ հրատարակիչներու թիւը մէկ միլիոնի հասաւ։ Եթէ դուք այդ ժամանակ ճշմարտութեան մէջ էիք, թերեւս կը յիշէք թէ որքա՜ն ուրախացանք Թագաւորութեան պատգամը քարոզողներուն թիւը այսքան շատ ըլլալով։ Ներկայիս, միայն Միացեալ Նահանգներուն մէջ նոյն թիւով հրատարակիչներ կան։ Սակայն, իւրաքանչիւր ամիս, միջին հաշուով 90,000 հոգի ծառայութեան տեղեկագիր չեն ներկայացներ։
2 Մարտահրաւէրը Ընդունեցէք. Օգոստոսի ընթացքին կը ջանանք Միացեալ Նահանգներու մէջ հրատարակիչներու թիւը անզուգական բարձրակէտի մը՝ մէկ միլիոնի՝ հասցնել։ Եթէ մեր ջանքերը յաջողին, Օգոստոսը իրապէս մասնայատուկ ամիս մը պիտի ըլլայ։ Կրնանք այդ նպատակակէտը իրագործել, եթէ ամէն մէկս իր բաժինը բերէ։
3 Անոնք որոնք կը ծրագրեն արձակուրդ առնել, կրնան ճամբորդելէ առաջ ծառայութեան համար որոշ ժամանակ յատկացնել։ Ձեր հետ առէք թերթիկներ, գրքոյկներ կամ պարբերաթերթեր, որպէսզի կարենաք ճամբուն վրայ ձեր հանդիպած մարդոց վկայութիւն մը տալ։ Նաեւ, ձեր այցելած շրջանին մէջ կրնաք տեղական ժողովքի հրատարակիչներուն հետ ծառայութեան ելլել։
4 Եթէ ֆիզիքապէս անկարող էք, տակաւին կրնաք ծառայութեան մէջ մասնակցութիւն մը բերել։ Թերեւս կարենաք բժիշկներուն, հիւանդապահուհիներուն կամ այցելուներուն վկայել։ Թերեւս կրնաք նամակով կամ հեռաձայնով վկայել։
5 Ոմանք անկասկած պիտի գնահատեն օգնութիւն ստանալ, որպէսզի Օգոստոսին դաշտի ծառայութեան մասնակցին։ Երէցները, օգնական ծառաները եւ գրքի ուսումնասիրութեան վարիչները պէտք է մատչելի դարձնեն այս օգնութիւնը։ Ամէն պարագայի, մի՛ մոռնաք ամսուան վերջը դաշտի ծառայութեան ձեր տեղեկագիրը շուտով ներկայացնելու, որպէսզի Օգոստոս ամսուն որպէս հրատարակիչ նկատուիք։
6 Առանձնաշնորհումին Վրայ Գուրգուրանք. Ծառայութիւնը «բարի աւանդ» մըն է։ (Բ. Տիմ. 1։14) Կը գնահատենք բարի լուրը քարոզելու մեզի տրուած առանձնաշնորհումը։ (Ա. Թես. 2։4) Եթէ Եհովայի մեզի համար ըրած բոլոր բաները նկատի առնենք, պիտի մղուինք ամբողջ տարուան ընթացքին այս ամենակարեւոր գործին մէջ շարունակաբար մեր մասնակցութիւնը բերել։ Թոյլ պէտք չէ տանք որ որեւէ բան մեր կանոնաւորաբար քարոզելուն արգելք հանդիսանայ։ Օգոստոս ամիսը Եհովայի ծառայութեան մէջ մասնայատուկ ամիս մը դարձնենք, եւ վճռենք անկէ ետք ամէն ամիս իր մասին վկայել։—Սաղմ. 34։1