Թագաւորութիւնը Կանոնաւո՞րաբար Ծանուցանող մըն Էք
1 Բոլորս ալ ուրախացանք, երբ լսեցինք որ Օգոստոս 1998–ին Միացեալ Նահանգները 1,040,283 հրատարակիչներու ցարդ բարձրագոյն թիւը ունեցաւ։ Ասիկա իրապէ՛ս միակամ եւ վճռակամ ջանքի ապացոյցն է։ Ըստ երեւոյթին, ասոր յաջորդող ամիսներուն, այս հրատարակիչներէն ոմանք Թագաւորութիւնը կանոնաւորաբար ծանուցանողներ ըլլալու մէջ դժուարութիւն ունեցած են, քանի որ անկէ ի վեր հրատարակիչներու ամսական միջինը եղած է շուրջ 940,000։ Ասիկա ցոյց կու տայ թէ 12 հրատարակիչներէն մէկը, ամէն ամիս ծառայութեան մասնակցած ըլլալը չէ տեղեկագրած։ Կը խորհինք թէ ստորեւ տրուած քաջալերութիւնը կրնայ այս կացութիւնը բարւոքել։
2 Առանձնաշնորհումը Գնահատեցէք. Խոր գնահատութիւն պէտք է ունենանք Թագաւորութեան բարի լուրը ուրիշներուն հետ բաժնելու մեր ունեցած առանձնաշնորհումին հանդէպ։ Այս գործունէութիւնը Եհովայի սիրտը կ’ուրախացնէ եւ պարկեշտ սիրտ ունեցող անհատներուն կ’օգնէ որ կեանքի ճամբան սորվին։ (Առ. 27։11. Ա. Տիմ. 4։16) Կանոնաւորաբար վկայելը ծառայութեան մէջ մեր փորձառութիւնը կը կերտէ, եւ՝ ուրախութիւն ու բան մը իրագործած ըլլալու զգացումը կու տայ մեզի։
3 Գործունէութիւնը Տեղեկագրեցէք. Դաշտի ծառայութեան մասնակցողներէն ոմանք, իրենց ծառայութիւնը ժամանակին տեղեկագրելու առնչութեամբ անհոգ են։ Երբեք պէտք չէ զգանք թէ մեր թափած ջանքերը տեղեկագրելը արժէք մը չի ներկայացներ։ (Համեմատել՝ Մարկոս 12։41-44) Ամէ՛ն գնով, մեր իրագործածը պէտք է տեղեկագրենք։ Ծառայութեան մէջ մեր տրամադրած ժամանակը արձանագրելու համար, տան մէջ միջոց մը՝ զոր օրինակ, օրացոյց մը գործածելը՝ մեզի յարատեւաբար պիտի վերյիշեցնէ որ ամէն ամսուան վերջաւորութեան անյապաղօրէն ճշգրիտ տեղեկագիր մը ներկայացնենք։
4 Հարկ Եղած Օգնութիւնը Մատուցանեցէք. Ձեր ժողովքին մէջ եղած կարգադրութիւնները թերեւս պէտք է բարեճշդուին, աջակցելու համար անոնց՝ որոնք ծառայութեան մէջ կանոնաւոր մասնակցութիւն բերելու համար օգնութեան կարիքը ունին։ Ժողովքի քարտուղարը եւ գրքի ուսումնասիրութեան վարիչները պէտք է կարգադրեն որ փորձառու հրատարակիչներ օգնութեան ձեռք մը տան։ Եթէ չմկրտուած զաւակներ կամ Աստուածաշունչի աշակերտներ ունիք, մարզեցէք զանոնք որ ամէն ամիս իրենց գործունէութիւնը տեղեկագրեն։
5 Յիշեցէք Դիտարան 1 Հոկտեմբեր 1997–ի մէջի (Անգլերէնով) կենսագրութիւնը՝ «Եհովայի Ծառայութեան Մէջ Երկար Կեանք մը Անցընելուս Համար Երախտապարտ Եմ»։ Նորվեկիացի Քոյր Օթթիլի Միտլէնտ, 1921–ին իր մկրտութենէն առաջ, բարի լուրի կանոնաւոր հրատարակիչ մը եղաւ։ Եօթանասունըվեց տարի ետք, 99 տարեկանին, ան ըսաւ. «Ուրախ եմ որ տակաւին կարող եմ կանոնաւոր հրատարակիչ մը ըլլալ»։ Բոլոր Եհովայի ծառաներուն կողմէ ընդօրինակուելիք ի՜նչ հոյակապ եւ օրինակելի կեցուածք մը։