Ռահվիրաներէն Պահանջուած Ժամերուն Նկատմամբ Բարեփոխութիւն
1 Բոլորս ալ կը գնահատենք ժողովքին մէջ ծանր աշխատող կանոնաւոր եւ օժանդակ ռահվիրաները։ Նոյնիսկ հոն ուր թաղամասը սահմանափակ է եւ կանոնաւորաբար ու լիովին կ’աշխատցուի, ռահվիրաները Թագաւորութեան ծառայութեան հանդէպ իրենց նախանձախնդրութեամբ, հոյակապ օրինակ մը հանդիսացած են։ Անոնք քաջալերած են որ բոլոր հրատարակիչները շարունակեն զբաղած մնալ շիտակ հակում ունեցող անհատները փնտռելու մէջ։—Գործք 13։48
2 Ընկերութիւնը ռահվիրաներուն դիմագրաւած բազմաթիւ դժուարութիւնները նկատի առած է, յատկապէս մասնակի ժամանակով աշխատանք մը գտնելու առնչութեամբ, որպէսզի անոնք իրենց անձնական կարիքներուն պատշաճօրէն հոգ տանելով լիաժամ ծառայութեան մէջ շարունակեն մնալ։ Շատ մը երկիրներու մէջ, տնտեսական ներկայ կացութիւնն ալ հետզհետէ աւելի կը դժուարացնէ որ ուրիշներ ռահվիրայութեան ձեռնարկեն, ասիկա ընելու սրտանց փափաքը ունենալով հանդերձ։ Վերջին քանի մը ամիսներուն, ասոնք եւ քանի մը ուրիշ ազդակներ ուշադրութեամբ նկատի առնուեցան։
3 Հետեւաբար, վերոյիշեալին ի տես, Ընկերութիւնը կանոնաւոր եւ օժանդակ ռահվիրաներուն նկատմամբ ժամերու պահանջը նուազեցուց։ Յունուար 1999–էն սկսեալ, կանոնաւոր ռահվիրաներէն ամիսը 70 ժամ պիտի պահանջուի, կամ՝ տարեկան 840 ժամ, իսկ օժանդակ ռահվիրաներէն՝ ամէն ամիս 50 ժամ։ Մասնաւոր ռահվիրաներէն եւ միսիոնարներէն պահանջուած ժամերը անփոփոխ պիտի մնան, քանի որ Ընկերութիւնը անոնց հիմնական նիւթական կարիքները հոգալու կարգադրութիւն ըրած է։ Այս կերպով, անոնք աւելի լման կերպով կրնան կեդրոնանալ քարոզելու եւ աշակերտելու իրենց աշխատանքին վրայ։
4 Կը յուսանք որ ժամերու պահանջքին նկատմամբ այս փոփոխութիւնը շատ մը ռահվիրաներու պիտի օգնէ որ ծառայութեան այս թանկագին առանձնաշնորհումին կառչած մնան։ Անիկա նաեւ ճամբայ պէտք է բանայ, որ աւելի շատ հրատարակիչներ կանոնաւոր եւ օժանդակ ռահվիրայութեան գործին ձեռնարկեն։ Ասիկա ի՜նչ օրհնութիւն մը պիտի ըլլայ ժողովքի բոլոր անդամներուն համար։