100,000 Օժանդակ Ռահվիրաներ Կ’ուզուին—Կրնա՞ք Օժանդակ Ռահվիրայ Մը Ըլլալ Մարտին, Ապրիլին, Մայիսին

¹ «1,000 Քարոզիչներ կ’Ուզուին»։ Ա՛յս էր 1881 Դիտարանի Ապրիլ թիւին մէջ հրատարակուած յօդուածներէն մէկուն խորագիրը։ Անիկա կոչ մը կը պարունակէր բոլոր նուիրուած այրերու եւ կիներու՝ «որոնց Տէրը Իր ճշմարտութեան գիտութիւնը յանձնարարած է»՝ որպէսզի իրենց կրցածին չափ ժամանակ տրամադրեն Աստուածաշունչի ճշմարտութիւնը տարածելու։ Անոնք որոնք կրնային իրենց ժամանակին կէսը, կամ անկէ աւելին միմիայն Տիրոջը գործին տրամադրել, քաջալերուած էին կամաւոր ըլլալ, որպէս շրջավաճառ աւետարանիչներ—ներկայ ռահվիրաներուն նախակարապետները։

² Թէեւ 1800–ական տարիներէն ի վեր ժամանակները փոխուած են, սակայն իրողութիւն մը նոյնը մնացած է. Աստուծոյ նուիրուած ծառաները տակաւին կ’ուզեն իրենց կրցածին չափ շատ ժամանակ տրամադրել բարի լուրը տարածելու։ Որպէս օժանդակ ռահվիրայ ծառայելը ժողովքի հրատարակիչներուն կ’օգնէ որ աւելի ազդեցիկ ըլլան, մինչ աւելի ժամանակ կը տրամադրեն Թագաւորութեան ծառայութեան։—Կող. 4։17. Բ. Տիմ. 4։5

³ Օժանդակ ռահվիրայութեան ձեռնարկուելէն ի վեր, հարիւր հազարաւոր եղբայրներ եւ քոյրեր զայն համտեսած են։ Ռահվիրայութեան ծառայութեան այս երեսակին հանդէպ խանդավառութիւնը այնքան աճեցաւ որ 1985–ի Ապրիլին, Միացեալ Նահանգներու մասնաճիւղին հոգատարութեան ներքեւ եղող թաղամասին մէջ օժանդակ ռահվիրաներու գագաթ թիւը 100,000–ը անցաւ։ Անկէ ի վեր, երեք անգամ աւելի քան 100,000 հրատարակիչներ ծառայած են որպէս օժանդակ ռահվիրաներ, 1988–ի, 1989–ի եւ 1992–ի Ապրիլ ամսուան ընթացքին։ Վստահաբար, այս լաւ ջանքը 1997–ի գարնան ալ կրկնելու ոյժը առկայ է։

⁴ Կը քաջալերենք ձեզ որ դուք ալ օժանդակ ռահվիրայութիւնը համտեսելու նպատակակէտը ունենաք Մարտ, Ապրիլ եւ Մայիս ամիսներէն մէկուն, կամ աւելիին ընթացքին։ Ինչո՞ւ Մա՛րտն ալ պարփակել։ Քանի որ այս տարի Քրիստոսի մահուան Յիշատակատօնը Կիրակի՝ Մարտ 23–ին տեղի պիտի ունենայ։ Յիշատակատօնը կանխող շաբաթներու ընթացքին, լաւագոյն բանն է Տէր ու Փրկիչ Յիսուս Քրիստոսի հաստատած Թագաւորութեան քարոզութեան գործին եռանդուն կերպով մասնակցիլ։ Մարտին, հսկայական վկայութիւն տալով, բազմաթիւ հետաքրքրուած անձեր կրնանք հրաւիրել Քրիստոսի մահուան յիշատակը մեզի հետ տօնելու։ Մարտը նաեւ մասնաւոր ամիս մը պիտի ըլլայ, քանի որ, առաջին անգամ ըլլալով, նոր գիրքը՝ Ընտանեկան Ուրախութեան Գաղտնիքը՝ պիտի ներկայացնենք։ Ասկէ զատ, Մարտի ընթացքին հինգ Շաբաթներ եւ հինգ Կիրակիներ կան, որոնք կարելի կը դարձնեն որ շաբաթավերջին խտացած գործունէութիւն մը ունենանք դաշտի ծառայութեան մէջ։ Ապրիլի եւ Մայիսի ընթացքին, մեր ծառայութիւնը եռանդունօրէն շարունակելը թոյլ պիտի տայ որ ցուցաբերուած հետաքրքրութիւնը հետապնդենք, եւ տան սուրբ գրային նոր ուսումնասիրութիւններ սկսինք, գործածելով՝ Աստուած Ի՛նչ կը Պահանջէ Մեզմէ գրքոյկը։ Մեր թաղամասն ալ լրիւ պիտի ծածկենք, մանաւանդ շաբաթավերջերուն, Դիտարանի եւ Զարթի՛րի ընթացիկ թիւերով։

⁵ Որո՞նք Որակելի Են Օժանդակ Ռահվիրաներ Ըլլալու. Մեր Ծառայութիւնը Կատարելու Համար Կազմակերպուած գիրքը, 114–րդ էջի վրայ կը բացատրէ. «Ձեր անձնական պարագաները ի՛նչ որ ալ ըլլան, եթէ մկրտուած էք ու բարոյական լաւ կեցուածք մը ունիք, կրնաք դաշտի ծառայութեան մէջ ամիսը 60 ժամ տրամադրել, իսկ եթէ կը խորհիք թէ մէկ կամ աւելի ամիսներ կրնաք որպէս օժանդակ ռահվիրայ ծառայել, ժողովքի երէցները ուրախութեամբ նկատի պիտի առնեն ծառայութեան այս առանձնաշնորհումի ձեր դիմումնագիրը»։ Մարտին, Ապրիլին ու Մայիսին այս առանձնաշնորհումը վայելելու համար ձեր գործերը կրնա՞ք կարգադրել։

⁶ Երէցներու մարմիններուն դրական կեցուածքով, ինչպէս նաեւ մնացեալ հրատարակիչներուն սրտանց օգնութեամբ, 100,000 օժանդակ ռահվիրաներու այս կոչին ընդառաջումը մեծ յաջողութիւն մը պիտի ըլլայ։ (Եբր. 13։7) Ընտանիքի գլուխները կը քաջալերենք որ ստուգեն թէ ընտանիքի անդամներէն քանի՛ հոգի կրնան օժանդակ ռահվիրաներու շարքերուն միանալ այս ամիսներէն մէկուն կամ աւելիին ընթացքին։—Սաղմ. 148։12, 13. բաղդատել՝ Գործք 21։8, 9։

⁷ Շուտով մի՛ եզրակացնէք թէ օժանդակ ռահվիրայութիւնը ձեր հասողութենէն վեր է, լիաժամ աշխատանքի, դպրոցական յայտագրի, ընտանեկան պատասխանատուութիւններու կամ սուրբ գրային այլ պարտաւորութեանց պատճառաւ։ Կրնայ ըլլալ որ կարգ մը հրատարակիչներու համար դիւրին չըլլայ ասոր մասնակցիլ։ Այսուհանդերձ, լաւ կազմակերպուելով ու Եհովայի օրհնութեամբ անոնք կրնան յաջողիլ։ (Սաղմ. 37։5. Առ. 16։3) Թոյլ տուէք որ ռահվիրայութեան ծառայութեան հանդէպ ձեր փափա՛քը ղեկավարէ ձեր պարագաները եւ ո՛չ թէ պարագաները ղեկավարեն ռահվիրայութիւն ընելու ձեր փափաքը։ (Առ. 13։19ա) Եհովայի եւ մեր ընկեր արարածին հանդէպ այսպիսի զօրաւոր սիրով, շատեր կարող են իրենց կեանքի շաբաթական սովորութիւնները փոխել, որպէսզի ատենը անգամ մը իրենց ծառայութիւնը ընդլայնեն, ամսուան մը համար։ (Ղուկ. 10։27, 28) Բազմաթիւ օրհնութիւններ կը սպասեն անոնց՝ որոնք Թագաւորութեան ծառայութեան մէջ ջանադրութեամբ կը գործեն։—Ա. Տիմ. 4։10

⁸ Օժանդակ Ռահվիրայութիւնը Ի՞նչ կ’Իրագործէ. Աստուծոյ հազարաւոր ծառաներուն օժանդակ ռահվիրայութեան մասնակցելու սրտանց ջանքին արդիւնքը կ’ըլլայ Եհովայի մատուցուած փառաբանութեան մեծաձայն աղաղակ մը։ Մինչ Թագաւորութեան հրատարակիչները կը ջանան բարի լուրը աւելի շատ մարդոց հասցնել, անձնապէս աւելի կը մօտենան Եհովայի, քանի որ կը սորվին իր հոգիին եւ օրհնութեան աւելի ապաւինիլ։

⁹ Մեր մէջ օժանդակ, կանոնաւոր եւ մասնաւոր աշխոյժ ռահվիրաներ ունենալը ժողովքէն ներս կենսունակութեան թարմ հոգի մը կը յառաջացնէ։ Անոնց խանդավառութիւնը փոխանցիկ է, երբ կը խօսին իրենց դաշտի փորձառութիւններուն մասին։ Ասիկա կը մղէ որ ուրիշներ ալ վերարժեւորեն իրենց նախասիրութիւններն ու կարելիութիւնը, որպէսզի աւելի ծաւալուն բաժին մը բերեն այս շատ կարեւոր ծառայութեան գործին մէջ։ Քոյր մը որ 70 տարեկանին մկրտուեցաւ, անմիջապէս օժանդակ ռահվիրայութեան ձեռնարկեց շարունակական կերպով։ Երբ քանի մը տարի ետք իրեն հարցուեցաւ, թէ ինչու ա՛յս տարիքին տակաւին կը ջանար օժանդակ ռահվիրայութիւն ընել, ան ըսաւ որ իր կեանքի առաջին 70 տարիները վատնուած կը զգար եւ չէր ուզեր իր կեանքին մնացեալ տարիներէն ո՛չ մէկը վատնել։

¹⁰ Օժանդակ ռահվիրայութեան գործին մասնակցող իւրաքանչիւր անհատ ծառայութեան մէջ իր հմտութիւնը կը բարելաւէ։ Երիտասարդ վկայ մը ընդունեց. ‘Փոքր հասակէս, քարոզչութեան մէջ ծնողքիս կ’ընկերակցէի։ Դաշտի ծառայութիւնը ի՛րապէս հաճոյք էր։ Սակայն, ժամանակի ընթացքին, անդրադարձայ որ դպրոցին մէջ միւս աշակերտներէն տարբեր էի։ Ճշմարտութեան մասին ուրիշ աշակերտներու խօսիլը, այլեւս նեղացուցիչ դարձաւ։ Երբ տունէ–տուն կը ծառայէի, դպրոցէն ծանօթի մը հանդիպելու գաղափարէն սկսայ զարհուրիլ։ Կը խորհիմ թէ իմ պարագայիս, հարցը մարդու վախն էր։ (Առ. 29։25) Շրջանաւարտ ըլլալէս ետք, որոշեցի ժամանակաւորապէս ռահվիրայութիւնը փորձել։ Որպէս հետեւանք, քարոզչութիւնը որեւէ ժամանակէ աւելի գրաւիչ դարձաւ։ Այլեւս զայն զուարճութիւն մը կամ ծանր բեռ մը չնկատեցի։ Աստուածաշունչի աշակերտներուս ճշմարտութեան մէջ յառաջդիմելը տեսնելով, գոհունակութեան խոր զգացում մը ունեցայ, վստահ ըլլալով որ Եհովան նեցուկ կը կանգնէր ջանքերուս’։ Այս երիտասարդը շարունակեց որպէս կանոնաւոր ռահվիրայ ծառայել։

¹¹ Երբ շատեր որպէս օժանդակ ռահվիրաներ կը ծառայեն, գործնական գետնի վրայ, թաղամասը լրիւ կը ծածկուի։ Այն եղբայրը որ կը զբաղի թաղամասերու նշանակումով, կրնայ օժանդակ ռահվիրաներէն խնդրել որ հազուադէպ ծառայուած թաղամասերը աշխատին։ Իրենց հետ ճաշ առնելով, ծառայութեան համար լման օր մը յատկացնելով, կարելի պիտի ըլլայ որ թաղամասի ամենէն հեռաւոր մասերն իսկ աշխատցուին։

¹² Երէցները Պարտին Նախապատրաստութիւններ Ընել. Յառաջիկայ երեք ամիսներու ընթացքին, կարգադրութիւններ պէտք է ըլլան շաբթուան տարբեր ժամերուն վկայութեան այլազան գործունէութիւններ ծրագրելու. ինչպէս՝ ուշ յետմիջօրէին ու երեկոյեան, որպէսզի կարելի եղածին չափ շատ հրատարակիչներ մասնակցին։ Տունէ–տուն կանոնաւոր ծառայութեան կողքին, նաեւ փողոցի եւ առեւտրական թաղամասերու մէջ վկայելու, ինչպէս նաեւ նախապէս տունը չեղողները այցելելու համար ժամանակ յատկացուցէք։ Այսպէս ընելով, երէցները կ’օգնեն ռահվիրայութիւն ընողներուն, որ ժողովքին հետ ծառայեն իրենց յայտագրին համար գործնական եւ յարմար եղող ժամերուն։ Ժողովքը ծառայութեան բոլոր կարգադրութիւններէն լաւատեղեակ պէտք է ըլլայ։ Հաւաքավայրերու ծառայութեան ժողովները լաւ կազմակերպուած պէտք է ըլլան։ Առաւել, բաւարար թաղամասեր մատչելի պէտք է ըլլան եւ յաւելեալ պարբերաթերթեր եւ այլ գրականութիւններ արագօրէն պէտք է ապսպրուին։

¹³ Ծառայութեան Ձեր Անձնական Յայտագիրը Ծրագրեցէք. Եղբայր մը, որ սկիզբը օժանդակ ռահվիրայութիւն ընելու կը վախնար, ըսաւ. «Անիկա կարծածէս շատ աւելի դիւրին էր։ Միայն պէտք է լաւ կերպով յայտագրել»։ Այս յաւելուածականին ետեւի էջին վրայ, օժանդակ ռահվիրայութեան յայտագրի նմոյշ մը կը տեսնէ՞ք, որ կրնայ գործնական ըլլալ։ Օժանդակ ռահվիրայութեան համար պահանջուածը շաբաթական 15 ժամ ծառայութիւն է։

¹⁴ Որպէս օժանդակ ռահվիրաներ ծառայելու համար, տանտիկինները ու երեկոյեան ժամերէն մինչեւ կէս գիշեր աշխատող գործաւորները, յաճախ կրնան ծրագրել որ իրենց ծառայութիւնը առաւօտուն ընեն։ Դպրոցականներն ու կէս գիշերէն մինչեւ առաւօտ աշխատող գործաւորները, ընդհանրապէս կրնան ուշ յետմիջօրէի ժամեր տրամադրել քարոզչութեան։ Լիաժամ աշխատողներ կարելի գտած են շաբաթը մէկ օր արձակուրդ առնել, եւ կամ լման շաբաթավերջեր յատկացնել ծառայութեան, երեկոյեան վկայութեան կողքին։ Շատեր, որոնք միայն շաբաթավերջերուն կրնան ծառայել, հինգ շաբաթավերջեր ունեցող ամիսներ կ’ընտրեն։ Այս է պարագան 1997–ի Մարտ, Օգոստոս եւ Նոյեմբեր ամիսներուն։ Էջ 6–ի վրայ որպէս ուղեցոյց հայթայթուած յայտագրին դատարկ մասը գործածելով, ուշադիր կերպով եւ աղօթքով ծառայութեան գործնական յայտագիր մը պատրաստեցէք, որ կը պատշաճի ձեր անհատական պարագային։

¹⁵ Օժանդակ ռահվիրայութեան կարգադրութեան առաւելութիւններէն մէկը դիւրաթեքութիւնն է։ Կրնաք ընտրել այն ամիսները որ ռահվիրայութիւն պիտի ընէք, եւ կրնաք ծառայել այնքան յաճախ որ կը փափաքիք։ Եթէ կ’ուզէք շարունակական կերպով օժանդակ ռահվիրայութիւն ընել, բայց չէք կրնար, ամբողջ տարուան ընթացքին ամիս մը այո՝ ամիս մը ոչ՝ ծառայելու մասին մտածա՞ծ էք։ Միւս կողմէ, ոմանք կրնան շարունակաբար ծառայել որպէս օժանդակ ռահվիրայ՝ որոշ ժամանակ մը։

¹⁶ Լիաժամ Ռահվիրայութեան Նախապատրաստութիւն. Ռահվիրայական հոգի ունեցողներէն շատեր կը փափաքին որպէս կանոնաւոր ռահվիրաներ ծառայել, սակայն վստահ չեն թէ անոր համար ժամանակ, յարմարութիւններ եւ կորով ունի՛ն թէ ոչ։ Անկասկած՝ ներկայիս կանոնաւոր ռահվիրայ եղողներէն շատեր օժանդակ ռահվիրայութիւնը որպէս նախապատրաստութիւն գործածեցին, լիաժամ ծառայութեան անցնելու համար։ Եթէ օժանդակ ռահվիրայ մը իր ծառայութեան յայտագրին վրայ օրական միայն մէկ ժամ, կամ շաբաթը միայն մէկ լման օր աւելցնէ, կարելիութիւնը կ’ունենայ կանոնաւոր ռահվիրայութեան յայտագիրը իրագործելու։ Գիտնալու համար թէ ասիկա ձեր պարագային կարելի է թէ ոչ, օժանդակ ռահվիրայութեան ընթացքին քանի մը ամիս փորձեցէք 90 ժամ տրամադրել ծառայութեան։ Միաժամանակ, վերայցելութիւններ ու Աստուածաշունչի ուսումնասիրութիւններ սկսած կ’ըլլաք, ինչ որ առիթ կու տայ որ այլազան ու հաւասարակշռուած ռահվիրայութեան ծառայութիւն մը վայելէք։

¹⁷ Քոյր մը, վեց տարի շարունակաբար օժանդակ ռահվիրայութիւնը վայելեց։ Ամբողջ այդ ժամանակաշրջանին, անոր նպատակակէտն էր կանոնաւոր ռահվիրայութեան ձեռնարկել։ Այդ նպատակաւ, ան չորս տարբեր գործեր փոխեց, յուսալով այնպիսի պարագայ մը ստեղծել որ կանոնաւոր ռահվիրայութեան համար պահանջուած 90 ժամուան նպատակակէտին հասնէր։ Ամէն ամիս մէկ կամ երկու յայտագիր գծեց, գիտնալու համար թէ կարելիութիւն ունէր թէ ոչ։ Սակայն զանոնք քննելով տեսաւ որ լիաժամ ծառայութիւնը իր հասողութենէն վեր էր։ Բայց ան շարունակեց Եհովայի առաջնորդութիւնը խնդրել։ Ապա, օր մը, երբ Ծառայութեան Ժողովը կը պատրաստէր, 1991 Սեպտեմբեր–ի Մեր Թագաւորութեան Ծառայութիւնը թերթիկին մէջ յօդուած մը կարդաց, որ կ’ըսէր. «Փոխանակ անտեղի շեշտ դնելու ժամերու պահանջին վրայ, ինչո՞ւ ձեր ուշադրութիւնը չկեդրոնացնել հաւաքումի գործին մասնակցելու յաւելեալ պատեհութեան վրայ։ (Յովհ. 4։35, 36)» Ան կը պատմէ. «Այս նախադասութիւնը հինգ կամ վեց անգամ կարդացի, եւ վստահ եղայ որ ասիկա Եհովայի պատասխանն էր։ Ա՛յդ պահուն որոշեցի կանոնաւոր ռահվիրայութեան ձեռնարկել»։ Թէեւ իր մասնակի գործի յայտագիրը շատ յարմար չէր, ան կանոնաւոր ռահվիրայութեան դիմումնագիրը ներկայացուց։ Շաբաթ մը ետք, իր յայտագիրը փոխուեցաւ, եւ գործի մէջ այնպիսի ժամեր տրուեցան իրեն որ ճիշդ իրեն յարմար էին։ Ան եզրակացուց. «Ասիկա Եհովային ձեռքը չէ՞», եւ աւելցուց ըսելով. «Երբ Եհովայէն ուղղութիւն կը խնդրէք, եւ կը ստանաք, հակառակ ուղղութեամբ մի՛ փախչիք. ընդունեցէ՛ք զայն»։ Եթէ ձեր անկեղծ փափաքն է կանոնաւոր ռահվիրայ մը ըլլալ, Մարտ, Ապրիլ եւ Մայիսին երեք ամիս օժանդակ ռահվիրայութիւն ընելէ ետք, թերեւս համոզուիք որ դո՛ւք ալ կրնաք յաջողիլ լիաժամ ծառայութեան մէջ։

¹⁸ Վստահ ենք որ Եհովա իր ժողովուրդին նախանձախընդրութիւնը պիտի օրհնէ, ու ջանքերուն թիկունք պիտի կանգնի, մինչ անոնք փրկութեան բարի լուրը կը ծանուցանեն, գարնանային այս մասնայատուկ գործունէութեան ընթացքին։ (Եսայ. 52։7. Հռովմ. 10։15) Մարտ, Ապրիլ, ու Մայիսի ընթացքին 100,000 օժանդակ ռահվիրաներու շարքին միանալու կոչին պիտի ընդառաջէ՞ք։

[Շրջանակ՝ էջ 3]

Ինչպէ՞ս Յաջողիլ Որպէս Օժանդակ Ռահվիրայ մը

■ Ինքնավստահութիւն ունեցէք որ կրնաք յաջողիլ

■ Եհովայի աղօթեցէք որ ձեր ջանքերը օրհնէ

■ Ուրիշ հրատարակիչ մը հրաւիրեցէք որ ձեզի հետ ռահվիրայութիւն ընէ

■ Ծառայութեան գործնական յայտագիր մը պատրաստեցէք

■ Յաւելեալ պարբերաթերթ ապսպրեցէք

■ Ժողովքի ծառայութեան կարգադրութիւններուն նեցուկ կանգնեցէք

■ Անպաշտօն կերպով վկայելու առիթներ փնտռեցէք