Յիշատակատօնը—Մե՜ծ Կարեւորութիւն Ունեցող Դէպք Մը
1 Կիրակի, 23 Մարտ, արեւնամուտէն ետք, Քրիստոսի մահուան Յիշատակատօնը պիտի տօնենք։ (Ղուկ. 22։19) Ասիկա իրապէս՝ մե՜ծ կարեւորութիւն ունեցող դէպք մըն է։ Եհովայի հանդէպ մինչեւ ի մահ իր ուղղամտութիւնը պահելով, Յիսուս փաստեց որ նոյնիսկ խիստ ճնշումի ներքեւ մարդոց համար կարելի է կատարեալ աստուածպաշտութիւն ցուցաբերել, Եհովայի գերիշխանութեան իրաւացի ըլլալը ջատագովելով։ (Եբր. 5։8) Ասկէ զատ, Քրիստոսի մահը՝ մարդկութիւնը փրկելու համար պահանջուած մարդկային կատարեալ զոհը հայթայթեց, կարելի դարձնելով որ անոր հաւատք ընծայողները յաւիտեան ապրելու յոյսը ունենան։ (Յովհ. 3։16) Յիշատակատօնին ներկայ ըլլալով, թէ՛ Եհովայի սիրոյն եւ թէ մեզի համար Յիսուսի ըրած զոհագործութեան հանդէպ մեր սրտաբուխ գնահատութիւնը ցոյց կու տանք։
2 Բոլորիս ալ քաջալերութիւն տրուած է որ Մարտ 18–23–ի ընթացքին Աստուածաշունչի ընթերցանութեան յայտագրին հետեւինք, ինչպէս նշուած է Եհովայի Վկաներու 1997–ի Օրացոյցին վրայ։ Նաեւ, Մեծագոյն Մարդը որ Ապրած Է գրքին 112–116 գլուխները ընտանիօք նկատի առնելը պիտի օգնէ մեզի որ մեր ուշադրութիւնը կեդրոնացնենք մարդկային պատմութեան ամենակարեւոր շաբթուան վրայ։
3 Յիշատակատօնի շրջանին, դաշտի ծառայութեան մեր տրամադրած ժամերը կրնա՞նք աւելցնել։ Շատ մը հրատարակիչներ, Մարտ ամսուան հինգ շաբաթավերջերէն օգտուելով, որպէս օժանդակ ռահվիրաներ պիտի ծառայեն։ Ինչո՞ւ անոնց մէջ դուք ալ չըլլաք։ Ամէնքս ալ լման մասնակցութիւն մը կրնանք բերել Յիշատակատօնի ներկայ գտնուելու կարեւորութիւնը շեշտելու մէջ։ Քանի որ անիկա Կիրակի օրը տեղի պիտի ունենայ, շատերու համար աւելի դիւրին պիտի ըլլայ ներկայ գտնուիլ։ Վստահ եղէք որ Աստուածաշունչի բոլոր աշակերտները եւ հետաքրքրուած անհատները անպայման մեզի միանան։ Անոնց հետ նկատի առէք Գիտութիւն գրքին էջ 127–ի վրայ 18–րդ պարբերութիւնը՝ ուր կը խօսի տարուան մէջ օրուան մը մասին, որ պէտք է մասնաւորաբար յիշատակուի։
4 1997–ի այս մեծագոյն դէպքին մօտեցէք, Յիսուսի մահուան մեզի ի նպաստ իրագործած բոլոր բաներու հանդէպ խոր գնահատութիւն ցուցաբերելով։ Դուք ալ ներկայ եղէք Մարտ 23–ի երեկոյեան, երբ ճշմարիտ Քրիստոնեաներ ամէնուրեք հաւաքուին՝ հաւատարմօրէն տօնելու Յիշատակատօնը։