«Ասիկա ըրէք»

Յիշատակատօնը ապրիլ 5–ին տեղի պիտի ունենայ

1. Յիշատակատօնը ինչո՞ւ կարեւոր է։

¹ «Ասիկա ըրէք զիս յիշելու համար» (Ղուկ. 22։19)։ Այս խօսքերով, Յիսուս իր հետեւորդներուն պատուիրեց որ իր զոհաբերական մահը յիշատակեն։ Փրկանքի իրագործած բոլոր բաներուն ի տես, քրիստոնեաներու համար աւելի կարեւոր կամ թանկագին օր մը չկայ, քան՝ տարեկան Յիշատակատօնը։ Ինչպէ՞ս կրնանք Եհովայի հանդէպ մեր երախտագիտութիւնը ցոյց տալ, մինչ ապրիլ 5–ը՝ այս տարուան Յիշատակատօնին թուականը կը մօտենայ (Կող. 3։15)։

2. Ինչպէ՞ս կրնանք ուսումնասիրելով ու խոկալով ցոյց տալ, թէ կը գնահատենք Յիշատակատօնը։

² Նախապատրաստուէ՛։ Մենք սովորաբար կը նախապատրաստուինք այն բաներուն, որոնք կարեւոր կը նկատենք։ Յիշատակատօնի համար մեր սրտերը կրնանք պատրաստել՝ ընտանեօք քննարկելով ու խոկալով այն դէպքերուն մասին, որոնք տեղի ունեցան երկրի վրայ Յիսուսի վերջին օրերու ընթացքին (Եզր. 7։10)։ Օրացոյցին եւ Աստուածաշունչը քննենք ամէն օր գրքոյկին մէջ համարներու մասնակի ցանկ մը կը գտնուի, մինչդեռ Դիտարան–ի 1 փետրուար 2011 թիւին 23–րդ եւ 24–րդ էջերուն մէջ (անգլերէն), կը գտնուի աւելի ամբողջական ցանկ մը եւ Մեծագոյն մարդը գիրքին համապատասխան գլուխները։

3. Ինչպէ՞ս կրնանք ծառայութեան մէջ մեր մասնակցութիւնը աւելցնելով ցոյց տալ, թէ կը գնահատենք Յիշատակատօնը։

³ Քարոզէ՛։ Կրնանք մեր գնահատութիւնը նաեւ ցոյց տալ՝ լիովին մասնակցելով ծառայութեան (Ղուկ. 6։45)։ Ուրիշները Յիշատակատօնին հրաւիրելու համաշխարհային արշաւ մը պիտի սկսի շաբաթ, մարտ 17–ին։ Կրնա՞ս յայտագիրդ այնպէս մը դասաւորել, որ աւելի ժամանակ յատկացնես ծառայութեան, թերեւս ծառայելով որպէս օժանդակ ռահվիրայ։ Ինչո՞ւ այս մասին ընտանեօք չքննարկես յաջորդ Ընտանեկան պաշտամունքի ընթացքին։

4. Ի՞նչ օգուտներ կրնանք ստանալ՝ Յիշատակատօնին ներկայ գտնուելով։

⁴ Ի՜նչ օգուտներ կը ստանանք՝ ամէն տարի Յիշատակատօնին ներկայ գտնուելով։ Մեր ուրախութիւնը եւ Աստուծոյ հանդէպ մեր սէրը կ’աւելնան, մինչ կը խոկանք թէ Եհովան ինչպէ՛ս առատաձեռնօրէն իր միածին Որդին որպէս փրկանք հայթայթեց (Յովհ. 3։16. Ա. Յովհ. 4։9, 10)։ Ասիկա մեզ կը ստիպէ որ այլեւս մեր անձերուն համար չապրինք (Բ. Կոր. 5։14, 15)։ Ասիկա նաեւ կը խթանէ մեր փափաքը՝ Եհովան հրապարակաւ փառաբանելու (Սաղ. 102։19-21)։ Արդարեւ, Եհովայի երախտագէտ ծառաները անհամբերութեամբ կը սպասեն այն առիթին, որ պիտի ունենանք ապրիլ 5–ին կայանալիք Յիշատակատօնին՝ ‘Տէրոջը մահը պատմելու’ (Ա. Կոր. 11։26)։