Ծառայութեան նոր տարուան համար թանկագին նպատակակէտ մը
1. Ծառայութեան նոր տարուան համար ի՞նչ նպատակակէտ կրնանք դնել։
1 Եթէ կ’ուզենք հոգեւորապէս յառաջդիմել, պէտք է նպատակակէտեր դնենք։ Ծառայութեան նոր տարուան համար ի՞նչ նպատակակէտեր դրած ես։ Հոյակապ նպատակակէտ մըն է՝ մէկ կամ աւելի ամիսներու համար օժանդակ ռահվիրայ ըլլալը։ Որովհետեւ այս հաճոյալի գործունէութիւնը սովորաբար նախապատրաստութիւն կը պահանջէ, հիմակուընէ անոր մասին մտածելը օգտակար է։ Օժանդակ ռահվիրայութիւնը ինչո՞ւ նպատակակէտ մը նկատել։
2. Օժանդակ ռահվիրայութիւնը ինչո՞ւ նպատակակէտ դնենք։
2 Օժանդակ ռահվիրայութիւն ընելու պատճառներ. Օժանդակ ռահվիրայութիւնը մեզ կարող կը դարձնէ որ մեր երկնաւոր Հայրը «ա՛լ աւելի» հաճեցնենք՝ ծառայութեան աւելի ժամանակ յատկացնելով։ (Ա. Թես. 4։1) Երբ մեզի ի նպաստ Եհովայի ըրած բոլոր բաները նկատի առնենք, մեր սիրտը մեզ կը մղէ որ ուրիշներուն իր մասին խօսինք։ (Սաղմ. 34։1, 2) Եհովա ասիկա կը նկատէ եւ մեր ծառայութիւնը աւելցնելու համար մեր կատարած անձնական զոհողութիւնները կը գնահատէ։ (Եբր. 6։10) Այն գիտակցութիւնը թէ մեր ծանր աշխատանքը Եհովան կը հաճեցնէ, մեզ մեծապէս կ’ուրախացնէ։—Ա. Մնաց. 29։9
3, 4. Օժանդակ ռահվիրայութենէն ի՞նչպէս կրնանք օգտուիլ։
3 Սովորաբար բան մը ո՛րքան աւելի ընենք, ա՛յնքան աւելի դիւրին ու հաճելի կը դառնայ։ Ծառայութեան մէջ աւելի ժամանակ անցընելը, քեզ դռներուն առջեւ աւելի ինքնավստահ կը դարձնէ։ Խօսակցութիւններ սկսելու եւ Աստուածաշունչը գործածելու մէջ աւելի հմուտ պիտի դառնաս։ Հաւատքիդ մասին ուրիշներուն ո՛րքան աւելի խօսիս, ա՛յնքան աւելի զօրաւոր պիտի ըլլայ։ Աստուածաշունչի ուսումնասիրութիւններ չունեցողներէն ոմանք, օժանդակ ռահվիրայութիւն ըրած ատեննին կրցած են ուսումնասիրութիւն մը սկսիլ։
4 Օժանդակ ռահվիրայութիւնը կրնայ թափ մը տալ, որպէսզի հոգեւոր միօրինակութենէն դուրս ելլենք։ Նախկին կանոնաւոր ռահվիրայ մը, որ կը զգար թէ աշխարհիկ գործին վրայ շա՛տ շեշտ կը դնէր, որոշեց մէկ ամսուան համար օժանդակ ռահվիրայ ըլլալ։ Ան ըսաւ. «Չհաւատացի թէ այդ մէկ ամիսը զիս հոգեւորապէս ա՛յդքան աշխուժացուց։ Կարգադրութիւններ ըրի որ շարունակ օժանդակ ռահվիրայութիւն ընեմ, ինչ որ պատճառ դարձաւ որ անգամ մը եւս կանոնաւոր ռահվիրայ ըլլամ»։
5. Ի՞նչպէս կրնանք անատակութեան զգացումները յաղթահարել։
5 Խոչընդոտներ յաղթահարել. Ոմանք կրնան վարանիլ դիմումնագիր ներկայացնելու, քանի որ կը զգան թէ քարոզիչի մը յատուկ կարողութիւնը չունին։ Եթէ քեզ ետ պահող պատճառը այս է, ուրեմն Եհովա կրնայ քեզի օգնել ինչպէս Երեմիայի օգնեց։ (Երեմ. 1։6-10) Թէեւ Մովսէս «ծանրախօս ու ծանրալեզու» էր, բայց Եհովա զինք գործածեց Իր նպատակը իրագործելու համար։ (Ել. 4։10-12) Եթէ անատակ զգաս, Եհովայէ քաջութիւն խնդրէ։
6. Ի՞նչպէս կարելի է օժանդակ ռահվիրայութիւն ընել ի հեճուկս առողջապահական խնդիրներու կամ խճողուած յայտագրի մը։
6 Դիմումնագիր ներկայացնելու կը վարանիս, որովհետեւ առողջապահական խնդիրներ կամ խճողուած յայտագի՞ր մը ունիս։ Եթէ անկարող մէկն ես, կարողութեանդ սահմաններուն համաձայն քարոզելով կրնաս օժանդակ ռահվիրայութիւն ընել։ Եթէ խճողուած յայտագիր մը ունիս, թերեւս կարենաս կարգ մը ոչ–էական գործունէութիւններ ուրիշ ամսուան մը յետաձգել։ Լիաժամ աշխատողներէն ոմանք կրցած են օժանդակ ռահվիրայութեան համար ժամանակ ծախու առնել, մէկ կամ երկու օր արձակուրդ առնելով։—Կող. 4։5
7. Ինչո՞ւ օգտակար է օժանդակ ռահվիրայութիւնը աղօթքի նիւթ դարձնել։
7 Ի՛նչպէս ընել. Փափաքդ աղօթքով յայտնէ։ Եհովայէ խնդրէ որ ծառայութիւնդ ընդարձակելու ջանքերդ օրհնէ։ (Հռովմ. 12։11, 12) Ան կրնայ քեզի օգնել յայտագիրդ յարմարցնելու առնչութեամբ խոհեմ որոշումներ կայացնելու։ (Յակ. 1։5) Եթէ օժանդակ ռահվիրայութիւն ընելու փափաքը չունիս, Եհովայէ խնդրէ որ քեզի օգնէ քարոզչութենէն հաճոյք առնելու։—Ղուկ. 10։1, 17
8. Առակաց 15։22–ը կիրարկելը ի՞նչպէս կ’օգնէ որ օժանդակ ռահվիրայութիւն ընես։
8 Օժանդակ ռահվիրայութեան նպատակակէտին մասին ընտանեօք խօսակցեցէք։ (Առ. 15։22) Թերեւս ընտանիքին մէկ անդամը կարենայ օժանդակ ռահվիրայ ըլլալ, ընտանիքին միւս անդամներուն աջակցութեամբ։ Ռահվիրայ ըլլալու փափաքիդ մասին խօսակցէ ժողովքի միւս անդամներուն հետ, մանաւանդ անոնց հետ՝ որոնք նոյնանման պարագաներ ունին։ Ասիկա կրնայ օժանդակ ռահվիրայութեան հանդէպ խանդավառութիւն հրահրել։
9. Օժանդակ ռահվիրայութեան համար թերեւս ո՞ր ամիսները ընտրես։
9 Երբ ծառայութեան նոր տարուան վերաբերեալ աստուածպետական օրացոյցդ աչքէ կ’անցընես, ե՞րբ կը խորհիս թէ կրնաս օժանդակ ռահվիրայութիւն ընել։ Եթէ լիաժամ աշխատող մը կամ դպրոցական մըն ես, թերեւս ընտրես այն ամիսները, որոնք արձակուրդ կամ հինգ Շաբաթ կամ հինգ Կիրակի ունին։ Օրինակ՝ Սեպտեմբեր, Դեկտեմբեր, Մարտ եւ Օգոստոս ամիսները հինգ լման շաբաթավերջեր ունին։ Մայիսը հինգ Շաբաթ ունի, իսկ Յունիսը՝ հինգ Կիրակի։ Եթէ առողջապահական խնդիրներ ունիս, ընտրէ այն ամիսները որոնց ընթացքին օդը սովորաբար լաւ կ’ըլլայ։ Կրնաս նաեւ ընտրել ռահվիրայ ըլլալ այն ամիսը, որ շրջանային տեսուչը ժողովքը պիտի այցելէ։ Իր այցելութեան ընթացքին, առանձնաշնորհում պիտի ունենաս ներկայ գտնուելու կանոնաւոր ռահվիրաներուն հետ գումարուած ժողովին առաջին կէսին։ Որովհետեւ յառաջիկայ տարի Յիշատակատօնը Մարտ 22–ին է, Մարտ, Ապրիլ ու Մայիս ամիսները հոյակապ ընտրանք մըն են։ Անգամ մը որ ընտրեցիր թէ ո՛ր ամիսը կամ ամիսները օժանդակ ռահվիրայ պիտի ըլլաս, սկսէ յայտագիր մը պատրաստել որ կարելի պիտի դարձնէ ժամերու պահանջին գոհացում տալ։
10. Ի՞նչ կրնաս ընել եթէ չես կրնար օժանդակ ռահվիրայ ըլլալ։
10 Նոյնիսկ եթէ կը զգաս թէ յառաջիկայ ծառայութեան տարուան ընթացքին պիտի չկարենաս օժանդակ ռահվիրայութիւն ընել, տակաւին կրնաս ռահվիրայութեան հոգին պահպանել։ Շարունակէ ծառայութեան մէջ քու բոլոր կարելիդ ընել, վստահ ըլլալով թէ Եհովա լաւագոյնդ տալու քու բոլորանուէր ջանքերուդ կը հաճի։ (Գաղ. 6։4) Օժանդակ ռահվիրայ եղողներուն աջակցէ եւ զանոնք քաջալերէ։ Թերեւս կարենաս յայտագիրդ այնպէս մը յարմարցնել որ շաբթուան մէջ օր մը յատկացնես օժանդակ ռահվիրաներուն հետ ծառայելու համար։
11. Ինչո՞ւ ստիպողականութեան զգացում պէտք է ունենանք։
11 Եհովայի ժողովուրդը ստիպողականութեան զգացում մը ունի։ Ընելիք գործ մը կայ,– բարի լուրը քարոզել։ Կեանքեր պարփակուած են, իսկ մնացած ժամանակը կարճցած է։ (Ա. Կորն. 7։29-31) Աստուծոյ եւ ընկերին հանդէպ սէրը մեզ պիտի մղէ որ ծառայութեան մէջ մեր կարելին ընենք։ Ջանք թափելով եւ լաւ ծրագրելով, թերեւս ծառայութեան նոր տարուան ընթացքին կարենանք առնուազն մէկ ամիս օժանդակ ռահվիրայութիւն ընել,– արդարեւ արժէքաւոր նպատակակէտ մը։