Ձեր Թաղամասին Մէջի Խուլերը Գտնելու Մէջ Արթուն Եղէք

¹ Եհովա հետեւեալ հրաւէրը կու տայ. «‘Եկո՛ւր’ . . . եւ ան որ կ’ուզէ՝ կենաց ջուրը թող ձրի առնէ»։ (Յայտ. 22։17) Այս կոչին ընդառաջողներուն մէջ հետզհետէ աւելցող մեծ թիւով խուլեր ալ կան։ Որպէս արդիւնք, վերջին 13 տարիներու ընթացքին, համրերու լեզուով 27 ժողովքներ եւ 43 խումբեր կազմուեցան Միացեալ Նահանգներու մասնաճիւղի պատկան թաղամասին մէջ։

² Թէեւ համրերու լեզուով ժողովքներ եւ խումբեր իրենց ամբողջ քարոզչական ջանքերը կը կեդրոնացնեն իրենց պատկան թաղամասերուն մէջի խուլ եւ լսելու տկարութիւն ունեցող անհատները գտնելու համար, սակայն, այս երկրին մէջ տակաւին կան բազմաթիւ այսպիսի անհատներ, որոնք պէտք է գտնուին ու անոնց վկայուի։

³ Ի՞նչպէս Կրնաք Օգնել. Երբ հանրային վայրերու մէջ էք, նկատա՞ծ էք անհատներ որոնք համրերու լեզուն կը գործածեն։ Ձեր գործատեղիին կամ դպրոցին մէջ կը ճանչնա՞ք անհատներ, որոնց ընտանիքի անդամներէն մէկը խուլ է։ Մինչ ձեր առօրեայ գործունէութիւնները կը կատարէք, արթուն եղէք գտնելու անհատներ որոնք խուլ են։ Սակայն ի՞նչպէս կրնաք վստահ ըլլալ թէ անոնք Թագաւորութեան մասին վկայութիւն մը պիտի ստանան։

⁴ Վկայութիւն մը Տալ. Խուլ անհատին հասցէն ղրկեցէք ձեզի ամենամօտ եղող համրերու լեզուով ժողովքին կամ խումբին։ Խուլերէն շատեր ճշմարտութիւնը սորվելու մէջ աւելի արագ կը յառաջդիմեն, երբ կարենան ընկերակցիլ Վկաներու հետ, որոնք Ամերիկեան Համրերու Լեզուով վարուած ժողովներ կը յաճախեն։ Հետեւաբար, եթէ ձեր շրջանին մէջ համրերու լեզուով ժողովք մը կամ խումբ մը կայ, ձեր ժողովքի քարտուղարը պէտք է ձեր թաղամասին մէջ գտնուող բոլոր խուլ անհատներու մասին եղած տեղեկութիւնները անոնց ղրկէ։

⁵ Ի՞նչ պէտք է ընէք եթէ ձեր շրջանին մէջ չկայ մէկը որ խուլերուն հոգեւոր գետնի վրայ կրնայ օգնել։ Ի՞նչպէս կրնաք օգտակար ըլլալ։ Կրնաք վերայցելութիւն մը տալ եւ լսելու կարողութիւն ունեցող ընտանիքի միւս անդամներուն խօսիլ։ Անոնց առաջարկեցէք համրերու լեզուով պատկերիզ մը ցուցադրել, խուլ անհատին հետաքրքրութիւնը արթնցնելու համար։ Հրատարակիչներէն ոմանք, նոյնիսկ Ամերիկեան Համրերու Լեզուն սորված են, որպէսզի աւելի ազդու կերպով կարենան խուլերուն քարոզել։ (Գործք 16։9, 10) Ի՛նչ կը Պահանջէ գրքոյկը եւ Գիտութիւն գիրքը պատկերիզի վրայ մատչելի են Ամերիկեան Համրերու Լեզուով։ Այս գործիքները գործածելով Աստուածաշունչի ուսումնասիրութիւններ վարելը, արդէն իսկ բազմաթիւ դրական արդիւնքներ տուած է։

⁶ Ձեր շրջանին մէջ խուլ անհատներ գտնելու մէջ արթուն ըլլալով, կրնաք անոնց պատեհութիւն տալ որ կեանքի ջուրը ձրի առնեն։—Մատթ. 10։11