Եհովայի Սիրոյն Հանդէպ Գնահատութիւն Ցուցաբերելուն Օրհնութիւնները—Մաս Ա.

¹ Յովհաննէս առաքեալ գրեց. «Մենք զանիկա կը սիրենք, վասն զի [Եհովան] առաջ մեզ սիրեց»։ (Ա. Յովհ. 4։19) Երբ խորհինք այն բոլոր բաներուն մասին, զորս Եհովան հայթայթած է մեզի համար, կը մղուինք մեր խոր գնահատութիւնը ցուցաբերելու։ Յիսուս ասիկա ընելու մէջ օրինակ հանդիսացաւ, հնազանդօրէն Աստուծոյ անուան եւ Թագաւորութեան մասին վկայելով։ (Յովհ. 14։31) Լաւ կ’ընենք նկատի առնելով կարգ մը կերպեր, որոնցմով կրնանք Եհովայի սիրոյն եւ անկէ առթած օրհնութիւններուն հանդէպ մեր գնահատութիւնը ցուցաբերել։

² Տունէ Տուն Երթալ. Յիսուս իր աշակերտներուն սորվեցուց Թագաւորութեան քարոզչութիւնը ի՛նչպէս կատարելու կերպը։ Իր ցուցմունքները բացայայտօրէն ցոյց կու տան թէ անոնք տունէ տուն գացին, բարի լուրը տարածելով։ (Ղուկ. 9։1-6. 10։1-7) Աստուծոյ ու դրացիին հանդէպ սէր կը պահանջէ որ շարունակենք տունէ տուն երթալ, երբ անտարբերութիւն կամ հակառակութիւն դիմագրաւենք։ Սակայն, մինչ տունէ տուն կ’երթանք, անձնապէս կ’օգտուինք, քանի որ մեր հաւատքը աւելի կը հաստատուի, մեր համոզումը աւելի կը զօրանայ եւ մեր յոյսը աւելի պայծառ կը դառնայ։

³ Հրեշտակային առաջնորդութեան ներքեւ գործելով, ճշմարտութեան ծարաւը ունեցող շատ անհատներ գտած ենք։ (Յայտ. 14։6) Տանտէրներ ըսած են թէ օգնութեան համար կ’աղօթէին, երբ Վկայ մը իրենց դուռը զարկաւ։ Երկու Վկաներ եւ երախայ մը տունէ տուն կ’երթային Ղարիպեան կղզիի մը մէջ։ Երբ չափահասները որոշեցին կենալ եւ տուն երթալ, երախան առանձին յաջորդ դուռը ուղղուեցաւ եւ զայն զարկաւ։ Երիտասարդուհի մը բացաւ դուռը։ Երբ չափահասները ասիկա տեսան, երիտասարդուհիին մօտեցան եւ անոր խօսեցան։ Ան զիրենք ներս հրաւիրեց եւ բացատրեց թէ ճիշդ այդ պահուն Աստուծոյ կ’աղօթէր որ Վկաները ղրկէր՝ իրեն Աստուածաշունչը սորվեցնելու համար։

⁴ Փողոցը Վկայել. Քանի որ կարգ մը շրջաններու մէջ մարդիկը տունը գտնելը շատ դժուար է, փողոցի վկայութիւնը մարդոց վկայութիւն մը տալու ազդու կերպ մըն է։ Ասկէ զատ, շատեր կը բնակին մուտքը արգիլուած շրջաններու կամ չափազանց ապահովուած յարկաբաժիններու մէջ, ուր չենք կրնար դռնէ դուռ երթալ։ Սակայն, Եհովայի սիրոյն հանդէպ մեր գնահատութիւնը մեզ կը մղէ որ կարելի եղող ամէն միջոց օգտագործենք, մարդոց Թագաւորութեան պատգամը տալու համար, ի ներառեալ՝ փողոցի վկայութիւնը։—Առ. 1։20, 21

⁵ Վերայցելութիւններ Ընել. Քանի որ կը փնտռենք այն անհատները «որոնք գիտակից են իրենց հոգեւոր պէտքերուն», կ’ուզենք մեր կարելին ընել այդ պէտքերը գոհացնելու համար։ (Մատթ. 5։3, ՆԱ) Ասիկա կը պահանջէ որ վերադառնանք, մեր ցանած ճշմարտութեան սերմերը ջրելու համար։ (Ա. Կորն. 3։6-8) Աւստրալիոյ մէջ քոյր մը թերթիկ մը տուաւ կնոջ մը, որ շատ հետաքրքրուած չէր թուեր։ Այսուհանդերձ, քոյրը զինք դարձեալ տունը գտնելու համար իր ջանքերուն մէջ յարատեւեց։ Երբ վերջապէս զինք տունը գտաւ, մեր քոյրը իմացաւ որ իր առաջին այցելութենէն ետք, կինը սուղնոց Աստուածաշունչ մը գներ էր։ Քոյրը իր հետ ուսումնասիրութիւն մը սկսաւ։

⁶ Աստուածաշունչի Ուսումնասիրութիւններ Վարել. Ասիկա կրնայ մեր ծառայութեան ամենէն հաճելի եւ վարձահատոյց երեսակը ըլլալ։ Ի՜նչ օրհնութիւն է մարդոց օգնել որ Եհովայի մասին սորվին, տեսնել որ անոնք իրենց կեանքին մէջ փոփոխութիւններ կը մտցնեն զինք հաճեցնելու համար, ապա ականատես ըլլալ Աստուծոյ կատարած իրենց նուիրումին որպէս խորհրդանիշ՝ անոնց քրիստոնէական մկրտութեան։—Ա. Թես. 2։20. Գ. Յովհ. 4

⁷ Յաջորդ թիւին մէջ, նկատի պիտի առնենք յաւելեալ օրհնութիւններ զորս կը վայելենք, քանի որ Եհովայի սիրոյն հանդէպ գնահատութիւն կը ցուցաբերենք։