Մեր Պաշտամունքի Վայրը Լաւ Վիճակի Մէջ Պահենք
1. Թագաւորութեան Սրահը ի՞նչ նպատակի կը ծառայէ։
1 Աշխարհի չորս կողմը Եհովայի Վկաներու աւելի քան 94,000 ժողովքներ կան։ Ժողովքներուն մեծամասնութիւնը Աստուածաշունչի ուսումնասիրութեան եւ քրիստոնէական ընկերակցութեան համար կը ժողվուի Թագաւորութեան Սրահին մէջ, որ կը ծառայէ որպէս մաքուր պաշտամունքին տեղական կեդրոնը։
2. Ինչո՞ւ կարեւոր է որ Թագաւորութեան Սրահը մաքուր եւ ներկայանալի ըլլայ։
2 Մաքրութեան Կանոնաւոր Յայտագիր. Թագաւորութեան Սրահը լաւ վիճակի մէջ պահելու համար տարուած աշխատանքը մեր սրբազան ծառայութեան կենսական մէկ մասն է։ Կազմակերպուած գիրքը էջ 61-62–ի մէջ կ’ըսէ. «Եղբայրները առանձնաշնորհում պէտք է նկատեն ո՛չ միայն Թագաւորութեան Սրահին նիւթապէս նեցուկ կանգնիլը, այլ նաեւ՝ զայն մաքուր, ներկայանալի ու լաւ վիճակի մէջ պահելու համար, սիրայօժարօրէն իրենց ծառայութիւնները մատուցանելը։ Ներսէն ու դուրսէն, Թագաւորութեան Սրահը պատշաճ կերպով Եհովայի կազմակերպութիւնը պէտք է ներկայացնէ»։ Որովհետեւ Թագաւորութեան Սրահը շաբաթը քանի մը անգամ կը գործածուի, հարկ կայ որ կանոնաւորաբար մաքրուի ու նորոգուի։ Սովորաբար այս հարցերուն հոգ կը տարուի Թագաւորութեան Սրահը գործածող ժողովքին (կամ ժողովքներուն) կամաւոր անդամներուն կողմէ։ Ինչպէս էր պարագան Աստուածաշունչի ժամանակներուն, Եհովայի այժմու ծառաները պաշտամունքի վայրը «նորոգելու եւ շինելու» մէջ պէտք է ժրաջան ըլլան։—Բ. Մնաց. 34։10
3. Թագաւորութեան Սրահին մաքրութիւնը ի՞նչպէս կը կազմակերպուի, եւ որո՞նք այս առանձնաշնորհումին մէջ կրնան բաժին բերել։
3 Թագաւորութեան Սրահին շաբաթական մաքրութեան յայտագիր մը պէտք է դրուի տեղեկութիւններու ցուցատախտակին վրայ։ Գրքի ուսումնասիրութեան բոլոր խումբերը կարգով սրահը պէտք է մաքրեն ամէն շաբաթ, հետեւելով ընելիք բաներուն ցանկին։ Բոլոր կարող անհատները պէտք է բաժին բերեն Թագաւորութեան Սրահը մաքուր ու ներկայանալի պահելու շաբաթական առանձնաշնորհումին մէջ։ Ծնողներու հսկողութեան ներքեւ, երախաներ կրնան մասնակցիլ, սորվելով այս առանձնաշնորհումին հանդէպ գնահատութիւն ցուցաբերել։ Յատկապէս երբ մէկէ աւելի ժողովքներ Թագաւորութեան Սրահը կը գործածեն, լաւ համագործակցութիւնը էական է, որպէսզի մեր պաշտամունքին այս կարեւոր երեսակին հոգ տանիլը միայն քանի մը հոգիի պատասխանատուութիւնը չըլլայ։
4. Ի՞նչ կարգադրութիւն պէտք է ըլլայ, որպէսզի ժողովքը գիտնայ ի՛նչ ընել Թագաւորութեան Սրահը մաքրելու ատեն։
4 Ընելիք բաներուն ցանկը կրնայ կախուիլ, թերեւս ուր որ մաքրութեան պիտոյքները կը պահուին։ Այս ցանկը պէտք է նշէ ամէն շաբաթ կատարուելիք պարտականութիւնները, ինչպէս՝ գորգը մաքրել, պատուհանները սրբել, պահարաններուն վրայի փոշին առնել, աղբի կողովները պարպել, գետինը սրբել եւ հայելիները մաքրել։ Կարգ մը պարտականութիւններ ժամանակ առ ժամանակ կարելի է կատարել, ինչպէս՝ կահկարասին փայլեցնել եւ աթոռները, վարագոյրներն ու լոյսի սարքերը լիովին մաքրել։ Մաքրութեան համար գործածուած բոլոր քիմիական նիւթերը մանուկներուն հասողութենէն հեռու եւ յստակօրէն պիտակուած պէտք է ըլլան։ Հակիրճ բացատրութիւն մը պէտք է տրուի թէ իւրաքանչիւր քիմիական նիւթ ի՛նչպէս պէտք է գործածուի։
5. Ապահովութիւնը որքա՞ն կարեւոր է, եւ պարբերաբար ի՞նչ բաներ պէտք է ստուգուին։ (Տես էջ 4–ի վրայ գտնուող շրջագիծը։)
5 Ապահովութիւնը Թագաւորութեան Սրահին մէջ շատ կարեւոր է։ (Բ. Օր. 22։8) Այս ուղղութեամբ էջ 4–ի վրայ գտնուող շրջագիծը կը թուէ կարգ մը կէտեր, որոնք պարբերաբար պէտք է ստուգուին, որպէսզի արկածներու առաջքը առնուի։
6. Թագաւորութեան Սրահը լաւ վիճակի մէջ պահելու գործը ի՞նչպէս կը համակարգուի։
6 Թագաւորութեան Սրահը Լաւ Վիճակի Մէջ Պահել. Երէցներու մարմինը կը վերահսկէ Թագաւորութեան Սրահին հոգ տանելուն վրայ։ Ընդհանրապէս երէց կամ օգնական ծառայ մը կը նշանակուի այս գործը համակարգելու համար։ Ան Թագաւորութեան Սրահին ամէնօրեայ գործունէութիւնները կը կազմակերպէ, վստահ ըլլալով որ անիկա մաքուր ու լաւ վիճակի մէջ կը պահուի, եւ թէ անհրաժեշտ պիտոյքները մատչելի են։ Կարեւոր է որ սրահին մէջ կամ անոր շուրջը վտանգաւոր վիճակներ չգտնուին։ Երբ երկու կամ աւելի ժողովքներ նոյն սրահը կը գործածեն, երէցներու մարմինները յանձնախումբ մը կը նշանակեն, կառոյցին եւ ինչքին հոգ տանելու կարգադրութիւնները կազմակերպելու համար։ Այս յանձնախումբը երէցներու մարմիններուն առաջնորդութեան ներքեւ կը գործէ։
7. (ա) Ամէն տարի ի՞նչ քայլեր կ’առնուին, վստահ ըլլալու համար թէ Թագաւորութեան Սրահը լաւ վիճակի մէջ է։ (բ) Ո՞ր հարցերը պարբերաբար ուշադրութեան կը կարօտին։ (Տես էջ 5–ի վրայ գտնուող շրջագիծը։)
7 Տարին անգամ մը, Թագաւորութեան Սրահը մանրակրկիտ քննութեան կ’ենթարկուի։ Երէցները պատասխանատու են կարգադրութիւններ ընելու, որ լիովին հոգ տարուի որեւէ հարցի որ ուշադրութեան կը կարօտի։ Հարկ եղած նորոգութիւններուն համար, կարելի է հրատարակիչներուն օգնութիւնը խնդրել։ Բոլորն ալ պէտք է ջանան նոյնիսկ պզտիկ հարցերը սրբագրել եւ անյապաղ խնդիրները լուծեն։
8. Նորոգութեան հարցերու նկատմամբ երէցները ե՞րբ կրնան Շրջանային Շինարարական Յանձնախումբին հետ կապ պահել։
8 Եթէ երէցները Թագաւորութեան Սրահին նորոգութեան համար խրատի կամ օգնութեան կարիքը ունենան, կրնան Շրջանային Շինարարական Յանձնախումբին հետ կապ պահել։ Հարցերը կրնան ըլլալ՝ գորգին, պայմանադրուած օդի սարքերուն եւ խոնաւութեան վերաբերեալ խնդիրներ։
9. Ո՞ր գործընթացին պէտք է հետեւիլ, եթէ հարկ ըլլայ յանձնառու մը վարձել։
9 Ժողովքին Հիմնադրամները Իմաստութեամբ Գործածել. Թագաւորութեան Սրահին եւ անոր շրջակայքին հետ առնչուած գործին մեծ մասը կամաւորներ կը կատարեն։ Անոնց անձնազոհ ջանքերը սիրոյ հոյակապ արտայայտութիւն մըն են եւ ծախսերը մեծապէս կը նուազեցնեն։ Եթէ անհրաժեշտ ըլլայ յանձնառու մը վարձել կարգ մը գործեր կատարելու համար, ինչպէս՝ վնասակար միջատներ բնաջնջել կամ ձիւնը վերցնել, երէցները պէտք է ջանան նուազագոյն վճարումը ապահովել։ Անոնք ասիկա կ’ընեն, նախ՝ կատարուելիք գործին եւ հարկ եղած նիւթերուն մասին մանրամասն նկարագրութիւն մը պատրաստելով։ Այս ցանկին մէկ պատճենը կը տրուի զանազան յանձնառուներու, որպէսզի բոլորն ալ պահանջներուն նկատմամբ նոյն հասկացողութիւնը ունենալով սակեր ներկայացնեն։ Մի քանի գրաւոր առաջարկներ ստանալէ ետք, երէցները կրնան լաւագոյնը ընտրել։ Այս գործընթացին պէտք է հետեւիլ, նոյնիսկ եթէ եղբայր մը առաջարկած է որոշ գնով գործը կատարել կամ հարկ եղած նիւթերը հայթայթել։
10. Ի՞նչ քայլեր կ’առնուին որ ժողովքի հիմնադրամները պատշաճ կերպով գործածուին։
10 Երէցները նաեւ անհրաժեշտ քայլերը կ’առնեն որ կալուածն ու ապրանքները տուրքէ զերծ նկատուին, հոն ուր ասիկա մատչելի է։ Երբ մէկէ աւելի ժողովքներ նոյն Թագաւորութեան Սրահը կը գործածեն, յանձնախումբը անջատ հաշիւ մը կը պահէ, եւ ամէն ամիս իւրաքանչիւր երէցներու մարմինին հաշիւի գրաւոր տեղեկագիր մը կու տայ, այսպիսով երէցները տեղեակ պահելով թէ դրամը ի՛նչ կերպով կը ծախսուի։ Երէցները ժողովքին հիմնադրամները պատշաճ կերպով գործածուելուն պատասխանատու են։
11. Ի՞նչ պէտք է ընել եթէ հիմնական նորոգութեան մը կարիքը կայ։
11 Հիմնական Նորոգութիւններ. Երբ յանձնախումբը նկատէ թէ Թագաւորութեան Սրահին գործածութեան կամ նորոգութեան համար մեծ ծրագրի մը կարիքը կայ, երէցներու մարմիններուն ուշադրութեան կը յանձնէ հարցը, ուղղութիւն ստանալու համար։ Երէցները Շրջանային Շինարարական Յանձնախումբին հետ կապ կը պահեն, եթէ որոշուի հիմնական նորոգութիւններ ընել կամ եթէ Թագաւորութեան Սրահը գործածող ժողովքներէն զատ ուրիշներու օգնութեան կարիքը կայ։ Այս որակելի, փորձառու եղբայրները օգտակար թելադրութիւններ կու տան ու կը վերահսկեն գործին վրայ։ Եթէ ծախսը շատ մեծ պիտի ըլլայ, անհրաժեշտ է ճշգրիտ ծախսը հաշուել ու որոշում մը պատրաստել՝ ժողովքին հաւանութիւնը առնելու համար։—Տես՝ Փետրուար 1994–ի Մեր Թագաւորութեան Ծառայութիւնը թերթիկին Հարցումի Տուփը։
12. Թագաւորութեան Սրահին մէջ ժողովներուն ներկայ գտնուելու առանձնաշնորհումին հանդէպ ի՞նչպէս կրնանք մեր գնահատութիւնը ցուցաբերել։
12 Որքա՜ն խոր կերպով կը գնահատենք Թագաւորութեան Սրահին մէջ միասնաբար հաւաքուելու մեր առանձնաշնորհումը։ Երբեք պիտի չուզենք մեր ժողովները անտեսել կամ թեթեւի առնել։ Բոլորս ալ կրնանք մեզ քաջալերելու համար եղած այս կարգադրութեան յաջողութեան նպաստել, մեր Թագաւորութեան Սրահին հոգ տանելուն մէջ լիովին մասնակցութիւն բերելով։ Ասիկա մաքուր պաշտամունքը կը պանծացնէ եւ Եհովայի անունին պատիւ կը բերէ։ Թող որ վճռենք մեր պաշտամունքի վայրը լաւ վիճակի մէջ պահել։
[Շրջանակ՝ էջ 4]
Ապահովութեան Ստուգացանկ
◻ Հրշէջները դիւրահասանելի պէտք է ըլլան եւ տարին անգամ մը ստուգուին։
◻ Ինքնագործ հրշէջի դրութիւնը պէտք է ստուգուի տեղական օրէնքին համաձայն։
◻ Ելքի դռները եւ աստիճանները յստակօրէն նշուած, լաւ լուսաւորուած եւ դիւրահասանելի պէտք է ըլլան, իսկ բազրիքները՝ ապահով։
◻ Մթերանոցները, արտաքնոցները եւ հանդերձ կախելու սենեակները մաքուր ու կոկիկ պէտք է ըլլան, ինչպէս նաեւ՝ դիւրավառ նիւթերէ, անձնական իրերէ ու աղբերէ զերծ։
◻ Տանիքը եւ ջրորդանները կանոնաւորաբար պէտք է ստուգուին ու մաքրուին։
◻ Մայթերը ու կառատունը լուսաւորուած պէտք է ըլլան, եւ՝ սահելու կամ իյնալու վտանգէ զերծ։
◻ Ելեկտրական, ջեռուցման եւ օդափոխութեան սարքերը պէտք է ստուգուին եւ պատշաճօրէն նորոգուին։
◻ Ամէն կաթեցումի հարց անմիջապէս պէտք է լուծուի, խոնաւութեան լուրջ խնդիրներու առաջքը առնելու համար։
◻ Կառոյցը պէտք է կղպել, երբ անոր մէջ մէկը չկայ։
[Շրջանակ՝ էջ 5]
Կառոյցին ու Ստացուածքներուն Հոգ Տանիլ
◻ Արտաքին մասը. Տանիքը, պատերը, ներկը, պատուհանները եւ Թագաւորութեան Սրահին ցուցատախտակը լաւ վիճակի մէ՞ջ են։
◻ Սրահին շուրջը. Գետինը, մայթերը, ցանկապատը եւ կառատունը լաւ վիճակի մէ՞ջ են։
◻ Ներքին մասը. Գորգերը, վարագոյրները, աթոռները, անշարժ իրերը, որմաթուղթը, գրադարանները եւ հանդերձ կախելու սենեակը ներկայանալի՞ են։
◻ Գործիքները. Լուսաւորումի, ձայնի, ջեռուցման, օդափոխութեան եւ պայմանադրուած օդի սարքերը լաւ վիճակի մէ՞ջ են։
◻ Արտաքնոցները. Անոնք մաքուր եւ լաւ վիճակի մէ՞ջ են։
◻ Ժողովքի փաստաթուղթերը. Հիմնարկին կամ խնամակալութեան փաստաթուղթերը այժմէական եւ ճշգրի՞տ են։ Հոն ուր պահանջուած է, կալուածը տուրքէ զերծ ըլլալու պատճենը ամէն տարի կը ներկայացուի՞։