Ձեր Երախտագիտութիւնը Ցուցաբերեցէք
1 Թէեւ «չար ժամանակներ»ու մէջ կ’ապրինք, սակայն Եհովայի երախտապարտ ըլլալու բազմաթիւ պատճառներ ունինք։ (Բ. Տիմ. 3։1) Գլխաւոր պատճառը իր Որդիին թանկագին պարգեւն է։ (Յովհ. 3։16) Ասկէ զատ, մինչ սուտ կրօնքին մէջ եղողները հոգեւորապէս սովաբեկ են, մենք ճոխ հոգեւոր սնունդ կը վայելենք։ (Եսայ. 65։13) Մենք համաշխարհային եղբայրութեան մը մաս կը կազմենք եւ առանձնաշնորհում ունինք ճշմարիտ պաշտամունքի տարածման մէջ բաժին բերելու։ (Եսայ. 2։3, 4. 60։4-10, 22) Ի՞նչպէս կրնանք ցոյց տալ թէ Եհովայի երախտապարտ ենք իր առատ օրհնութիւններուն համար։—Կող. 3։15, 17
2 Ուրախ եւ Սրտագին Ծառայութիւն. Երբ նիւթական նուիրատուութիւններուն մասին կը խօսէր, Պօղոս առաքեալ գրեց. «Աստուած յօժարակամ տուողը կը սիրէ»։ (Բ. Կորն. 9։7) Այս սկզբունքը նաեւ կը կիրարկուի Աստուծոյ մատուցած մեր ծառայութեան։ Երախտագիտութիւնը կը դրսեւորուի ճշմարտութեան հանդէպ մեր խանդավառութեամբ, քրիստոնէական ժողովներուն մէջ մեր ուրախութեամբ, դաշտի ծառայութեան մէջ մեր նախանձախնդրութեամբ եւ աստուածային կամքը ցնծութեամբ կատարելով։—Սաղմ. 107։21, 22. 119։14. 122։1. Հռովմ. 12։8, 11
3 Վաղեմի Իսրայէլի մէջ Օրէնքը կարգ մը ընծաներու նկատմամբ մասնայատուկ քանակ չորոշեց։ Իւրաքանչիւր երկրպագու կրնար իր երախտագիտութիւնը ցուցաբերել՝ ‘Աստուծոյ իրեն տուած օրհնութեանը համեմատ’ տալով։ (Բ. Օր. 16։16, 17) Նմանապէս ներկայիս, շնորհապարտ սիրտը պիտի մղէ մեզ որ Թագաւորութեան քարոզչութեան եւ աշակերտելու գործին մասնակցինք մեր պարագաներուն ներած չափով։ Ամառուան ամիսները յաճախ մեր երախտագիտութիւնը ցուցաբերելու յաւելեալ պատեհութիւններ կը հայթայթեն։ Ոմանք գործի կամ դպրոցի արձակուրդը եւ ցերեկուան ժամերը կ’օգտագործեն, դաշտի ծառայութեան իրենց ժամերը աւելցնելու, նոյնիսկ օժանդակ ռահվիրայութիւն ընելու համար։ Կրնա՞ք այս ամառ ձեր ծառայութիւնը ընդլայնել։
4 Անդադար Երախտագիտութիւն Ցուցաբերեցէք. Եհովայի կը յայտնենք մեր շնորհակալութիւնը գլխաւորաբար աղօթքով։ (Ա. Թես. 5։17, 18) Աստուծոյ Խօսքը մեզ կը յորդորէ. «Անդադար գոհութիւն յայտնեցէք»։ (Կող. 2։7, Անթիլիաս) Նոյնիսկ երբ շատ զբաղած կամ ճնշուած ենք, մեր առօրեայ աղօթքներուն մէջ միշտ շնորհակալական խօսքեր պէտք է պարփակենք։ (Փիլ. 4։6) Այո, մեր ծառայութեամբ ու աղօթքներով, թող որ ‘ճոխանանք շատ շնորհակալութիւններով՝ ուղղուած Աստուծոյ’։—Բ. Կորն. 9։12, ԱՎ