Շնորհապարտ Ենք Մեր Ունեցածին Համար
1 «Աստուած իր սէրը որ մեր վրայ ունէր՝ յայտնեց, երբ դեռ մեղաւոր էինք, Քրիստոս մեզի համար մեռաւ»։ (Հռովմ. 5։8, 9) Բոլորս ալ որքա՜ն շնորհապարտ պէտք է ըլլանք գերագոյն զոհողութեան համար զոր Եհովա Աստուած եւ իր Որդին ըրին ի նպաստ մեզի։ Քրիստոսի թափած արեան միջոցաւ, մեզի տրուած է յաւիտենական կեանքի պատեհութիւնը, բան մը որ ո՛չ մէկ մարդ կրնայ մեզի տալ։
2 Ինչպէ՞ս կրնանք մեր գնահատանքը ցոյց տալ։ Շատ մարդիկ կան որոնք ճշմարիտ գիտութեան կը ծարաւին, որ կրնայ գտնուիլ միմիայն Աստուծոյ Սուրբ Խօսքին մէջ։ Եհովայի կամքն է որ անոնք ճշմարտութիւնը ճանչնան։ (Ա. Տիմ. 2։4) Ճշմարտութեան հանդէպ մեր գնահատանքը կը ցուցաբերենք «Աստուծոյ թագաւորութիւնը [քարոզելով]»։ (Ղուկ. 4։44) Լման սրտով այս գործին մասնակցիլը ցոյց կու տայ թէ կը գնահատենք որ Քրիստոս մեզի համար մեռաւ եւ թէ կ’ուզենք զինք ընդօրինակել, աշակերտելու իր պատուէրին հաւատարմօրէն հնազանդելով։—Մատթ. 28։19, 20
3 Քարոզելու կարգ մը միջոցները ի՞նչ են զորս կրնանք օգտագործել։ Կարելի՞ է որ ժամանակ առ ժամանակ օժանդակ ռահվիրաներ ըլլանք։ Ծախքը հաշիւ ընելէ ետք, ոմանք թերեւս կրնան կանոնաւոր ռահվիրայութեան ծառայութիւնը ստանձնել։ Այս ընտիր պատեհութիւնները օգտագործելով, կրնանք աւելցնել մեր յատկացուցած ժամանակը Թագաւորութեան բարի լուրը տարածելու համար։ Անցեալին թերեւս մտածեցիք ռահվիրայ ըլլալու մասին, բայց խոչընդոտներ կային։ Թերեւս ձեր պարագաները փոխուած են։ Եթէ այո, լրջօրէն մտածե՞ր էք ռահվիրայական ծառայութիւնը որդեգրել կամ որպէս օժանդակ ռահվիրայ ծառայել։
4 Մեր շնորհակալութիւնը աւելի խոր կը դառնայ երբ կը նայինք մեր շուրջը տեղի ունեցած բաներուն։ Համայն աշխարհի մէջ երթալով աւելի բռնութիւն, ատելութիւն եւ պայքար կան։ Պօղոս մեր օրերը լաւ կերպով նկարագրեց որպէս «չար ժամանակներ»։ (Բ. Տիմ. 3։1) Այս տառապալից վիճակներուն ներքեւ, մենք առատապէս բարի լուր ունինք ուրիշներու հետ բաժնելու։ Երկու ընտիր պարբերաթերթեր ունինք՝ Դիտարանը եւ Զարթի՛րը։ Այս ամիս կրնանք անհատական օրինակներ կամ բաժանորդագրութիւններ ներկայացնել։ Նաեւ զանազան նիւթերու շուրջ գրքոյկներ ունինք։ Այս գրականութիւնները կրնան ընթերցողներուն իսկական սփոփում բերել։ Մեր ունեցածին համար շնորհապարտ ըլլալը պէտք է մեզ մղէ որ ուրիշներու հետ առատաձեռնօրէն զայն բաժնենք։—Եբր. 13։16
5 Կրնայ ըլլալ որ ձեր բնակած շրջանին մէջ մարդիկ քիչ հետաքրքրութիւն կը ցուցաբերեն հոգեւոր բաներու հանդէպ։ Անոր ճիշդ հակառակը, պտղաբեր թաղամասեր կան։ Շատ հետաքրքրութիւն կը գտնուի օտար լեզու խօսող խմբակներուն մէջ։ Եթէ կրնաք մէկէ աւելի լեզուներ խօսիլ, կարելի՞ է որ ծառայէք այս երկրին որոշ մէկ շրջանին մէջ ուր ձեր օգնութեան իսկական կարիքը կայ։ Ձեր շրջանային տեսուչը այս ուղղութեամբ կարգ մը թելադրութիւններ կրնայ ունենալ։
6 Ամէն պատճառ կայ շնորհապարտ ըլլալու մեր ունեցածին համար՝ արդարեւ բարի բաներու առատութիւն մը։ Եհովայի անունը եւ նպատակները ուրիշներու ճանչցնելը լաւագոյն կերպն է որով կրնանք մեր շնորհակալութիւնը իրեն արտայայտել։—Եսայ. 12։4, 5