Պէթէլի Ծառայութիւնը—Յաւելեալ Կամաւորներու Կարիքը Կայ

¹ Մենք կը ցնծանք տեսնելով այն մեծ գործը զոր Եհովա կը կատարէ այս վերջին օրերուն մէջ։ Սաղմոս 110։3–ը ցոյց կու տայ թէ այս ժամանակին ընթացքին Աստուծոյ ժողովուրդին ցցուն մէկ յատկութիւնը պիտի ըլլար իրենց կամեցողութիւնը Թագաւորութեան ծառայութեան մէջ գործունեայ բաժին մը բերելու։ Համայն երկրի վրայ Եհովայի ժողովուրդը իրենք զիրենք ձեռնտու կ’ընեն Թագաւորութեան բարի լուրը քարոզելու։ Հրատարակողներ գիրքը, էջ 295, կը նշէ. «Ոմանք կը ծառայեն որպէս Պէթէլի երկրածաւալ ընտանիքին անդամներ։ Ասիկա լիաժամ ծառաներու խումբ մըն է որ կամաւոր եղած է ընելու ի՛նչ որ իրեն կը նշանակուի Աստուածաշունչի գրականութիւններ պատրաստելու եւ հրատարակելու, անհրաժեշտ գրասենեակի գործերու հոգ տանելու եւ այսպիսի գործունէութիւններու նեցուկ կանգնող ծառայութիւններ հայթայթելու նկատմամբ։ Ասիկա գործ մը չէ որու մէջ անձնական երեւելիութիւն կամ նիւթական ստացուածքներ կը շահին։ Անոնց փափաքն է Եհովան պատուել, եւ կը գոհանան իրենց համար եղած հայթայթումներով. կերակուրը, բնակարանը եւ անձնական ծախքի համար համեստ վճարում մը»։ Եթէ այցելած էք Պէթէլը, հոն կատարուած գործին հետ արդէն որոշ չափով ծանօթ էք։ Սակայն, կը փափաքինք յաւելեալ տեղեկութիւններ ներկայացնել ձեր գնահատութիւնը զօրացնելու այս ծառայութեան յատուկ առանձնաշնորհումին հանդէպ եւ ձեզ տեղեակ պահելու Ընկերութեան կարիքներուն նկատմամբ։

² Պէթէլի ծառայութեան կարեւորութիւնը եւ անոր ճոխ ժառանգութիւնը հեռանկարի մէջ դնելու համար, թող որ վերաքաղ ընենք Եհովայի կազմակերպութեան պատմութենէն մաս մը՝ անցեալ եւ արդի ժամանակներէն։ Դիտարանի Ընկերութիւնը շուրջ 19 տարի իր կեդրոնատեղին ունէր Փէնսիլվանիա նահանգի Ալէկընի քաղաքին մէջ, 56-60 Arch Street, չորս յարկանի կղմինտրածածկ շէնքի մը մէջ։ Ան Աստուածաշունչի Տուն կը կոչուէր։ Սակայն, 1908–ին, Աստուածաշունչի Տան ընտանիքը՝ կամ Ընկերութեան կեդրոնատեղիի անձնակազմը՝ 30 անդամներէ աւելի եղած էր։ Ընդլայնելու ժամանակն էր։ Աստուածային առաջնորդութիւնը փնտռելէ ետք, եղբայրները որոշեցին թէ Պրուքլինը կրնար գործին համար ամենէն յարմար կեդրոնը ըլլալ։ Ուստի Պրուքլինի մէջ, 13-17 Hicks Street, շէնք մը գնուեցաւ Ընկերութեան գրասենեակները եւ լսարան մը պատսպարելու համար։ Այս գրասենեակները բացուեցան Յունուար 31, 1909–ին, բայց բնակարանի դիւրութիւններ չկային այս Hicks Street–ի շէնքին մէջ։ Սկիզբը կը կարծուէր թէ կարելի էր բնակարանի դիւրութիւններ վարձու առնել։ Սակայն, Brooklyn Heights–ի շրջանին բնակարաններէն ոչ մէկը վարձու էր։ Երբ պարագաները փոխուեցան, եղբայրները՝ անակնկալի գալով եւ ուրախութեամբ՝ «աժան գինով» ծախու առին չորս յարկանի թխաքար շէնք մը, 124 Columbia Heights–ի մէջ, Հէնրի Ուօրտ Պիչերի նախկին բնակարանը։ Նաեւ, յարակից 126 Columbia Heights–ը մատչելի եղաւ։ Դիտարան Մարտ 1, 1909–ի թիւը ուրախութեամբ յայտարարեց. «Նոր տունը Պէթէլ պիտի կոչենք», փոխարինելով Փիթցպըրկի «Աստուածաշունչի Տուն» արտայայտութիւնը։ Ուստի Ապրիլ 1909–ին, Պէթէլը սկսաւ գործել եւ ընտանիքը իր նոր տունը փոխադրուեցաւ։ Պրուքլինի Պէթէլը 85 տարիներէ ի վեր նոյն վայրն է։

³ Ընկերութեան կեդրոնատեղիին համար Պէթէլը յարմա՞ր անուն մըն էր։ Նկատի առնենք անուան Սուրբ Գրային ծագումը եւ անոր հետ կապակցութիւն ունեցող բաները։ Ետեւ երթալով աւելի քան 3,700 տարիներ, Ծննդոց գլուխ 28–ը կը պատմէ 77 տարեկան, ամուրի Յակոբի փորձառութիւնը։ Յակոբ սրբազան բաները կը գնահատէր, բայց իր երկուորեակ եղբօրմէն՝ Եսաւէ՝ ատուած էր։ Իր հօր՝ Իսահակի՝ առաջնորդութեամբ, Յակոբ Բերսաբէէ փախուստ տուաւ եւ դէպի հիւսիս ուղղուեցաւ Աբրահամի ազգականներուն երկիրը, որոնց մէջէն կին մը առնել մտադրած էր։ Շուրջ 100 քիլոմեթր ճամբորդելէ ետք, Յակոբ կանգ առաւ գիշերը հանգստանալու համար, Լուզ կոչուած տեղ մը Յուդայի բլուրներուն մէջ։ Ծննդոց 28։10–19–ի մէջ, կը կարդանք գրաւիչ մանրամասնութիւններ թէ ինչպէ՛ս Եհովա Յակոբի տուաւ աստուածային աջակցութեան լման երաշխիքը։ Երազի մը մէջ, Յակոբ տեսաւ սանդուխ մը որ երկրէ դէպի երկինք կ’երկարէր։ Հրեշտակներ այս սանդուխէն կ’ելլէին ու կ’իջնէին, իսկ Եհովա անոր վերը կայնած էր։ Ապա Եհովա խօսեցաւ, հաստատելով թէ սերունդի մը նկատմամբ Աբրահամին տրուած խոստումը Յակոբի փոխանցուեցաւ եւ թէ Եհովա զինք պիտի չլքէր։ Ի՜նչ վախազդու փորձառութիւն մը հոգեւոր միտում ունեցող Յակոբի համար։ Զարմանալի՞ է որ ասիկա իրեն համար մասնաւոր տեղ մը եղաւ։ Իրեն համար այս վայրը «Աստուծոյ տուն»ն էր, կամ Եբրայերէն լեզուով Բեթէլ, Բեթ «տուն» նշանակելով եւ Էլ՝ «Աստուած»։—Ծննդոց 28։19, ՆԱ, ստորանշում։

⁴ Արդ, Պէթէլ անունը ճոխ պատմական անցեալ մը ունի եւ Եհովայի ժողովուրդին համաշխարհային կեդրոնատեղիին համար յարմար է։ Այսօր Աստուծոյ ծառաները աստուածային ներշընչմամբ երազներ չունին։ Հրեշտակներ չեն տեսնուիր որոնք Պէթէլէն երկինք երկարող սանդուխի մը վրայ կ’ելլեն ու կ’իջնեն։ Եղբայրները տեսիլքներ չեն ստանար, ոչ ալ Աստուծոյ ձայնը ուղղակիօրէն կը լսեն։ Բայց եւ այնպէս, երբ նկատի կ’առնէք ամէն ինչ որ տեղի ունեցաւ Պէթէլի մէջ այս անցեալ 85 տարիներուն՝ Եղբայր Ռասըլի ժամանակէն մինչեւ հիմա՝ կասկած չկայ որ Եհովայի ձեռքը Պէթէլի մէջ իր օծեալ ծառաներուն՝ Աբրահամի հոգեւոր սերունդէն եղողներուն՝ հետ եղած է։ Եհովայի այժմու Վկաներուն պատմութեան մէջ ուշագրաւ շա՜տ դէպքեր սերտօրէն կապ ունին Պէթէլի հետ։ Նկատի առնենք կարգ մը աչքառու կէտեր.

◼ Հոկտեմբեր 2, 1914–ին, երբ Պէթէլի ճաշասրահը մտաւ, Եղբայր Ռասըլ ճշգրտօրէն յայտարարեց. «Հեթանոսաց Ժամանակները վերջացան. անոնց թագաւորները իրենց օրը ունեցան»։

◼ 1920–ական թուականներուն սկիզբը, առաւօտեան պաշտամունքի ընթացքին, Ընկերութեան խմբագրական անձնակազմին մէկ անդամը գործածեց «Աստուծոյ կազմակերպութիւն» արտայայտութիւնը։ Ասիկա իրենց մտածելակերպը ա՛յնքան խթանեց որ եղբայրները 1925–ին հասկցած էին թէ երկու տարբեր եւ իրարու հակառակող կազմակերպութիւններ կան. Եհովայի կազմակերպութիւնը եւ Սատանայի կազմակերպութիւնը։—Դիտ. 3/15/85 էջ 10, Անգլերէնով։

◼ 1931–ին, օր մը առաւօտեան կանուխ ժամերուն, Օհայոյի Գոլոմպըս քաղաքին մէջ տեղի ունեցած համաժողովէն քիչ մը առաջ, Ընկերութեան նախագահը՝ Եղբայր Ռատըրֆորտ՝ զատորոշեց թէ Եհովայի Վկաներ անունը իրապէս կը նկարագրէր Աստուծոյ ժողովուրդը եւ այն գործը զոր արդէն կը կատարէին եւ թէ անոնք պէտք է ճանչցուին որպէս Իր Վկաները։—1975–ի Տարեգիրք, էջ 151։

◼ 1935–ին սկիզբը, հարցումներ յարուցուեցան թէ «մեծ բազմութիւն»ը ո՞վ է։ (Յայտ. 7։9) Այն ատեն իրենք զիրենք արտայայտողներէն ոմանք առաջարկեցին որ երկրային դասակարգ մըն էին։ Մայիս 31, 1935–ին, Ուաշինկթըն Տի.Սի.–ի համաժողովին մէջ, գոհացուցիչ բացատրութիւն մը տրուեցաւ։—Հրատարակողներ էջ 166։

⁵ Այս մի քանի օրինակները ցոյց կու տան թէ ինչպէ՛ս Եհովա, իր սուրբ հոգիին միջոցաւ, առաջնորդութիւն եւ օգնութիւն տուած է իր հաւատարիմ օծեալ ծառաներուն, Պէթէլի մէջ։ Իսկ ի՞նչ ըսել հրեշտակներուն մասին։ Երբ նկատի կ’առնէք մեր թշնամիներէն եկած ամբողջ դառն հակառակութիւնը եւ այն դժուար տարիները երբ նիւթական միջոցները հազուագիւտ էին, կասկած չկայ թէ առանց հրեշտակային պաշտպանութեան եւ օգնութեան, Պէթէլը պիտի չկարենար գործել այսքան աչքառու կերպով այս բոլոր տարիներուն ընթացքին։

⁶ Միացեալ Նահանգներու կեդրոնատեղիի անձնակազմէն զատ, աշխարհի չորս կողմը Պէթէլի ընտանիքներ կան 100 մասնաճիւղերու մէջ։ Մեր Ծառայութիւնը Կատարելու Համար Կազմակերպուած գիրքը, էջ 116, կ’ըսէ. «Պէթէլ անունը . . . վստահաբար յարմար է աստուածպետական գործունէութեան այս կեդրոններուն համար»։ Պէթէլի կամաւորները կը նշանակուին ի՞նչ տեսակ գործ ընելու։

⁷ Այլազան Գործեր. Պէթէլի ընտանիքի անդամներուն տրուած գործի նշանակումները այլազան են։ Պրուքլինի մէջ եւ կարգ մը ուրիշ մասնաճիւղերու մէջ, եղբայրներէն ոմանք կ’աշխատին տպագրական մեքենաներու վրայ, որոնք կը տպեն Աստուածաշունչեր, գրքեր, պարբերաթերթեր, գրքոյկներ եւ թերթիկներ, համայն աշխարհի մէջ բաշխելու։ Ուրիշներ Աստուածաշունչերը եւ գրքերը կը կազմեն, մինչ ուրիշներու գործը կ’ընդգրկէ այս գրականութիւնները առաքել աշխարհի շուրջ գտնուած ժողովքներուն։ Անդամներէն ոմանք կը նշանակուին գործիքները եւ շէնքերը պահպանելու։ Պէթէլի Տան մէջ, շատ գործ պարփակուած է ընտանիքին հոգ տանելու համար։ Զոր օրինակ, Պրուքլինի Պէթէլին մէջ, 20 վայրկեանի մէջ նախաճաշ կը հրամցուի մօտաւորապէս 3,700 անհատներու, 12 ճաշասրահներու մէջ։ Լուացքատան մէջ, եղբայրներ ու քոյրեր ամէն շաբաթ կը լուան 16,000 քիլոկրամ հագուստեղէն, մէջը ըլլալով 13,000 շապիկ։ Ասկէ զատ, մաքրութեան հոգ տանողները կը պահպանեն մաքրութեան բարձր չափանիշ մը Պրուքլինի 21 բնակութեան կառոյցներուն մէջ եւ բազմաթիւ ուրիշ կենսական պարտականութիւններ կը կատարեն։

⁸ Որակումներ եւ Պահանջներ. Նկատի առնելով այս գործին մեծամասնութեան պահանջած ֆիզիքական կորովն ու զօրութիւնը, ներկայիս կարիք կայ առողջ ամուրի երիտասարդներու։ Պէթէլի ծառայութեան դիմումնագիր ներկայացնելու համար, երիտասարդ մը պէտք է նուիրուած եւ մկրտուած ըլլայ առնուազն մէկ տարի։ Ան պէտք է նուիրեալ, հոգեւոր անձ մը ըլլայ։ Նաեւ, ան պէտք է կամեցող ըլլայ ծանր աշխատանք կատարելու։ Այսօր աշխարհի մէջ, շատ մը մարդիկ կ’ուզեն ծանր աշխատանքէ խուսափիլ։ Ուստի Պէթէլի ծառայութեան դիմումնագիր ներկայացնող երիտասարդը պէտք է նոր անձնաւորութիւնը հագնի այն աստիճան որ ուզէ ծանր աշխատանք ընել, իր ձեռքերով աշխատելով ի՛նչ որ աղէկ գործ է։ (Բաղդատել Եփեսացիս 4։28։) Ասիկա կը նշանակէ թէ ան պէտք չէ ըլլայ մէկը որ իր միտքը կեդրոնացած է անձնական հաճոյքներ, զուարճանքներ կամ զբօսանքներ հետապնդելու վրայ։ Երբ Պէթէլի ծառայութիւնը նկատի կ’առնէ, ան պէտք է արդէն մէկդի դրած ըլլայ այսպիսի պատանեկան յատկանիշներ։ Ա. Կորնթացիս 13։11–ի Պօղոսի խօսքերը լաւ կերպով կը կիրարկուին. «Երբ տղայ էի, տղայի պէս կը խօսէի, տղայի պէս կը խորհէի, տղայի պէս համարում ունէի. բայց երբ այր եղայ, տղայութեան բաները մէկդի ձգեցի»։

⁹ 19–էն 35 տարեկանի միջե՞ւ էք։ Ֆիզիքական եւ զգացական լաւ առողջութիւն կը վայելէ՞ք։ Կրնա՞ք լաւ կերպով Անգլերէն կարդալ, գրել եւ խօսիլ։ Հոգեւո՞ր անձ մըն էք որ Եհովայի եւ իր կազմակերպութեան հանդէպ խոր սէր ունի։ Եթէ Պէթէլ հրաւիրուիք, այդ ծառայութեան մէջ առնուազն մէկ տարի հաւատարմօրէն պիտի մնա՞ք, ձեզի տրուած որեւէ գործ աշխատելով։ Եթէ այս հարցումներուն կրնաք այո պատասխանել, լաւ է որ նկատի առնէք Պէթէլի ծառայութեան անզուգական առանձնաշնորհումը։ Օրհնութիւնները առատ են։

¹⁰ Պէթէլի Ծառայութեան Օրհնութիւնները. Դիտարան Յունիս 15, 1994–ի Անգլերէն թիւին մէջ, «‘Աստուծոյ Տուն’ը Գնահատել» յօդուածը նշեց. «Երբ համաժողովի մը ներկայ կ’ըլլաք, խոր գոհունակութիւն մը կը զգա՞ք մինչ Եհովայի ուրախ երկրպագուներով շրջապատուած էք։ Երեւակայեցէք որ Պէթէլի աշխատաւոր մը ամէն օր եղբայրներու խումբի մը մէջ Եհովայի ծառայելու առանձնաշնորհումը ունի։ (Սաղմ. 26։12) Ասիկա հոգեւոր աճման ի՜նչ ընտիր հեռանկարներ կը ներկայացնէ։ Եղբայր մը նշեց թէ իր անձնաւորութիւնը կաղապարելու համար աւելին սորվեցաւ մէկ տարուայ ընթացքին Պէթէլի մէջ քան երեք տարուայ մէջ այլուր։ Ինչո՞ւ։ Որովհետեւ ան ուրիշ ոչ մէկ տեղ առիթը ունեցաւ շատ մը հասուն Քրիստոնեաներու հաւատքը նկատելու եւ ընդօրինակելու»։ (Առ. 13։20) Արդարեւ, ասիկա Պէթէլի ծառայութեան անզուգական օրհնութիւններէն մէկն է։

¹¹ Պրուքլինի Պէթէլին մէջ, կամաւորները սերտ ընկերակցութիւն կը վայելեն Կառավարիչ Մարմինի անդամներուն եւ ուրիշ օծեալներու հետ, ինչպէս նաեւ՝ ուրիշ ոչխարներու դասակարգէն եղող երկար ժամանակէ ի վեր հաւատարիմ եղբայրներու հետ։ Ինչ որ ալ ըլլայ մէկու մը նշանակուած գործը, օրհնութիւն մըն է միութեամբ աշխատիլը այսպիսի հաւատարիմ ընկերակիցներու հետ։ Ահաւասիկ մի քանի մեկնաբանութիւններ Պրուքլինի Պէթէլի ընտանիքին անդամներէն, որոնք կը ցոլացնեն այս ծառայութեան անգին առանձնաշնորհումին մէջ բաժին ունեցողներուն զգացումները.

◼ 2 տարի Պէթէլի ծառայութիւն ունեցող եղբայր մը, որ տարիներու ընթացքին աշխատած է զանազան նշանակումներու մէջ, մեկնաբանեց Պէթէլի մէջ գոյութիւն ունեցած հոգիին մասին. «Բոլորս մէկ ընտանիք ենք. բոլորս եղբայրներ ենք։ Միասին կ’աշխատինք։ Բոլորս նշանակումներ ունինք։ Սքանչելի է տեսնել եղբայրները ծանր կ’աշխատին. կրնաք անոնց թափած ջանքը տեսնել։ Մաքրութիւն ընող եղբայրներ ունինք։ Երբ վայրը մաքուր կը պահէք, ընտանիքը առողջ կը պահէք։ Երբ ընտանիքը առողջ կը պահէք, ընտանիքը արդիւնաբեր կ’ըլլայ։ Ասիկա անհրաժեշտ է։ Կարեւոր է անհատներ ունենալ գրասենեակին մէջ։ Բոլորս միասին յառաջ կը բերենք արդիւնքը—Թագաւորութեան վկայութիւնը համայն աշխարհի մէջ։ Ասիկա աշխարհին մէջ լաւագոյն տեղն է Եհովայի ծառայութիւնը ասպարէզ մը ընելու։ Եթէ կ’ուզէք լիաժամ ծառայութեան մէջ ըլլալ, կրնաք ասիկա լաւագոյն կերպով ընել ճիշդ հոս։ Ամէն բան ձեզի մատչելի է։ Հոս յաւելեալ բաներ կը վայելենք։ Կրնաք կազմակերպութիւնը տեսնել, որովհետեւ երկրագունդին չորս կողմէն կը լսէք»։

◼ 75 տարեկան օծեալ եղբայր մը, որուն առաջին գործի նշանակումը կազմատան մէջ էր 48 տարիներ առաջ, դիտել տուաւ. «Գեղեցիկ փորձառութիւն մըն է ապրիլ Եհովայի նուիրուած, մկրտուած ծառաներուն հետ։ Երբ կը տեսնեմ Պէթէլ եկող երիտասարդ մը, սրտանց շնորհակալութիւն կը յայտնեմ Եհովային, որովհետեւ գիտեմ թէ այս անհատը ուրախ կեանք մը պիտի վայելէ հոս Պէթէլի մէջ»։ Ակնարկելով Պէթէլի նկատմամբ իր գնահատած բաներուն, ան աւելցուց. «Անոր անհատները կը սիրեմ։ Կը խորհիմ որ սքանչելի են։ Բան մը կայ այն եղբայրներուն նկատմամբ որոնք Պէթէլի մէջ երկար տարիներ եղած են, զոր չէք կրնար գտնել որեւէ ուրիշ տեղ համայն աշխարհի մէջ։ Հոն ջերմութիւն, հասկացողութիւն եւ միութիւն կան, որոնք ըմբռնումէ վեր են»։

◼ Ուրիշ եղբայր մը որ աւելի քան 62 տարիներ Պէթէլի ծառայութեան մէջ եղած է, ձեռք ձգուած յաւելեալ օգուտներու մասին մեկնաբանեց. «Պէթէլ գալը ձեզ կարող կը դարձնէ որ մասնայատուկ դաստիարակութիւն ստանաք հրատարակելու մարզին մէջ . . . եւ ամէն բանէ առաջ, Աստուածաշունչի դաստիարակութիւն մը որ ձեզ կը զինէ Եհովա Աստուծոյ պատշաճ ներկայացուցիչ մը ըլլալու, աշխարհի մէջ ո՛ւր որ ալ ղրկուիք»։

◼ Կառավարիչ Մարմինի անդամ մը, որ հիմա 92 տարեկան է, Պէթէլի մէջ 58 տարիներէ ի վեր կը ծառայէ։ Ան Պէթէլի ծառայութիւնը ինչպէ՞ս կը նկատէ։ «Պէթէլի ընտանիքը՝ հոս եւ ամբողջ աշխարհի մէջ՝ նուիրուած անհատներու սքանչելի կարգադրութիւն մըն է»։

◼ Կառավարիչ Մարմինի անդամ մը, 98 տարեկանին իր նշանակումին մէջ հաւատարիմ մեռնելէ մի քանի ամիս առաջ, հետեւեալ կերպով ինքզինք արտայայտեց. «Կը սիրեմ Պէթէլի մէջ ծառայել։ Անիկա լաւագոյն տեղն է արեւին տակ»։

◼ Պէթէլի ծառայութեան հանդէպ երիտասարդի մը տեսակէտը ի՞նչ է։ Երիտասարդ եղբայր մը վերջերս գրեց. «Քանի որ, ինչպէս Յիսուս ըսաւ, ‘աւելի երանելի է տալը’, Պէթէլը ամենէն ուրախ տեղն է ուր եղած եմ»։ Ան ըմբռնած է Պէթէլի հոգին. տալը։

◼ Եղբայր մը որ 51 տարի լիաժամ ծառայութեան մէջ է, գեղեցիկ կերպով ամփոփեց, ըսելով. «Պէթէլի ծառայութիւնը իրապէս անզուգական է։ Անիկա կենսական մաս մը կը կազմէ Եհովայի նպատակները իրագործելուն մէջ հոս երկրի վրայ։ Ուստի ոեւէ անհատ որ Պէթէլի մէջ ծառայելու առանձնաշնորհումը ունի, պէտք է զայն մեծապէս արժեւորէ։ Իրապէս, Պէթէլը մեզ կարող կը դարձնէ որ աստուածպաշտութեան կենցաղը լման կերպով ցոլացնենք»։

¹² Ամէնօրեայ Զբաղումը. Պէթէլի ընտանիքի անդամի մը ամէնօրեայ զբաղումը զինք ամբողջովին միջամուխ կ’ընէ Թագաւորութեան գործունէութեան կեանքի մը։ Ամէն առտու ժամը 7։00–ին, Երկուշաբթիէն մինչեւ Շաբաթ, առաւօտեան պաշտամունքը կը սկսի մեր ճաշասրահներուն մէջ։ Օրուայ համարին մասին մեկնաբանութիւններ կը ներկայացուին ընտանիքի անդամներուն կողմէ, ետքը ամփոփում մը՝ Կառավարիչ Մարմինի անդամի մը կողմէ կամ երկար տարիներ լիաժամ ծառայութեան մէջ եղող ուրիշ եղբօր մը կողմէ, որու կը յաջորդէ առաւօտեան աղօթքը։ Այս յայտագիրը հոգեւորապէս կը զօրացնէ ընտանիքը օրուայ գործունէութեան համար։ Պէթէլի ընտանիքի անդամները ձեզի պիտի ըսեն թէ անիկա օրուան աչքառու մէկ դէպքն է։ Սննդարար նախաճաշէ մը ետք, Պէթէլի ընտանիքի անդամները անձկագին կ’երթան իրենց գործի զանազան նշանակումներուն։ Երկուշաբթիէն մինչեւ Ուրբաթ, աշխատանքի օրը կը սկսի առաւօտուն ժամը 8։00–ին եւ կը տեւէ մինչեւ կէսօրէ ետք ժամը 5։00, տրամադրելով մէկ ժամ կէսօրուայ ճաշին։ Նաեւ աշխատանք յայտագրուած է Շաբաթ օր, կէսօրէ առաջ ժամը 8։00–էն մինչեւ 11։55։ Երեկոները, Շաբաթ կէսօրէ ետք եւ Կիրակի օրերը, Պէթէլականները կ’երթան իրենց ժողովքային հանդիպումներուն, տունէ–տուն ծառայութեան կը մասնակցին կամ Աստուածաշունչի ուսումնասիրութիւններ կը վարեն, կամ անձնական պատասխանատուութիւններու հոգ կը տանին։ Անոնք կրնան Պէթէլի գրադարանի դիւրութիւնները գործածել անձնական ուսումնասիրութեան կամ ժողովներուն պատրաստուելու համար։ Այո, պէտք եղած հանգստութեան ժամանակ կայ։ (Մար. 6։31, 34) Այս հակիրճ նկարագրութենէն, դիւրաւ կարելի է տեսնել թէ Պէթէլի ծառայութիւնը թոյլ կու տայ որ անհատ մը իւրաքանչիւր օր իր ժամանակին մեծամասնութիւնը յատկացնէ սրբազան ծառայութեան, ազատ ըլլալով այս հին իրերու դրութեան զբաղումներէն։

¹³ Ժողովքային Գործունէութիւններ. Պրուքլինի Պէթէլի ընտանիքին անդամները նշանակուած են աւելի քան 350 ժողովքներու, Նիւ Եորք Քաղաքի շրջանին մէջ։ Անոնք կ’արժեւորեն տեղական ժողովքներուն դերը իրենց հոգեւորականութիւնը պահպանելու մէջ։ Ուստի, անոնք գործունեայ են իրենց ժողովքներուն հետ, յաճախելով հինգ ժողովներուն եւ իրենց եղբայրներուն հետ կանոնաւորապէս մասնակցելով դաշտի ծառայութեան։ Ժողովքային հանդիպումներէն զատ, Պէթէլի ընտանիքը իր Դիտարանի Ուսումնասիրութիւնը ունի Երկուշաբթի երեկոյեան. երէցներ եւ օգնական ծառաներ կը նշանակուին մեկնաբանութիւններ ընելու, բոլորին օգտին համար։ Քանի որ Պէթէլի յայտագիրը հոգեւոր բաներ կը շեշտէ, արդիւնքը կ’ըլլայ զուարթ, ուրախ կեանք մը Եհովայի ծառայութեան մէջ։—Ա. Կորն. 15։58

¹⁴ Նախապատրաստուիլ Պէթէլի Ծառայութեան Համար. Երիտասարդներ յաճախ կը հարցնեն թէ ի՛նչ կրնան ընել որպէսզի պատրաստուին Պէթէլի ծառայութեան համար։ Կառավարիչ Մարմինի անդամ մը որ Անձնակազմի Յանձնախումբին մէջ կը ծառայէ, ըսաւ. «Երբ Պէթէլ կու գաք, ծառայելու նպատակով եկէք։ Որքան աւելի կը ծառայէք, այնքան աւելի մեծ կ’ըլլայ ձեր ուրախութիւնը։ Սորվեցէք տալ, ո՛չ թէ առնել։ Համեստ, խոնարհ եղէք։ Իսկ հոգիին պտուղները—հոն է ուր ճշմարիտ Քրիստոնէութիւնը կը կայանայ»։ Այո, ձեր հոգեւորականութիւնը զարգացնելը եւ Եհովայի հետ սերտ յարաբերութիւնը բանալիներ են Պէթէլի մէջ յաջողելու։ Այս պատճառով է որ յաճախ ռահվիրաներ կ’ընտրուին երբ Պէթէլի համար նոր կամաւորներ կ’որոշուին։ Երբ անձ մը ինքզինք կրթած է որոշ ժամանակի մը ընթացքին որպէսզի ամէն ամիս 90 ժամ յատկացնէ ուրիշներու քարոզելու եւ ուսուցանելու եւ տալու, ինչպէս նաեւ իր ապրուստը ապահովելու համար անհրաժեշտ գործ յայտագրած է, ան Պէթէլի ծառայութեան եւ անոր կարգապահ ապրելակերպին համար լաւ հոգեւոր հիմ մը դրած կ’ըլլայ։ Սակայն, հաճեցէք նկատել որ Պէթէլի ծառայութիւնը միայն ռահվիրաներուն համար չէ։ Ոեւէ անհատ որ հիմնական պահանջներուն գոհացում կու տայ, կրնայ դիմումնագիր ներկայացնել։

¹⁵ Ասկէ զատ, լաւ է որ երիտասարդներ սորվին ինչպէ՛ս իրենց ձեռքերով աշխատիլ։ Ձեռային աշխատութիւնը հաճութեամբ չի դիտուիր այս հին իրերու դրութեան մէջ։ Անձնասիրութիւնը կը մղէ շատ մը մարդիկ որ փափաքին այնպիսի գործ մը որ քիչ ջանք կը պահանջէ կամ համբաւի արտաքին երեւոյթ մը կու տայ։ Բայց զանազան գործիքներ գործածել գիտնալը շատ գործնական եւ օգտակար է։ (Առ. 22։29) Յաճախ, երիտասարդներ կրնան ձեռային ճարտարութիւններ սորվիլ իրենց ծնողներէն կամ օգնելով այն փորձառու չափահասներուն որոնք Թագաւորութեան Սրահին առնչութեամբ զանազան գործեր կը կատարեն կամ տարեցներու տուներուն պէտք եղած պահպանութիւնը ընելով։

¹⁶ Երբեմն երիտասարդներ կը հարցնեն. «Աշխարհային յաւելեալ մարզում պէ՞տք է ստանանք որպէսզի Պէթէլի ծառայութեան որակելի ըլլանք»։ Աշխարհային մարզումը ինքնին անձը որակելի չ’ըներ Պէթէլի ծառայութեան։ Հոգեւոր յատկութիւնները մեծագոյն կարեւորութիւնը ունին եւ բոլոր հրաւիրուածներէն պահանջուած են։ Կը քաջալերենք ծնողները եւ դպրոց գացող իրենց զաւակները որ ուշադրութեամբ նկատի առնեն աշխարհային ուսման նկատմամբ այն հաւասարակշռուած տեսակէտը որ ներկայացուած է Դիտարան Փետրուար 1, 1993–ի թիւին մէջ, էջ 15–19։ Աշխարհային ուսման նկատմամբ որոշում առնելը անձնական հարց մըն է։ Անձ մը ի՛նչ որ ալ որոշէ, պէտք է վստահ ըլլայ որ կրնայ իր հոգեւոր յառաջդիմութիւնը պահպանել, շարունակելով կեդրոնանալ Եհովայի ժողովուրդին գլխաւոր գործին վրայ. ճշմարտութեան մասին վկայել։

¹⁷ Առանց նկատի առնելու թէ անհատը ի՛նչ տեսակ աշխարհային մարզում կը ստանայ, մեծապէս արժէքաւոր է սորվիլ ինչպէ՛ս մտածել։ Աստուածաշունչը կը յանձնարարէ մտածելու կարողութիւնը եւ գործնական իմաստութիւնը։ (Առ. 1։4. 3։21) Ինչպէ՛ս մտածել եւ տեղեկութիւններ յիշել սորվիլը ձեզ կարող կը դարձնէ որ գիտութիւն եւ հմտութիւններ ձեռք ձգէք, որոնք օգտակար պիտի ըլլան թէ՛ ձեզի եւ թէ Եհովայի երկրածաւալ կազմակերպութեան։ Վերջապէս, ի՛նչ որ ալ ըլլան անհատի մը ունեցած հմտութիւնները, շատ կարեւոր է կարենալ ուրիշներու հետ համագործակցիլ։ Պէթէլի կամաւորները պէտք է սերտօրէն միասին աշխատին որպէս խումբ մը, գործը ամբողջացնելու համար։ Ուստի, անկախ կամ մրցակցութեան հոգի մը պէտք է փոխարինուի համագործակցական ու սիրալիր մտավիճակով մը եւ աստուածպետական ուղղութեան հպատակելու կամեցողութիւնով մը։—Բաղդատել Եփեսացիս 4։16։

¹⁸ Երիտասարդները Եհովայի կազմակերպութեան մէջ հոյակապ առիթ մը ունին որ վերոյիշեալ կարողութիւնները զարգացնեն։ Ետքը, եթէ հրաւիրուին Պէթէլի մէջ ծառայելու, անոնք ի վիճակի պիտի ըլլան Եհովայի կազմակերպութեան միջոցաւ յաւելեալ պատասխանատուութիւններու համար մարզուելու։ Ո՛վ Քրիստոնեայ ծնողներ ու երէցներ, ձեզ կը յորդորենք որ շարունակէք այս հարցը պահել երիտասարդներուն դիմաց։ Շատ մը ծնողներ կանոնաւորաբար իրենց զաւակները կը բերեն որպէսզի Պէթէլի մէջ շրջագայութիւն ընեն, այսպիսով անոնց կը ծանօթացնեն ինչ որ հոս տեղի կ’ունենայ։ Ասիկա պատճառ եղած է որ շատեր Պէթէլ գան իրենց ուսումը վերջացնելէ ետք։

¹⁹ Փորձառուներ. Երբեմն առիթ կը տրուի եղբօր մը կամ քրոջ մը որ 35 տարեկանէն քիչ մը վեր է եւ կը վայելէ այն փորձառութիւնը եւ հմտութիւնները որոնց կարիքը Պէթէլը ունի։ Ներկայիս Ընկերութեան կատարած գործին մեծամասնութիւնը կը պահանջէ փորձառուներ, ծառայելու համար զօրաւոր, կարող երիտասարդներու հետ որոնք կրնան մարզուիլ, «Վարպետն ու աշկերտը մէկտեղ»։—Ա. Մնաց. 25։8

²⁰ Ներկայիս գործին մէկ մասը որ երթալով կ’աւելնայ, կը պահանջէ այն անհատները որոնք փորձառութիւն ունին ելեկտրոնաբանութեան կամ համակարգիչի յայտագիր պատրաստելու առնչութեամբ։ Ընկերութիւնը բառացիօրէն ունի բազմաթիւ լուսապատճէնի մեքենաներ, լէյզըրով տպագրիչներ եւ անհատական համակարգիչներ, այս բոլորը պահպանութիւն կը պահանջեն։ Նաեւ կարիք կայ օրինական եւ բժշկական մարզերուն մէջ. փաստաբաններու, բժիշկներու, բնաբոյժներու եւ արտօնագրուած հիւանդապահներու։ Կարելի է որ գործածուին անոնք որոնք ատակ են շինարարական զանազան արհեստներու մէջ, ինչպէս՝ երկրաչափութիւն, կապարագործութիւն, ելեկտրականութիւն եւ HVAC (ջերմութիւն, օդափոխութիւն եւ պայմանադրեալ օդ)։ Հասուն եղբայրներ որոնք հաշուապահութեան խոր փորձառութիւն ունին, յատկապէս վկայեալները, կրնան օգտակար ըլլալ։ Ծախքերը նուազեցնելու համար, Ընկերութիւնը ունի իր բեռնակառքերը որոնք կը գործածուին գրականութիւնները փոխադրելու համար։ Հետեւաբար, կարիք կայ փորձառու վարորդներու եւ մեքենագործներու։

²¹ Մենք մեծապէս կարիք ունինք նուիրուած ամուրի եղբայրներու եւ մասնաւոր հմտութիւններ ունեցողներու, որոնցմէ ոմանք կրնան ամուսնացած ըլլալ։ Կրնաք Պէթէլի դիմումնագիրներ ձեռք ձգել ձեր շրջանային տեսուչէն կամ նահանգային համաժողովին՝ Պէթէլի ծառայութեամբ հետաքրքրուողներու համար եղած ժողովին մէջ, կամ կրնաք գրել Անձնակազմի Յանձնախումբին (Personnel Committee), 25 Columbia Heights, Brooklyn, NY 11201-2483։ Եթէ ամուսնացած էք, յիշեցէք որ ձեր կողակիցը նաեւ պէտք է հոգեւորապէս, զգացականօրէն եւ ֆիզիքապէս որակելի ըլլայ Պէթէլի ծառայութեան։ Եթէ վերոյիշեալ մարզերէն մէկուն նկատմամբ մարզում եւ փորձառութիւն ունիք, հաճեցէք մանրամասն ամփոփում մը գրել եւ զայն ձեր Պէթէլի դիմումնագիրին կցել։

²² Կրնա՞ք Ստիպողական Կոչի մը Ընդառաջել. Պէթէլի կամաւորներու ստիպողական կարիք մը կայ։ Եթէ Պէթէլի ծառայութեան պահանջներուն գոհացում կու տաք, մեծապէս կը յորդորենք ձեզ որ Պէթէլի դիմումնագիր մը յանձնէք որպէս ընդառաջում այս ստիպողական կոչին։ Մի վհատիք եթէ անմիջապէս չհրաւիրուիք։ Ձեր դիմումնագիրը կրնաք տարուէ տարի վերանորոգել։ Ասիկա մեզի ընթացիկ տեղեկութիւն կը հայթայթէ ձեր մատչելի ըլլալուն մասին։

²³ Եսայի մարգարէին ներկայութեան, Եհովա հարցուց. «Ո՞վ ղրկեմ եւ մեզի համար ո՞վ պիտի երթայ»։ Առանց վարանելու Եսայի պատասխան տուաւ. «Ահաւասիկ ես. զի՛ս ղրկէ»։ Այսպիսով, Եսայի ձեռնարկեց աչքառու ասպարէզ մը որպէս Աստուծոյ մարգարէն։ Կրնա՞ք ըսել. «Ահաւասիկ ես. զի՛ս ղրկէ»։ Շատ օրհնութիւններ ձեզի կը սպասեն եթէ հրաւիրուիք «Աստուծոյ Տան»՝ Պէթէլի՝ մէջ ծառայելու։—Եսայ. 6։8