Զաւակներուդ օգնէ ծառայութեան մէջ յառաջդիմելու
1 Քրիստոնեայ ծնողները լուրջ պատասխանատուութիւն կը կրեն որ իրենց զաւակները մատղաշ տարիքէն մարզեն ծառայութեան մէջ։ Ասիկա քանի մը կերպերով կարելի է ընել։ Դեռ կարդալ չսորվող երախաներէն ոմանք կրնան որոշ համար անգիր արտասանել, ունկնդիրներուն վրայ զօրաւոր ազդեցութիւն ձգելով։ Մինչ մանուկները կը մեծնան, կրնան ծառայութեան մէջ յաւելեալ բաներ ընել։ Հետեւեալ թելադրութիւնները կրնան օգտակար ըլլալ որ զաւակներուդ օգնես վկայելու մէջ բաժին բերելու։
2 Բարեւելէ ետք, կրնաս ըսել.
◼ «Տղաս՝ [անունը տուր], կ’ուզէ իմաստալից համար մը ուշադրութեանդ յանձնել»։ Զաւակդ կրնայ ըսել. «Աստուածաշունչի այս համարը ինծի սորվեցուց Աստուծոյ անունը։ [Երախան Սաղմոս 83։18–ը կը կարդայ կամ անգիր կ’արտասանէ։] Այս պարբերաթերթերը կը նշեն թէ Եհովա Աստուած մեզի համար ի՛նչ պիտի ընէ։ Կ’ուզե՞ս զանոնք ունենալ»։ Խօսակցութիւնը կրնաս եզրափակել, բացատրելով թէ համաշխարհային գործը ի՛նչպէս կ’ընթանայ։
3 Կամ՝ կրնաս սա մօտեցումը գործածել.
◼ «Բարեւ։ Աղջիկս [անունը տուր] կը մարզեմ որ դրացիներուն հանդէպ հետաքրքրութիւն ցուցաբերէ։ Ան կ’ուզէ Աստուածաշունչէն համառօտ պատգամ մը տալ քեզի»։ Աղջնակը կրնայ ըսել. «Կը սիրեմ մարդոց օգնել, ցոյց տալով թէ Աստուածաշունչը ապագայի մասին գեղեցիկ յոյս մը կը ներկայացնէ։ [Ան Յայտնութիւն 21։4–ը կը կարդայ կամ անգիր կ’արտասանէ։] Այս պարբերաթերթերը կը բացատրեն թէ Աստուծոյ Թագաւորութիւնը մեզի համար ի՛նչ բաներ պիտի ընէ։ Կը խորհիմ թէ զանոնք հաճոյքով պիտի կարդաս»։
4 Պարզ ներկայացում մը յարատեւ գործածելը երախաներուն թոյլ կու տայ որ Թագաւորութեան պատգամը ներկայացնելու իրենց կարողութեան հանդէպ վստահութիւն ձեռք ձգեն։ Փորձի նիստերը, որ յստակօրէն ու բարձրաձայն խօսելու վրայ կը կեդրոնանան, զիրենք պիտի զինեն այլազան պարագաներու ներքեւ խօսելու։ Լաւ նախապատրաստութիւնը եւ անկեղծ գովասանքը, երախաներուն պիտի օգնեն իրենց հաւատքը արտայայտելու։
5 Այսպիսի քաջալերանք ստանալով, բազմաթիւ դեռատիներ չմկրտուած հրատարակիչներ եղած են։ Ի՜նչ ուրախութիւն է տեսնել որ մեր զաւակները քրիստոնէական ծառայութեան մէջ կը յառաջդիմեն։—Սաղմ. 148։12, 13