Ո՛վ Ծնողներ, Ձեր Զաւակները Մարզեցէք Որ Քարոզեն

¹ Մեր ժողովքները օրհնուած են բազմաթիւ մանուկներով, որոնք Աստուծոյ ծառայելու անկեղծ փափաք ունին։ (Ժող. 12։1) Անոնք պարփակուած են անոնց մէջ, որոնք Եհովայի կողմէ հրաւիրուած են, որ զինք փառաբանեն։ (Սաղմ. 148։12-14) Ուստի, ծնողներ, որպէս իրենց զաւակներուն տուած առօրեայ մարզումին մէկ մասը, պէտք է բացատրեն թէ անոնք Թագաւորութեան քարոզչութեան մէջ իրենց հաւատքը ուրիշներու հետ ինչպէ՛ս կրնան բաժնել։—Բ. Օր. 6։6, 7

² Զաւակները Յառաջդիմական Քայլերով Մարզեցէք. Շատ մատղաշ տարիքէն, մանուկները արժանի են մարզուելու, ծառայութեան մէջ իրենց ծնողներուն ընկերակցելով։ Ծառայութեան ելլելէ առաջ, ձեր զաւակները պատրաստեցէք որ իմաստալից կերպով իրենց մասնակցութիւնը բերեն։ Նախապէս որոշեցէք թէ իրենցմէ ի՛նչ կ’ակնկալէք որ ընեն դրան առջեւ։ Փոքր երախաներ կրնան թերթիկներ ու յայտաթերթիկներ բաշխել եւ մարդիկ Թագաւորութեան Սրահ հրաւիրել։ Լաւ կարդացող մանուկներ կրնան հրաւիրուիլ որ դրան առջեւ Աստուածաշունչէն համարներ կարդան։ Անոնք կրնան պարբերաթերթեր մատուցանել, հակիրճ ներկայացում մը գործածելով։ Անոնք մինչ փորձառութիւն ձեռք կը ձգեն, զիրենք մարզեցէք որ Աստուածաշունչը գործածեն իրենց ներկայացման մէջ։ Բազմաթիւ պատանի հրատարակիչներ կանոնաւորաբար պարբերաթերթերով վերայցելութիւններ կ’ընեն։ Նախընտրելի է որ երախայ մը չափահասի հետ աշխատի, քան թէ ուրիշ երախայի մը հետ։ Չափահասը կրնայ տանտիրոջ բացատրել, որ երախային մարզում կը տրուի ծառայութեան մէջ։

³ Աղջնակ մը երէցներուն օգնութիւնը խնդրեց, որպէսզի Թագաւորութեան հրատարակիչ մը ըլլար։ Թէեւ ան միայն հինգ տարեկան էր եւ կարդալ չէր գիտեր, սակայն Թագաւորութեան պատգամը ազդու կերպով կրնար ներկայացնել դռներուն առջեւ։ Ան համարներուն տեղերը գոց կը սորվէր, կը բանար եւ տանտիրոջմէն կը խնդրէր որ կարդար զանոնք, ապա բացատրութիւնը կու տար։

⁴ Ծնողական օրինակով զաւակները նաեւ պէտք է սորվին՝ կանոնաւորաբար ծառայութեան մասնակցելու համար լաւ յայտագիր ունենալու արժէքը։ Ծնողներ կարիքը ունին ծառայութեան համար շաբաթական հաստատ վարժութիւն մը հիմնելու եւ անոր կառչելու, որպէսզի մանուկները գիտնան թէ շաբթուան ո՛ր մասը միշտ վերապահուած է քարոզչութեան։

⁵ Երբ մանուկները մարզուին իրենց մատղաշ տարիքէն ծառայութիւնը սիրելու եւ անկէ հաճոյք ստանալու, անոնք հետագային պիտի մղուին աւելի մեծ առանձնաշնորհումներ ցանկալու, թերեւս մէջը ըլլալով ռահվիրայական ծառայութիւնը։ (Ա. Կորն. 15։58) Բոլորս ալ մեր մէջ գտնուող մանուկները քաջալերենք, որ լաւ կերպով յառաջդիմեն որպէս Եհովան փառաբանողներ։