Ո՛վ Ծնողներ՝ Ձեր Զաւակները Մարզեցէք Իրենց Մանկութենէն

¹ «Կրթէ՛ մանուկը իր ճամբան սկսած ատենը, որպէս զի իր ծերութեան ատենն ալ անկէ չխոտորի»։ (Առ. 22։6) Ո՛վ ծնողներ, եթէ չէք ուզեր որ ձեր զաւակները ճշմարտութեան ճամբէն ‘խոտորին’, ե՞րբ պէտք է սկսիք մարզել զանոնք։ Վաղ հասակէն։

² Երբ Պօղոս ըսաւ թէ Տիմոթէոսի հոգեւոր դաստիարակութիւնը ‘մանկութենէն ի վեր’ էր, բացայայտօրէն ըսել կ’ուզէր, որ երբ ան նորածին էր։ (Բ. Տիմ. 3։14, 15) Որպէս արդիւնք, Տիմոթէոս մեծցաւ եւ հոյակապ հոգեւոր տղամարդ մը դարձաւ։ (Փիլ. 2։19-22) Ո՛վ ծնողներ, դուք ալ պէտք է ‘մանկութենէն’ սկսիք ձեր զաւակներուն տալ այն մարզումը, որուն կարիքը ունին ‘Տէրոջը առջեւ մեծնալու’ համար։—Ա. Թագ. 2։21

³ Աճելու Համար Հարկ Եղած Ջուրը Տուէք. Ճիշդ ինչպէս որ նորատունկ ծառերը շարունակ ջուրի կարիքը ունին, որպէսզի աճելով վեհաշուք ծառեր ըլլան, նոյնպէս ալ ամէն տարիքի երախաները Աստուածաշունչի ճշմարտութեան ջուրով ոռոգուելու կարիքը ունին, որպէսզի աճելով Աստուծոյ հասուն ծառաները ըլլան։ Աստուածաշունչի կանոնաւոր ընտանեկան ուսումնասիրութիւնը գլխաւոր կերպն է երախաներուն ճշմարտութիւնը սորվեցնելու եւ անոնց օգնելու որ մանկութենէն Եհովայի հետ մտերմութիւն մշակեն։ Սակայն, ո՛վ ծնողներ, նկատի առէք իւրաքանչիւր զաւկի կեդրոնանալու կարողութիւնը։ Փոքր երախաներուն համար, հաւանաբար ուսուցումի յաճախակի ու հակիրճ նիստերը աւելի ազդու պիտի ըլլան, քան՝ երկար նիստերը։—Բ. Օր. 11։18, 19

⁴ Բնաւ մի՛ ստորագնահատէք ձեր զաւակներուն սորվելու հնարաւորութիւնը։ Աստուածաշունչի անձնաւորութիւններուն մասին պատմութիւններ պատմեցէք անոնց։ Թոյլ տուէք որ անոնք Աստուածաշունչի տեսարաններ գծեն կամ Աստուածաշունչի դէպքեր խաղարկեն։ Օգտագործեցէք մեր պատկերիզներն ու ձայներիզները, ի ներառեալ Աստուածաշունչի թատերախաղերը։ Ընտանեկան ուսումնասիրութիւնը ձեր զաւակներուն տարիքին եւ սորվելու կարողութեան յարմարցուցէք։ Սկզբնական մարզումը նախնական պիտի ըլլայ, փոքր քանակով. սակայն, մինչ երախան կը մեծնայ, իր մարզումը պէտք է աւելի ընդարձակ եւ յառաջդիմական ըլլայ։ Աստուածաշունչէն ուսուցում տալը կենսալից եւ այլազան դարձուցէք։ Կ’ուզէք որ ձեր զաւակները Խօսքին հանդէպ «փափաք» զարգացնեն, հետեւաբար, ուսումնասիրութիւնը կարելի եղածին չափ հետաքրքրական դարձուցէք։—Ա. Պետ. 2։2

⁵ Զանոնք Ժողովքին Գործունէութեան Միջամուխ Դարձուցէք. Ձեր զաւակներուն դիմաց յառաջդիմական նպատակակէտեր դրէք, որպէսզի ժողովքին գործունէութեան լիովին միջամուխ ըլլան։ Անոնց առաջին նպատակակէտը ի՞նչ կրնայ ըլլալ։ Երկու երախայ ունեցող ծնողք մը ըսաւ. «Երկուքն ալ սկսան Թագաւորութեան Սրահին մէջ լուռ նստելու մարզում ստանալ»։ Հետագային, երախաներուն օգնեցէք որ ժողովներուն մէջ իրենց բառերով պատասխաններ տան, եւ նպատակակէտ դնեն Աստուածպետական Ծառայութեան Դպրոցին մէջ ելոյթ ունենալ։ Դաշտի ծառայութեան մէջ, իրագործուելիք լաւ նպատակակէտեր կրնան ըլլալ՝ դրան առջեւ թերթիկ մը ներկայացնել, համար մը կարդալ, պարբերաթերթի ներկայացում մը ընել, եւ տանտէրները իմաստալից խօսակցութեանց միջամուխ դարձնել։

⁶ Խանդավառ Օրինակ մը Հանդիսացէք. Ձեր զաւակները ամէն օր կը լսե՞ն որ Եհովայի մասին կը խօսիք ու անոր կ’աղօթէք։ Կը տեսնե՞ն որ իր Խօսքը կ’ուսումնասիրէք, ժողովներու ներկայ կը գտնուիք, դաշտի ծառայութեան կը մասնակցիք, եւ Աստուծոյ կամքը կատարելու մէջ ուրախութիւն կը գտնէք։ (Սաղմ. 40։8) Կենսական է որ անոնք լսեն եւ տեսնեն ասոնք, ինչպէս նաեւ միասնաբար ընէք այս բաները։ Վեց զաւակներ որպէս հաւատարիմ Վկաներ մեծցուցած կնոջ մը չափահաս աղջիկը իր մօր մասին ըսաւ. «Մեզ ամենէն շատ տպաւորողը մօրս օրինակն էր, որ խօսքերէն բարձր կը հնչէր»։ Չորս զաւակ ունեցող ծնող մը ըսաւ. «‘Առաջ Եհովան կու գայ’ խօսքը հասարակ նախադասութիւն մը չէր, հապա մեր ապրելակե՛րպն էր»։

⁷ Ո՛վ ծնողներ, ձեր զաւակներուն մարզումը կանուխ սկսեցէք, Աստուծոյ Խօսքէն ճշմարտութիւնը սորվեցնելով, յառաջդիմական նպատակակէտեր դնելով, եւ կարելի եղած լաւագոյն օրինակը հանդիսանալով։ Ուրախ պիտի ըլլաք որ այս բաները ըրիք։