Զաւակներուդ սորվեցուր Եհովան փառաբանել
1. Երախաներ կրնա՞ն Եհովան փառաբանել։
1 Սաղմոս 148։12, 13–ը տղաներն ու աղջիկները կը քաջալերէ որ «Տէրոջը անունը օրհնեն»։ Սուրբ Գրութիւնները բազմաթիւ օրինակներ կը բովանդակեն երախաներու մասին որոնք ասիկա ըրին։ Օրինակ, «Սամուէլ մանուկը . . . Տէրոջը առջեւ ծառայութիւն կ’ընէր»։ (Ա. Թագ. 2։18) «Պզտիկ աղջիկ մը»ն էր որ Նէեմանի կնոջ ըսաւ թէ Իսրայէլի մէջ Եհովայի մարգարէն կրնար Նէեմանի բորոտութիւնը բուժել։ (Դ. Թագ. 5։1-3) Երբ Յիսուս տաճար մտաւ եւ հրաշալի գործեր կատարեց, «տղաք»ն էին որ աղաղակեցին. «Ովսա՛ննա, Որդի Դաւթի»։ (Մատթ. 21։15) Ծնողներ ի՞նչպէս կրնան իրենց զաւակներուն սորվեցնել որ Եհովան փառաբանեն։
2. Ինչո՞ւ կարեւոր է որ ծնողներ իրենց զաւակներուն լաւ օրինակ հանդիսանան։
2 Օրինակ հանդիսանալ. Ճշմարտութիւնը իրենց զաւակներուն սրտերուն մէջ քանդակելէ առաջ, Իսրայելացի հայրերուն ուղղութիւն տրուած էր որ նա՛խ Եհովան սիրեն եւ անոր պատուիրանները իրենց սրտերուն մէջ ըլլան։ (Բ. Օր. 6։5-9) Եթէ ծառայութեան մասին դրականօրէն խօսիս եւ զայն շաբաթական յայտագրիդ մէկ մասը ընես, զաւակներդ հակում պիտի ունենան ծառայութիւնը նոյնքան կարեւոր ու գոհացուցիչ նկատելու։
3. Քոյր մը ի՞նչպէս իր ծնողքին օրինակէն օգտուեցաւ։
3 Քոյր մը կաթոգին կը մտաբերէ. «Մինչ կը մեծնայի, մեր ընտանեկան սովորամոլութիւնը կը պարփակէր ամէն շաբաթավերջին դաշտի ծառայութեան մասնակցիլ։ Կը նշմարէի թէ ծնողքս իրապէս հաճոյք կ’առնէին քարոզչութենէն։ Մեր մատղաշ տարիքէն ծառայութիւնը հաճելի բան մը կը նկատէինք»։ Այս քոյրը եօթը տարեկանին չմկրտուած հրատարակիչ եղաւ եւ այժմ 33 տարիէ ի վեր լիաժամ ծառայութեան մէջ է։
4. Երախաները յառաջդիմական կերպով մարզելը ի՞նչ կը նշանակէ։
4 Յառաջդիմական մարզում. Ծառայութեանդ մէջ զաւակներդ ալ բաժին թող բերեն։ Թերեւս անոնք կրնան զանգակը զարնել, տանտիրոջ թերթիկ մը տալ կամ համար մը կարդալ։ Ասիկա անոնց ուրախութիւնը պիտի աւելցնէ եւ անոնց պիտի օգնէ որ Թագաւորութեան պատգամը ներկայացնելու իրենց կարողութեան հանդէպ ինքնավստահ ըլլան։ Մինչ կը մեծնան, ծառայութեան մէջ իրենց մասնակցութիւնը պէտք է աւելցնեն։ Հետեւաբար, անոնց օգնէ որ յառաջդիմական ըլլան եւ հոգեւոր նպատակակէտերու մասին մտածեն։
5. Երախայ մը ի՞նչ բաներու պէտք ունի, որպէս չմկրտուած հրատարակիչ որակեալ ըլլալու համար։
5 Երէցներուն հետ խօսէ՝ անմիջապէս որ զգաս թէ զաւակներդ չմկրտուած հրատարակիչ ըլլալու որակեալ են եւ փափաք կը յայտնեն։ Հրատարակիչ ըլլալը անոնց մտքին մէջ պիտի դրոշմէ թէ անձնապէս պատասխանատու են Եհովան փառաբանելու։ Ի մտի ունեցիր թէ երախայ մը որակեալ ըլլալու համար պէտք չունի գիտնալու ա՛յնքան՝ որքան մկրտուած չափահասները գիտեն։ Զաւակդ Աստուածաշունչի հիմնական ուսուցումները կը հասկնա՞յ։ Ան Աստուածաշունչի բարոյական չափանիշներուն կը կառչի՞։ Կը փափաքի՞ ծառայութեան մասնակցիլ եւ ճանչցուիլ որպէս Եհովայի Վկայ մը։ Եթէ այո՛, այն ատեն երէցները կրնան որոշել որ ան չմկրտուած հրատարակիչ ըլլալու որակեալ է։—Տես՝ Կազմակերպուած՝ Եհովայի կամքը ընելու, էջ 79-82։
6. Ինչո՞ւ կ’արժէ որ ծնողներ իրենց զաւակները մարզեն։
6 Երախաներուն սորվեցնելը որ սրտանց Եհովան փառաբանեն, ջանք կը պահանջէ։ Սակայն ծնողքին մեծագոյն ուրախութիւններէն մէկն է՝ տեսնել որ իրենց զաւակները հոգեւորապէս կը յառաջդիմեն։ Աւելի կարեւորը, Եհովա կը հաճի երբ երախաներ իր հրաշալի գործերուն մասին խօսին։