Անձնական հետաքրքրութիւն ցուցաբերէ՝ գովաբանելով
1 Անկեղծ գովասանքը անհատը կ’ամրապնդէ, գործի կը մղէ եւ կ’ուրախացնէ։ Բազմաթիւ հրատարակիչներ նկատած են թէ դաշտի ծառայութեան մէջ անկեղծօրէն գովաբանելը, յաճախ ճամբան կը հարթէ որ անհատը փափաքի մտիկ ընել։ Ի՞նչպէս կրնանք մարդիկը գովել, մինչ կը ջանանք բարի լուրը անոնց ներկայացնել։
2 Նկատո՛ղ եղիր. Փառաւորեալ Յիսուս Քրիստոս Փոքր Ասիոյ եօթը ժողովքներուն բարի գործերը նկատեց։ (Յայտ. 2։2, 3, 13, 19. 3։8) Նոյնպէս, ծառայութեան մէջ մեր հանդիպած անհատներով անկեղծօրէն հետաքրքրուիլը մեզ պիտի մղէ որ զիրենք գովելու առիթներ փնտռենք։ Օրինակ, լաւ խնամուած պարտէզը, իր զաւակներուն հանդէպ գորով ցուցաբերող ծնողը, կամ տանտիրոջ բարեկամական ժպիտն ու բարեւը, պատեհութիւն կ’ընծայեն որ գովասանք ներկայացնենք։ Այսպիսի պատեհութիւններ իսկոյն կը նկատե՞ս եւ կ’օգտագործե՞ս։
3 Լաւ մտիկ ընող եղիր. Քարոզչութեան ատեն, յարմար հարցումներ ուղղելով հրաւիրէ անհատը որ արտայայտուի։ Զինք պատուէ, իր ըսածին ուշադրութիւն ընծայելով։ (Հռովմ. 12։10) Հաւանաբար պիտի նկատես բան մը, որուն համար կրնաս անկեղծ գովասանք ներկայացնել, ապա կրնաս հասարակաց գետինին վրայ շինել։
4 Խորատեսութիւն գործածէ. Ի՞նչ պէտք է ընենք, եթէ տանտէրը Աստուածաշունչի ճշմարտութեան հետ ներդաշնակ չեղող բան մը ըսէ։ Փոխանակ սխալ գաղափարին շուրջ վիճաբանելու, տանտիրոջ ըսածը գնահատէ, ապա ասոր նման բան մը ըսէ. «Կը նշմարեմ որ այս նիւթը իսկապէս քեզ կը հետաքրքրէ»։ (Կող. 4։6) Նոյնիսկ եթէ ան վիճասէր է, յաճախ կրնաս զինք գովել՝ նիւթով խորապէս հետաքրքրուած ըլլալուն համար։ Այս քաղցր մօտեցումը կրնայ կակուղցնել այն անհատը, որ կը թուի բարի լուրին ընդդիմադիր ըլլալ։—Առ. 25։15
5 Մեր ներկայացուցած գովասանքը արժէք ունենալու համար, անկեղծ պէտք է ըլլայ։ Այսպիսի շինիչ խօսքեր գործածելը Եհովան կը պատուէ եւ կրնայ ուրիշները հրապուրել Թագաւորութեան պատգամին։