Անձնական հետաքրքրութիւն ցուցաբերէ՝ նկատող ըլլալով
1 Եհովա Աստուած ու Քրիստոս Յիսուս մարդոց մասնայատուկ կարիքները զատորոշելու եւ անոնց օգնելու մէջ օրինակելի են։ (Բ. Մնաց. 16։9. Մար. 6։34) Ծառայութեան մէջ մեր հանդիպած անհատներուն հետաքրքրութիւններն ու մտահոգութիւնները բնորոշելով, կրնանք բարի լուրի մեր ներկայացումը յարմարցնել։
2 Մանրամասնութիւններուն ուշադիր եղիր. Յիսուս նկատող էր։ (Մար. 12։41-43. Ղուկ. 19։1-6) Նմանապէս, երբ տան մը դրան կը մօտենանք եւ կը նկատենք կրօնական զարդեր, ինքնաշարժին վրայ լոզունգներ, կամ բակին մէջ խաղալիքներ, կրնանք բարի լուրը ազդուօրէն ներկայացնելու պատեհութիւններ ստեղծել։
3 Անհատին դէմքի արտայայտութիւններն ու վերաբերմունքը կրնան անոր զգացումներուն մասին բան մը յայտնել։ (Առ. 15։13) Թերեւս ան մխիթարութեան կարիք ունի, քանի որ սիրելի մը կորսնցուցած է կամ այլ նեղացուցիչ պարագայէ մը կը տառապի։ Տեղին է անոր ուշադրութեան յանձնել կարգ մը յարմար համարներ։ (Առ. 16։24) Եթէ տանտէրը աճապարանօք տունէն դուրս կ’ելլէ կամ լացող մանուկ մը կը շալկէ, նախընտրելի է այցելութիւնը յետաձգել։ Նկատառու եւ «կարեկից» ըլլալով, կը մղենք անհատը որ յաջորդ այցելութեան մեզի մտիկ ընէ։—Ա. Պետ. 3։8
4 Մեկնաբանութիւններդ յարմարցո՛ւր. Պօղոս առաքեալ նկատեց թէ Աթէնք քաղաքը «Անծանօթ Աստուծոյն» նուիրուած զոհասեղան մը ունէր, եւ ըստ այնմ բարի լուրը ներկայացնելու իր կերպը յարմարցնելով, ըսաւ. «Զանիկա որ դուք չճանչնալով կը պաշտէք, ես նոյնը ձեզի կը քարոզեմ»։ Պօղոսի նրբանկատ մօտեցումը մղեց կարգ մը ունկնդիրներ որ Թագաւորութեան պատգամին ականջ տան ու հաւատացեալներ դառնան։—Գործք 17։23, 34
5 Նմանապէս, նկատող ըլլալով կրնանք անհատին հետաքրքրութիւնները զատորոշել ու ըստ այնմ մեր մօտեցումը յարմարցնել։ Հարցումներ գործածէ, որպէսզի տանտէրը արտայայտուի։ Ընտրէ համարներ, որոնք կրնան անոր հետաքրքրութիւնը սրել։ (Առ. 20։5) Նկատող ըլլալով եւ ուրիշներու հանդէպ անձնական հետաքրքրութիւն ցուցաբերելով, կրնանք բարի լուրը հմտօրէն ներկայացնել։