Լաւ սովորութիւններ մշակելով, ճոխ օրհնութիւններ վայելէ՛
1. Հոգեւոր սովորամոլութիւնդ քննելը ինչո՞ւ օգտակար է։
1 Երբ Քրիստոնեայ եղար, հաւանաբար շատ ջանք թափեցիր հոգեւոր գործունէութիւններու առողջ սովորամոլութիւն մը զարգացնելու, որ պարփակեց՝ Աստուածաշունչի ուսումնասիրութիւն, քրիստոնէական ժողովներ, դաշտի ծառայութիւն եւ աղօթք։ Ջանքերուդ վրայ Եհովայի օրհնութեան շնորհիւ, հոգեւորապէս աճեցար։ Թերեւս տարիներ անցած են այդ օրէն երբ մկրտուեցար, բայց մշակած հոգեւոր լաւ սովորութիւններդ տակաւին կը պահե՞ս։
2. Աստուածաշունչի առօրեայ ընթերցանութենէն ի՞նչպէս կ’օգտուինք։
2 Սովորամոլութիւնդ քննէ. Ամէն օր Աստուծոյ Խօսքէն հատուած մը կարդալու սովորութիւնը ունի՞ս։ Ասիկա ընելով ճոխ օրհնութիւններ կը վայելենք։ (Յես. 1։8. Սաղմ. 1։2, 3) Վաղեմի Իսրայէլի մէջ, իւրաքանչիւր թագաւոր «իր կեանքին բոլոր օրերուն մէջ» Օրէնքի գիրքը պէտք էր կարդար։ Ի՞նչ էին օգուտները։ Ան խոնարհ սիրտ մը պիտի մշակէր եւ Եհովայէ վախնալ պիտի սորվէր, որպէսզի անոր պատուիրաններէն չխոտորէր։ (Բ. Օր. 17։18-20) Նոյնպէս ներկայիս, Աստուածաշունչի առօրեայ ընթերցանութիւնը մեզի կ’օգնէ այս ամբարիշտ ու ապականած աշխարհին մէջ անմեղադրելի եւ անարատ մնալու։ Անիկա նաեւ մեզի կ’օգնէ ծառայութեան համար լիովին զինուած ըլլալու։—Փիլ. 2։15. Բ. Տիմ. 3։17
3. Ժողովներուն կանոնաւորաբար ներկայ գտնուելով ի՞նչ օրհնութիւններ կը վայելենք։
3 Յիսուս ժողովարան երթալու սովորութիւնը ունէր, ուր Սուրբ Գրութիւնները կ’ուսումնասիրուէին։ (Ղուկ. 4։16) Անտարակոյս, ասիկա զինք ամրապնդեց իր փորձութիւնները դիմագրաւելու։ Մենք ալ ժողովքային հանդիպումներուն հաղորդուած հոգեւոր ուսուցումով եւ ‘իրար քաջալերելով’ կը զօրանանք։ (Հռովմ. 1։12, Անթիլիաս) Մեր եղբայրներուն հետ մէկտեղ հաւաքուիլը մեզի կ’օգնէ այս վերջին օրերու դժուարութիւններուն տոկալու։ (Եբր. 10։24, 25) Տակաւին բոլոր ժողովներուն ներկայ գտնուելու սովորութիւնը ունի՞ս։
4. Ամէն շաբաթ դաշտի ծառայութեան մասնակցելով ի՞նչ օգուտներ կը քաղենք։
4 Ներշնչեալ արձանագրութիւնը մեզի կ’ըսէ թէ առաքեալները «ամէն օր տաճարը ու տուներուն մէջ» բարի լուրը կը ծանուցանէին։ (Գործք 5։42) Թերեւս չենք կրնար ամէն օր քարոզել, բայց կրնա՞նք ամէն շաբաթ ծառայութեան որոշ տեսակի մը մասնակցիլ։ Ասիկա ընելով, վստահաբար Աստուծոյ Խօսքը գործածելու մէջ աւելի հմուտ պիտի ըլլանք, եւ Աստուածաշունչի ճշմարտութիւնը ուրիշներու ներկայացնելու վերաբերեալ քաջալերական փորձառութիւններ պիտի վայելենք։
5. Ինչո՞ւ կանոնաւորաբար Եհովայի աղօթելը կենսական է։
5 Դանիէլ մարգարէն իր ամբողջ կեանքի տեւողութեան «անդադար» Եհովայի ծառայելուն համար մեծապէս օրհնուեցաւ։ Ասիկա պարփակեց՝ կանոնաւորաբար Եհովայի աղօթելու սովորութիւնը։ (Դան. 6։10, 16, 20) Նոյնպէս, երբ կանոնաւորաբար ու սրտանց Եհովայի աղօթենք, ան մեզի իր սուրբ հոգին պիտի տայ։ (Ղուկ. 11։9-13) Ասկէ աւելի, Եհովա մեզի պիտի մօտենայ, թոյլ տալով որ իրեն հետ մտերիմ յարաբերութիւն մը վայելենք։ (Սաղմ. 25։14. Յակ. 4։8) Ի՜նչ մեծ վարձատրութիւն։ Հետեւաբար, թող հոգեւոր լաւ սովորութիւններ պահպանելու մէջ ջանադիր ըլլանք եւ Եհովայի ճոխ օրհնութիւնները վայելենք։