Քրիստոսի հետեւէ՝ ծանրաբարոյութիւն ցուցաբերելով

1. Այս տարուան նահանգային համաժողովի բնաբանը ի՞նչպէս առնչուած է ծանրաբարոյութիւն ցուցաբերելու հետ։

¹ Աստուածաշունչը տիեզերքի Գերիշխան Եհովան կը նկարագրէ որպէս փառաւորութիւն հագած։ (Սաղմ. 104։1) Յիսուս միշտ իր Հայրն ու անոր կարգադրութիւնները պատուող կերպով խօսեցաւ ու գործեց։ (Յովհ. 17։4) «Քրիստոսի հետեւեցէք» բնաբանով մեր մօտալուտ նահանգային համաժողովներուն, իւրաքանչիւրս Յիսուսը ընդօրինակելու եւ Եհովան փառաւորելու պատեհութիւններ պիտի ունենանք։

2. Իւրաքանչիւր նիստին ներկայ գտնուելու կարգադրութիւններ ընելը ի՞նչպէս Եհովան կը պատուէ։

² Յարգարժան պաշտամունք. Եհովան կրնանք պատուել՝ մեզի համար իր պատրաստած հոգեւոր խնճոյքին ներկայ գտնուելու կարգադրութիւններ ընելով։ Գործատիրոջդ հետ խօսա՞ծ ես եւ գործերդ կարգի դրա՞ծ ես, որպէսզի համաժողովի երեք օրերուն ալ ներկայ գտնուիս, ի ներառեալ՝ Ուրբաթ։ Ծրագրա՞ծ ես կանուխ հասնիլ, որպէսզի նստարան ապահովես եւ բացման երգեցողութեան ու աղօթքին մասնակցիս։ Կէսօրուան ճաշերդ որոշա՞ծ ես, որպէսզի համաժողովի վայրին մէջ եղբայրներուդ հետ կարենաս ուտել։ Իւրաքանչիւր նիստի սկիզբը, երբ երաժշտութիւնը չսկսած՝ ատենապետը ազնուօրէն մեզ կը հրաւիրէ մեր տեղերը նստելու, շուտով մեր զրոյցներուն վերջ պէտք է դնենք եւ յայտագիրը չսկսած նստինք։

3. Յայտագրին լաւ ուշադրութիւն ընծայելը ի՞նչպէս մեր պաշտամունքը կը պատուէ։

³ Յայտագրին լաւ ուշադրութիւն ընծայելն ալ մեր երկնաւոր Հայրը կը պատուէ։ Նահանգային համաժողովի մը ներկայ գտնուելէ ետք, թղթակից մը գրեց թէ դիտողները պիտի տպաւորուին՝ «տեսնելով ներկաներուն օրինակելի վարքը, մինչ դասախօսութիւններուն կը հետեւին յարգալից լռութեամբ եւ հոգեւոր ախորժակով»։ Ան նաեւ խօսեցաւ «երախաներու բացառիկ թիւին» մասին, եւ թէ «բոլորն ալ զարմանալիօրէն քաղաքավար են, կամ նոյնիսկ զբաղած՝ Սուրբ Գիրքի համարներ բանալով»։ Մինչ յայտագիրը կ’ընթանայ, ժամանակը չէ անտեղի զրոյցներ ունենալու, բջիջային հեռաձայնով պատգամներ ղրկելու, ուտելու կամ նրբանցքներուն մէջ պտըտելու։ Դեռատիները իրենց ծնողներուն հետ պէտք է նստին, որպէսզի ծնողներ կարենան անոնց օգնել յայտագրէն օգտուելու։ (Բ. Օր. 31։12. Առ. 29։15) Այսպիսի ջանքեր ուրիշներու հանդէպ յարգանք ցոյց կու տան եւ հրամցուած կենսական հոգեւոր ուտելիքին հանդէպ՝ գնահատութիւն։

4. Համաժողովի ընթացքին ինչո՞ւ յարգալից երեւոյթ պէտք է ունենանք։

⁴ Յարգալից երեւոյթ. Շատեր գնահատեցին անցեալ տարուան նահանգային համաժողովի «Ամէն ատեն քրիստոնէական ծանրաբարոյութիւն ցուցաբերէ» բնաբանով դասախօսութիւնը, որ ընդգծեց թէ Աստուծոյ ծառաները պէտք է ջանան իրենց հագուելակերպին ու յարդարանքին մէջ քրիստոնէական պատկառանք ցոյց տալ։ Այս տարի դարձեալ այս հարցին լուրջ ուշադրութիւն պէտք է ընծայենք։ Մեր երեւոյթը՝ Եհովայի եւ իր Վկաները ըլլալու առանձնաշնորհումին հանդէպ մեր զգացումները կ’արտացոլացնէ։ «Աստուածպաշտութիւնը յանձն առած» անհատներու նման մի՛շտ պէտք է հագնինք։—Ա. Տիմ. 2։9, 10

5. Ի՞նչպէս կրնանք համաժողովի քաղաքին մէջ մեր ազատ ժամերուն յարգալից երեւոյթ պահել։

⁵ Միայն համաժողովի ընթացքի՞ն յարգալից երեւոյթ պէտք է ունենանք։ Մտաբերէ թէ շատեր մեզ պիտի դիտեն երբ համաժողովի քաղաքին մէջ կը պտըտինք՝ համաժողովի լանջանշաններ դրած։ Մեր երեւոյթը մեզ պէտք է զանազանէ ընդհանուր հանրութենէն։ Հետեւաբար, նոյնիսկ մեր ազատ ժամերուն, ինչպէս երբ յայտագրէն ետք ճաշարան կ’երթանք, քարոզիչներու վայել կերպով պէտք է հագնինք՝ որոնք այդ քաղաքին մէջ են քրիստոնէական համաժողովի մը ներկայ գտնուելու նպատակով, իսկ ճինզ, կարճ տաբատ կամ Թիշըրդ պէտք չէ հագնինք։ Ասիկա այդտեղի համայնքին ի՜նչ լաւ վկայութիւն մը պիտի տայ։ Եհովա կը հաճի երբ մեր երեւոյթը կ’արտացոլացնէ մեր քարոզիչ ըլլալը։

6. Քրիստոնէական ծանրաբարոյութիւն ցուցաբերելուն դրական արդիւնքները ի՞նչ են։

⁶ Գոհացուցիչ արդիւնքներ. Մեր համաժողովներուն քրիստոնէական ծանրաբարոյութիւն ցուցաբերելը, անպաշտօն կերպով վկայելու առիթներ կը ստեղծէ եւ դիտողներուն վրայ լաւ տպաւորութիւն կը ձգէ։ Համաժողովի մը աւարտին, պաշտօնեայ մը նշեց. «Մենք բնաւ այսքան քաղաքավար մարդիկ չենք տեսած։ Ինչ որ Աստուած կ’ակնկալէ մեզմէ, դուք այդպէս կը վարուիք»։ Ծանրաբարոյութիւն ցուցաբերելը՝ իրարու հանդէպ յարգանք ու սէր ցոյց կու տայ եւ Եհովան կը փառաւորէ։ (Ա. Պետ. 2։12) Անիկա մեր աստուածավախութիւնը եւ մեր Հօրմէն ուսուցանուելու առանձնաշնորհումին հանդէպ մեր գնահատութիւնը կ’ապացուցանէ։ (Եբր. 12։28) Թող ջանանք ծանրաբարոյութիւն ցուցաբերել, մինչ անձկագին կը սպասենք այս տարուան «Քրիստոսի հետեւեցէք» բնաբանով Նահանգային Համաժողովին։