Հոգեւոր կոչունքի մը համար պատրաստուա՞ծ ես

1. Կոչունքի մը համար ի՞նչպիսի պատրաստութիւն պարփակուած է։

¹ Կոչունք մը շատ պատրաստութեան կը կարօտի։ Ուտելիքներ պէտք է գնել, զանոնք համեղ կերպով պատրաստել, ապա հրամցնել։ Ուտելիքներուն մատակարարումը պէտք է կազմակերպուի։ Ասկէ զատ, ճաշասրահը պէտք է կարգի դրուի։ Հրաւիրեալներն ալ պատրաստութիւն պէտք է տեսնեն, մանաւանդ եթէ հեռու տեղէ մը պիտի գան։ Թէեւ շատ աշխատանք պարփակուած է, բայց կ’արժէ բարեկամներու եւ ընտանիքի անդամներու հետ համեղ ու սննդարար ճաշ ուտելը։ Մօտ ատենէն, Եհովայի վկաները համայն աշխարհի մէջ պիտի հաւաքուին, մեծ կամ պզտիկ խումբերով, շատ ակնկալուած հոգեւոր կոչունք մը վայելելու,– «Արթո՛ւն կեցէք» բնաբանով նահանգային համաժողովը։ Յայտագիրը եւ այլ բաներ պատրաստելու համար արդէն շատ աշխատանք տարուած է։ Բոլորս ալ հրաւիրուած ենք։ Սակայն ներկայ գտնուելու եւ լաւագոյն օգուտը քաղելու համար, անձնապէս պէտք է պատրաստուինք (Առ. 21։5)։

2. Մեր հոգեւոր կոչունքին իւրաքանչիւր նիստին ներկայ գտնուիլը ի՞նչ կը պահանջէ։

² Լաւագոյն օգուտը քաղէ։ Ծրագիրներդ ամբողջացուցա՞ծ ես, որպէսզի կարենաս այս հոգեւոր կոչունքին իւրաքանչիւր նիստին ներկայ գտնուիլ։ Եթէ անհրաժեշտ է, գործատիրոջդ իմացուր թէ համաժողովին բոլոր նիստերուն ներկայ պիտի գտնուիս, ի ներառեալ՝ առաջին օրը։ Փոխադրութեան եւ իջեւանի վերջնական կարգադրութիւնները ըրա՞ծ ես։ Երէցները պէտք է ստուգեն որ տարեցներուն եւ անկարողներուն, ինչպէս նաեւ օգնութեան կարիք ունեցողներուն հոգ տարուած է (Եր. 23։4. Գաղ. 6։10)։

3. Ինչո՞ւ միջազգային համաժողովի մը պէտք չէ ներկայ գտնուինք եթէ հրաւիրուած չենք։

³ Կարգ մը շրջաններու մէջ միջազգային համաժողովներ տեղի պիտի ունենան։ Ի մտի ունեցիր որ այս համաժողովներուն, որոշ ժողովքներ եւ օտար պատուիրակներ հրաւիրուած են։ Այս կարգադրութիւնները ընելու ատեն, մասնաճիւղը ուշադրութեամբ հաշուած է թէ քանի՛ հոգի հրաւիրէ, նկատի առնելով մատչելի նստարաններուն եւ պանդոկի սենեակներուն թիւը։ Խճողում կրնայ ստեղծուիլ, եթէ անկոչ հրատարակիչներ միջազգային համաժողովին ներկայ գտնուին։

4. Ի՞նչ յիշեցումներ մեզի պիտի օգնեն որ իւրաքանչիւր օրուան յայտագրին սկիզբը պատրաստ ըլլանք։

⁴ Ջանա՛ ամէն օր համաժողովին կանուխ հասնիլ ու յայտագիրը սկսելէ առաջ նստարան մը գտնել։ Նիստը սկսելէ առաջ, տպուած յայտագիրը աչքէ անցուր։ Ասիկա քեզի պիտի օգնէ ներկայացուելիք տեղեկութիւններուն համար սիրտդ պատրաստելու (Եզր. 7։10)։ Երբ նիստի ատենապետը միջանուագ մը ներկայացնէ, հաճոյքով մտիկ ըրէ, ապա պատրաստուէ բացման երգեցողութեան եւ աղօթքին մասնակցելու։

5. Մեր ընտանիքը ի՞նչպէս կրնայ յայտագրէն լաւագոյն օգուտը քաղել։

⁵ Եթէ ընտանիքի անդամներ համաժողովի ընթացքին իրարու քով նստին, ծնողներ պիտի կարենան վստահ ըլլալ թէ իրենց զաւակները յայտագրին ուշի–ուշով կը հետեւին (Բ. Օր. 31։12)։ Բոլորին քաջալերութիւն կը տրուի որ Աստուածաշունչը բանան ու հետեւին համարներու ընթերցանութեան։ Հակիրճ նոթեր գրելով, կրնաս ուշադրութեամբ մտիկ ընել։ Յետագային, նոթերդ քեզի պիտի օգնեն որ դասախօսութիւններուն գլխաւոր կէտերը յիշես։ Նիստերուն ընթացքին անտեղիօրէն խօսելու կամ նստարանդ ձգելու փորձութեան դէմ դիր։ Թոյլ մի՛ տար բջիջային հեռաձայնիդ, որ յայտագրին ընթացքին քեզ կամ ուրիշները խանգարէ։ Իւրաքանչիւր օրուան նիստերէն ետք, ինչո՞ւ ուրիշներու հետ նկատի չառնես կարգ մը կէտեր, որոնք ուշադրութիւնդ գրաւեցին։

6. Մեր համաժողովներուն ուշագրաւ մէկ երեւոյթը ի՞նչ է, եւ ի՞նչպէս կրնանք զայն լիովին վայելել։

⁶ Նահանգային համաժողովին, մեր եղբայրներուն ու քոյրերուն հետ անզուգական կապ մը վայելելու պատեհութիւնը ունինք, զոր աշխարհը չունի (Սաղ. 133։1-3. Մար. 10։29, 30)։ Ճաշի դադարին ընթացքին, ջանա՛ շուրջդ նստող անհատներուն ինքզինքդ ծանօթացնել եւ անոնց հետ խօսակցիլ։ Ասիկա թեթեւ ճաշ մը բերելուն եւ համաժողովի վայրին մէջ մնալուն առաւելութիւններէն մէկն է։ Վստահ եղիր որ փոխադարձ քաջալերութեան այս պատեհութիւնը չկորսնցնես (Հռով. 1։11, 12)։

7. Մեր հագուստին առնչութեամբ ի՞նչ պատրաստութիւններ պէտք է տեսնենք։

⁷ Հագուստ։ Ուշադրութեան արժանի է, թէ Եհովա իսրայէլացիներուն պատուիրեց, որ իրենց հագուստներուն քղանցքներուն վրայ ծոպեր շինեն, եւ քղանցքի ծոպերուն վրայ կապուտակէ երիզ մը դնեն (Թուոց 15։37-41)։ Ասիկա տեսանելի յիշեցում մըն էր, թէ իրենք Եհովայի պաշտամունքին համար զատուած ժողովուրդ մըն էին։ Ներկայիս, համաժողովի ընթացքին մեր հագած յարգալից ու համեստ հագուստները, մեզ աշխարհէն կը զատեն։ Անիկա դիտորդներուն զօրաւոր վկայութիւն մը կու տայ, նոյնիսկ երբ յայտագրէն ետք ճաշարան մը երթանք։ Հետեւաբար, կանխաւ մտածէ թէ ի՛նչ հագուստ պիտի հագնիս։

8. Համաժողովի քաղաքին մէջ, ի՞նչպէս կրնանք ուրիշներու վկայել։

⁸ Վկայութիւն տուր։ Նախապէս ծրագրելով, կրնանք համաժողովի քաղաքին մէջ մարդոց վկայել։ Եղբայր մը, որ յայտագրէն ետք իր կնոջ հետ ճաշարան գնաց, պարզապէս իր լանջանշանը մատնանշելով հարցուց սպասեակին. «Այս լանջանշանը կրող բազմաթիւ անհատներ տեսա՞ծ ես»։ Սպասեակը ըսաւ որ զանոնք նկատած էր ու հարց տուած էր թէ անոնք ո՛վ են։ Ասիկա խօսակցութեան դուռ բացաւ, եւ եղբայրը զայն հրաւիրեց համաժողովին։

9. Ի՞նչպէս կրնանք մեր Հիւրընկալին՝ Եհովայի հանդէպ գնահատութիւն ցուցաբերել։

⁹ Թէեւ մեր եղբայրները բոլոր դասախօսութիւնները, հարցազրոյցներն ու ցուցադրութիւնները պիտի ներկայացնեն, սակայն մեր երկնաւոր Հայրը՝ Եհովան է որ այս տարեկան հոգեւոր կոչունքը կը հայթայթէ (Եսա. 65։13, 14)։ Մեր Հիւրընկալին հանդէպ մեր գնահատութիւնը ցոյց կու տանք, իւրաքանչիւր օր ներկայ գտնուելով եւ հրամցուած հոգեւոր կերակուրին իւրաքանչիւր պատառը համտեսելով։ Ասիկա ընելու համար, պատրաստութիւններդ ամբողջացուցա՞ծ ես։

[Շրջանակ՝ էջ 6]

Նահանգային համաժողովի յիշեցումներ

◼ Յայտագրին ժամերը։ Յայտագիրը երեք օրերուն ալ պիտի սկսի առաւօտեան ժամը 9։20–ին։ Դռները պիտի բացուին առաւօտեան ժամը 8։00–ին։ Երբ բացման երաժշտութիւնը նուագուի, բոլորս մեր տեղերը պէտք է գրաւենք, որպէսզի յայտագիրը յարգալից կերպով սկսի։ Յայտագիրը ուրբաթ եւ շաբաթ օրերը պիտի աւարտի կէսօրէ ետք ժամը 4։55–ին, իսկ կիրակի օրը՝ 4։00–ին։ Միջազգային համաժողովներուն պարագային, հինգշաբթի օրուան յայտագիրը պիտի սկսի կէսօրէ ետք ժամը 1։20–ին, եւ պիտի աւարտի ժամը 4։45–ին։

◼ Կառավայր։ Այն համաժողովը, ուր կառավայրի վրայ վերահսկելը մեզի վստահուած է, ինքնաշարժ շարելու տեղեր անվճար մատչելի պիտի ըլլան առաջին հասնողներուն։ Միայն ան՝ որ իր ինքնաշարժին վրայ օրինաւոր արտօնագիր կը կրէ թէ ֆիզիքապէս անկարող է, պիտի կարենայ զայն շարել հո՛ն, ուր անկարողներուն վերապահուած է։ Որովհետեւ սովորաբար տեղերը սահմանափակ են, ինքնաշարժները կարելի եղածին չափ լեցուն թող ըլլան։

◼ Նստարաններ ապահովել։ Կարելի է աթոռներ ապահովել միմիայն ձեզի հետ ինքնաշարժով ճամբորդողներուն կամ ձեզի հետ նոյն տան մէջ ապրողներուն։

◼ Կէսօրուան ճաշ։ Հաճեցէք ձեր ճաշը բերել, փոխանակ կէսօրուան դադարին համաժողովի վայրը ձգելու՝ այլուր ճաշելու համար։ Կրնաք պզտիկ պաղարան մը գործածել, որ կրնայ ձեր աթոռին տակ դրուիլ։ Մեծ պաղարաններ եւ ապակեայ պահեստամաններ, համաժողովի շէնքերէն ներս արտօնուած չեն։

◼ Նուիրատուութիւն։ Կրնանք մեր գնահատութիւնը ցոյց տալ՝ համաշխարհային գործին ի նպաստ նուիրատուութիւններ ընելով, մեր Թագաւորութեան սրահին կամ համաժողովի վայրին մէջ։ Համաժողովի վայրին մէջ վճարագրով եղած նուիրատուութիւնները, «Եհովայի վկաներու քրիստոնէական ժողովք»ին անունով պէտք է ըլլան։

◼ Արկածներ եւ շտապ օգնութիւն։ Շտապ օգնութեան կեդրոնները կ’ըսեն թէ շատեր աննշան հարցերու համար բջիջային հեռախօսով կը հեռաձայնեն։ Եթէ համաժողովի վայրին մէջ շտապ օգնութեան պարագայ մը ծագի, հաճեցէք ամենամօտ հիւրընկալին հետ խօսիլ, որ իր կարգին անմիջապէս Նախնական դարմանումի բաժանմունքին պիտի իմացնէ, որպէսզի որակեալ անհատներ պարագային լրջութիւնը արժեւորեն ու հարկ եղած օգնութիւնը մատակարարեն։ Եթէ անհրաժեշտ է, անոնք 911 թիւին կը հեռաձայնեն։

◼ Ոտնաման։ Ամէն տարի ոմանք ոտնամանի պատճառաւ կը վնասուին։ Լաւագոյն ընտրութիւնն է՝ համեստ ու հանգիստ կօշիկները, որոնք թոյլ պիտի տան որ անհատը ապահովութեամբ քալէ աստիճաններու վրայ, վանդակորմի վրայ, եւ այլն։

◼ Լսողութեան տկարութիւն։ Լսարանին մէջ յայտագիրը պիտի ձայնասփռուի FM–ի մէկ ալիքին վրայ։ Այս կարգադրութենէն օգտուելու համար, ձեզի հետ պզտիկ FM ռատիօ մը եւ ընկալուչներ պէտք է բերէք։

◼ Ձայնագրութիւն։ Ձայնագրութեան մեքենաները լսարանին ելեկտրական կամ ձայնային սարքերուն պէտք չէ կապուին, եւ կարելի է զանոնք գործածել միայն եթէ ուրիշները չեն խանգարեր։

◼ Մանուկներու կառքեր եւ ետեւ թեքուող աթոռներ։ Համաժողովի վայրերուն մէջ մանուկներու կառքեր եւ ետեւ թեքուող աթոռներ պէտք չէ բերուին։ Սակայն ինքնաշարժի մէջ գործածուող մանուկներու աթոռներ, որոնք կրնան ծնողքին քովի աթոռին վրայ ամրացուիլ, ընդունելի են։

◼ Անուշահոտութիւն։ Շատ մը համաժողովներ տեղի կ’ունենան գոց վայրերու մէջ, ուր մեքենական օդափոխութիւն կը գործածուի։ Հետեւաբար ազնուութիւն է սահմանափակել զօրաւոր անուշահոտի գործածութիւնը, որ կրնայ ժխտական ազդեցութիւն ունենալ շնչառական կամ յարակից խնդիրներէ տառապող անհատներու վրայ (Ա. Կոր. 10։24)։

◼ Հաճեցէք հետապնդել պատճենները։ Հաճեցէք հետապնդել (S-43) պատճենը պէտք է գործածուի տեղեկութիւն տալու ոեւէ անհատի մասին, որ համաժողովի ընթացքին հետաքրքրութիւն կը ցուցաբերէ՝ անպաշտօն վկայութեան շնորհիւ։ Հրատարակիչները իրենց հետ մէկ կամ երկու պատճեն պէտք է բերեն։ Պատճենները լեցնելէ ետք, կրնաք զանոնք յանձնել Հրատարակութիւններու բաժանմունքին, կամ՝ ժողովքի քարտուղարին, երբ վերադառնաք (տե՛ս փետրուար 2005–ի Մեր Թագաւորութեան ծառայութիւնը թերթիկը, էջ 6)։

◼ Ճաշարաններ։ Եհովայի անունը պատուեցէք՝ ճաշարաններուն մէջ ընտիր վարք ցուցաբերելով։ Բազմաթիւ տեղեր սովորութիւն է 15-20 առ հարիւր ձեռաձիր ձգել, սպասարկութեան որակին համաձայն։

◼ Պանդոկներ։ 1) Հարկ եղածէն աւելի սենեակներ մի՛ վերապահէք, եւ ձեր սենեակը արտօնուած թիւէն աւելի անհատներ մի՛ ունենաք։ 2) Եթէ ձեր վերապահումը պիտի ջնջէք, անմիջապէս պանդոկը տեղեակ պահեցէք։ 3) Պայուսակներ փոխադրելու կառքը առէք, միայն երբ զայն պիտի գործածէք, եւ անմիջապէս վերադարձուցէք, որպէսզի ուրիշներ կարենան զայն գործածել։ 4) Եփել արգիլուած սենեակներուն մէջ մի՛ եփէք։ 5) Ամէն օր ձեռաձիր ձգեցէք սենեակին հոգ տանողին։ 6) Մի՛ շահագործէք անվճար նախաճաշը, սուրճը կամ սառը, որոնք իջեւանողներուն համար են, մինչ պանդոկին մէջ են։ 7) Պանդոկի անձնակազմին հանդէպ ամէն ատեն հոգիին պտուղը ցուցաբերեցէք։ Անոնք մեծ թիւով հիւրերու հոգ կը տանին եւ մեր ազնուութիւնը, համբերութիւնը եւ բանաւորութիւնը կը գնահատեն։ 8) Յանձնարարուած իջեւանի ցանկ–ին վրայ նշուած սենեակին սակը՝ մէկ օրուան լման սակն է, բացի տուրքէն։ Եթէ ձեր չխնդրած կամ չգործածած բանին համար ձեզմէ յաւելեալ գումար պահանջուի, մերժեցէք վճարել եւ անմիջապէս տեղեկացուցէք համաժողովի Իջեւանի բաժանմունքը։ 9) Եթէ ձեր պանդոկի սենեակին նկատմամբ խնդիր մը ծագի, Իջեւանի բաժանմունքը տեղեկացուցէք, մինչ համաժողովին մէջ էք։