«Երանելի է այն մարդը, որ փորձութեան կը համբերէ»
1 Բոլոր Քրիստոնեաները փորձութիւններ պիտի դիմագրաւեն։ (Բ. Տիմ. 3։12) Փորձութիւնները այլազան կերպերով կրնան գալ, ինչպէս՝ հիւանդութիւն, տնտեսական նեղութիւն, հալածանք, եւայլն։ Սատանայի կողմէ եկած փորձութիւններուն նպատակն է՝ մեզ դանդաղեցնել որ քրիստոնէական ծառայութեան նկատմամբ անտարբեր ըլլանք կամ նոյնիսկ մեզ կասեցնել Աստուծոյ ծառայելէ։ (Յոբ 1։9-11) Փորձութեան տոկալը ի՞նչպէս երջանկութեան կ’առաջնորդէ։—Բ. Պետ. 2։9
2 Փորձութիւններու համար պատրաստուէ. Եհովա հայթայթած է իր ճշմարտութեան Խօսքը, ի ներառեալ՝ Յիսուսի կեանքին եւ ուսուցումներուն արձանագրութիւնը։ Յիսուսի խօսքերը լսելով եւ զանոնք կատարելով, հաստատ հիմ մը կը դնենք եւ հետեւաբար՝ փորձութիւններու կը պատրաստուինք։ (Ղուկ. 6։47-49) Այլ հայթայթումներ ալ մեզի զօրութիւն կու տան,– մեր Քրիստոնեայ եղբայրները, ժողովքային հանդիպումները եւ հաւատարիմ ու իմաստուն ծառայ դասակարգին կողմէ հայթայթուած աստուածաշնչական հրատարակութիւնները։ Եւ յաճախ կը գործածենք Աստուծոյ պարգեւը՝ աղօթքը։—Մատթ. 6։13
3 Եհովա նաեւ յոյս մը տուած է մեզի։ Երբ Եհովայի խոստումներուն հանդէպ զօրաւոր հաւատք կը կերտենք, մեր յոյսը ‘մեր անձին համար հաստատ ու անշարժ խարիսխ մը կը դառնայ’։ (Եբր. 6։19) Աստուածաշունչի ժամանակներուն, նաւերը առանց խարիսխի երբեք չէին ձգեր նաւահանգիստը, նոյնիսկ երբ օդը նպաստաւոր ըլլար։ Եթէ յանկարծ փոթորիկ մը ելլէր, խարիսխ նետելը կրնար արգելք ըլլալ որ նաւը ժայռոտ ծովեզերքի մը վրայ խորտակուի։ Նոյնպէս, հի՛մա Աստուծոյ խոստումներուն հանդէպ հաւատք կերտելը, մեզ հաստատ պիտի պահէ երբ դժուարութիւններու փոթորիկներ փչեն։ Փորձութիւնները կրնան շատ անակնկալօրէն գալ։ Թէեւ Պօղոսի ու Բառնաբասի քարոզչութիւնը Լիւստրայի մէջ սկիզբը լաւ ընդունելութիւն գտաւ, սակայն հարցը շուտով փոխուեցաւ երբ Հրեայ հակառակորդներ հասան։—Գործք 14։7-18
4 Տոկալը երջանկութիւն կը բերէ. Ի հեճուկս հակառակութեան ծառայութեան մէջ հաստատ մնալը, մտքի խաղաղութիւն կու տայ մեզի։ Կ’ուրախանանք երբ արժանի կ’ըլլանք Քրիստոսի համար անարգուելու։ (Գործք 5։40, 41) Փորձութիւններու տոկալը մեզի կ’օգնէ որ աւելի լման կերպով մշակենք խոնարհութիւն, հնազանդութիւն ու համբերատարութիւն։ (Բ. Օր. 8։16. Եբր. 5։8. Յակ. 1։2, 3) Անիկա մեզի կը սորվեցնէ Եհովայի ապաւինիլ, իր խոստումներուն վստահիլ եւ իր քով ապաստանիլ։—Առ. 18։10
5 Գիտենք թէ փորձութիւնները ժամանակաւոր են։ (Բ. Կորն. 4։17, 18) Փորձութիւնները մեզի պատեհութիւններ կու տան որ Եհովայի հանդէպ մեր սիրոյն խորութիւնը ցոյց տանք։ Փորձութիւններու տոկալով կրնանք Սատանայի ամբաստանութիւններուն պատասխան մը հայթայթել։ Հետեւաբար, չենք հեղգանար։ «Երանելի է այն մարդը, որ փորձութեան կը համբերէ։ Վասն զի եթէ փորձուելով ընտիր գտնուի, կենաց պսակը պիտի առնէ»։—Յակ. 1։12